ఒక్కరోజే ఏకంగా 20 శాతం పెరిగిన షేరు.. ఆ ఒక్క కారణంతోనే ఇన్వెస్టర్లు జేబులు నింపుకున్నారుగా

ఆర్థిక నిపుణుల సలహాతో సరైన స్టాక్ ఎంచుకుంటే అవి కొన్ని సార్లు ఇన్వెస్టర్ల దశ కూడా తిప్పుతుంటాయి. అప్పటికప్పుడు భారీగా పెరిగే, అదే స్థాయిలో భారీగా పడిపోయే స్టాక్స్ చాలానే ఉంటాయి. అందుకే ఆయా కంపెనీల నుంచి వచ్చే ప్రకటనలు, ఫలితాలు, పెట్టుబడి వ్యూహాలు, ప్రణాళికలు, ఒప్పందాలు ఇవన్నీ జాగ్రత్తగా పరిశీలించడం ద్వారా సరైన స్టాక్‌లో సరైన సమయంలో ఇన్వెస్ట్ చేసే అవకాశం కలుగుతుంది. ఇప్పుడు ఇలానే ఒక స్టాక్ సోమవారం సెషన్‌లో (జూన్ 22) 20 శాతం అప్పర్ సర్క్యూట్ కొట్టింది. భారత స్టాక్ మార్కెట్ సూచీలు మంచి లాభాల్లో ట్రేడవుతున్న వేళ ఈ స్టాక్‌ అధిక వాల్యూమ్స్‌తో దూసుకెళ్లింది. సెన్సెక్స్ ప్రస్తుతం వార్త రాస్తున్న సమయంలో జూన్ 22న మధ్యాహ్నం 12.30 గంటలకు 350 పాయింట్లకుపైగా పెరిగి 77,150 మార్కు పైన ఉంది. నిఫ్టీ 100 పాయింట్లు పుంజుకొని 24,110 స్థాయిలో కొనసాగుతోంది. ఈ క్రమంలోనే కిర్లోస్కర్ ఆయిల్ ఇంజిన్స్ లిమిటెడ్ (KOEL) స్టాక్ 20 శాతం ఎగబాకింది. కిందటి సెషన్‌లో 1991.50 వద్ద స్థిరపడగా ఇవాళ నేరుగా 10 శాతానికిపైగా లాభంతో రూ. 2200 వద్ద ఓపెన్ అయింది. అక్కడితో ఆగకుండా కాసేపటికే నిమిషాల వ్యవధిలో 9.40 కల్లా 20 శాతం అప్పర్ సర్క్యూట్‌తో రూ. 2389.80 వద్ద లాక్ అయింది. ఇది స్టాక్ 52 వారాల గరిష్ఠ ధర కావడం విశేషం. ప్రస్తుతం అక్కడే ఉంది. ఈ క్రమంలో కిందటి రోజుతో చూస్తే ఒక్కో షేరు ధర రూ. 398.30 పెరిగింది. ఇందులో పెట్టుబడులు పెట్టిన వారికి ఇవాళ మంచి లాభాలు వచ్చాయని చెప్పొచ్చు. సంస్థ మార్కెట్ విలువ రూ. 34.72 వేల కోట్లుగా ఉంది. స్టాక్ 52 వారాల కనిష్ఠ ధర రూ. 828.15 గా ఉంది. ఇక నెల వ్యవధిలో ఈ స్టాక్ 43 శాతం పెరిగింది. 6 నెలల్లో 82 శాతం పుంజుకుంది. ఏడాదిలో 182 శాతం ఎగబాకింది. మెగా డీల్- కొనుగోళ్ల వెల్లువఇక సోమవారం సెషన్‌లో ఈ స్టాక్ పెరిగేందుకు కారణం డిజిటల్ ఇన్‌ఫ్రాస్ట్రక్చర్ సంస్థ హైపర్‌నెక్ట్స్ నుంచి భారీ డేటా సెంటర్ పవర్ సిస్టమ్స్ ఆర్డర్ లభించడమే. 192 మెగావాట్ల పవర్ జనరేషన్ కెపాసిటీ ఆర్డర్ సొంతం చేసుకుంది. దేశీయంగా హైపర్ స్కేల్ డేటా సెంటర్ మార్కెట్‌లో ఇప్పటివరకు కమిన్స్ ఇండియా దాదాపు 80 శాతానికిపైగా వాటాతో ఆధిపత్యం చెలాయిస్తోంది. ఇప్పుడు మెగా ఆర్డర్‌తో కిర్లోస్కర్ కంపెనీ ఆ విభాగంలోకి బలంగా దూసుకెళ్లింది. ఇక్కడ జేఎం ఫైనాన్షియల్, మోతీలాల్ ఓస్వాల్ సహా పలు బ్రోకరేజీలు కూడా ఈ స్టాక్ టార్గెట్ ప్రైస్‌ను భారీగా పెంచేశాయి. దీంతో ఇన్వెస్టర్లు ఈ స్టాక్‌పై ఆసక్తి కనబర్చారు. భారీ కొనుగోళ్లతో స్టాక్ దూసుకెళ్లి అప్పర్ సర్క్యూట్ కొట్టింది.Disclaimer: పైన ఇచ్చింది సమాచారం మాత్రమే. పెట్టుబడికి సిఫార్సు కాదు. స్టాక్ మార్కెట్ పెట్టుబడులు రిస్క్‌కు లోబడి ఉంటాయి. అందుకే ఇన్వెస్ట్ చేసే ముందు ఆర్థిక నిపుణుల సలహా తీసుకోవడం మంచిది.