నన్ను చేతకానివాడిగా చూశారు .. ఆ సినిమాతో రూ.30 కోట్లు నష్టపోయానన్న హీరో

ఇండస్ట్రీలో తాను ఎదుర్కొన్న చేదు అనుభవాలను, కొందరు తన మంచితనాన్ని ఎలా వాడుకున్నారో చెబుతూ ఆయన తీవ్ర ఆవేదన వ్యక్తం చేశారు. ఈ సందర్భంగా ఆయన మాట్లాడుతూ.. “గడిచిన మూడేళ్లలో నా జీవితంలో ఎన్నో చీకటి రోజులను చూశాను. ‘విష్ణు విశాల్ అంటే ఎలాగైనా వాడుకోవచ్చు, తను దేనికైనా ఓకే చెప్తాడు’ అనే స్థాయికి నన్ను తీసుకొచ్చారు. నా కష్టాన్ని ఎవరూ గుర్తించలేదు, కనీసం దాని గురించి మాట్లాడలేదు” అని అన్నారు.

సినిమాపై ఉన్న పిచ్చితో తాను చేసిన ఒక త్యాగాన్ని విష్ణు విశాల్ ఈ సందర్భంగా గుర్తుచేసుకున్నారు. “ఎవరైనా ఏదైనా అడిగితే నేను వెంటనే సహాయం చేయడానికి ముందుంటాను. ఇటీవల వచ్చిన ‘ఇరందు వానం’ సినిమా కోసం అదనంగా మరో 80 రోజులు కేటాయించి నటించాను. అందుకోసం నేను ఒక్క రూపాయి కూడా తీసుకోలేదు. కేవలం సినిమా బాగా రావాలి, సక్సెస్ అవ్వాలి అనే ఉద్దేశంతోనే అలా చేశాను” అని చెప్పారు. “తర్వాత నేను ఒకసారి లెక్కలు వేసుకుని చూస్తే.. ఒక్క సినిమా వల్ల నేను దాదాపు రూ. 30 కోట్లు నష్టపోయాను. ఇదే విషయాన్ని ఆ చిత్ర డైరెక్టర్‌కి చెప్తే, ఆయన నుంచి ఎలాంటి స్పందన లేదు, కనీసం రిప్లై కూడా ఇవ్వలేదు. పైగా నన్ను ఒక పరిస్థితిలో స్వార్థానికి వాడుకున్నారు. ‘విష్ణు అన్న ఏం చేసినా పడతాడు, ఏం అడిగినా చేస్తాడు’ అనే మైండ్‌సెట్‌లోకి వాళ్లు వచ్చేశారు” అని ఆవేదన వ్యక్తం చేశారు. “ఇక చాలు.. నా మంచితనానికి ఒక ఫుల్‌స్టాప్ పెట్టాలి అనుకున్న క్షణం అదే. అదే నా జీవితంలో ‘చివరి దెబ్బ’ లాంటిది. అప్పుడే నేను మారాలని గట్టిగా నిర్ణయించుకున్నాను” అంటూ విష్ణు విశాల్ భావోద్వేగానికి గురయ్యారు. ప్రస్తుతం ఆయన చేసిన ఈ వ్యాఖ్యలు సోషల్ మీడియాలో వైరల్‌గా మారాయి.