గ్లోబల్ మార్కెట్ లో భారత విస్కీ హవా.. స్కాచ్ కు దీటైన పోటీ

ప్రపంచ విస్కీ మార్కెట్‌లో భారత సింగిల్ మాల్ట్‌లు ప్రభంజనం సృష్టిస్తున్నాయి. ఇండియన్ విస్కీ బ్రాండ్లను ఒకప్పుడు స్కాచ్, ఐరిష్ విస్కీలకు ప్రత్యామ్నాయంగా చూసిన ప్రపంచం, ఇప్పుడు వాటి నాణ్యతను, ప్రత్యేకతను గుర్తిస్తోంది. స్కాచ్, జపనీస్ విస్కీల సరసన భారతీయ బ్రాండ్లు కూడా నిలబడుతూ అంతర్జాతీయ వేదికపై తమదైన ముద్ర వేస్తున్నాయి.భారత విస్కీల విశిష్టతకు ఇక్కడి ఉష్ణమండల వాతావరణమే ప్రధాన కారణం. గోవా వంటి వేడి, తేమతో కూడిన ప్రాంతాల్లో ఓక్ పీపాల్లో నిల్వ ఉంచినప్పుడు విస్కీ చాలా వేగంగా పరిపక్వత చెందుతుంది. దీనివల్ల స్కాట్లాండ్ వంటి చల్లని ప్రాంతాల్లో తయారయ్యే విస్కీల కంటే భిన్నంగా, గాఢమైన పండ్ల సువాసనలతో ప్రత్యేకమైన రుచిని సంతరించుకుంటుంది.హిమాలయాల దిగువన పండే బార్లీని ఉపయోగించి, ఇతర దేశాల శైలులను అనుకరించకుండా, పూర్తిగా దేశీయ పద్ధతిలో ఇండియన్ బ్రాండ్ విస్కీలు తయారుచేస్తున్నారు. ప్రస్తుతం వినియోగదారులు ప్రామాణికమైన, ప్రాంతీయ నేపథ్యం ఉన్న ఉత్పత్తుల వైపు మొగ్గు చూపుతున్నారు. జపనీస్ విస్కీలు ఎలాగైతే ఆ దేశ ఖ్యాతిని పెంచాయో, ఇప్పుడు భారత సింగిల్ మాల్ట్‌లు కూడా అదే పని చేస్తున్నాయి. కేవలం అతిపెద్ద వినియోగదారుల మార్కెట్‌గానే కాకుండా, నాణ్యమైన, విలాసవంతమైన ఉత్పత్తులను తయారుచేసే దేశంగా భారత్‌కు గుర్తింపు తెస్తున్నాయి. భారతీయ విస్కీలు ఒక నిర్ణయాత్మక శకంలోకి ప్రవేశిస్తున్నాయని, భవిష్యత్తులో ప్రామాణికతే కీలక పాత్ర పోషిస్తుందని నిపుణులు అభిప్రాయపడుతున్నారు.