యాక్సెంచర్ దెబ్బ.. కుప్పకూలిన ఐటీ షేర్లు, భారీ నష్టాల్లో మార్కెట్లు

ప్రముఖ గ్లోబల్ ఐటీ సంస్థ యాక్సెంచర్ బలహీనమైన సేల్స్, ఆదాయ అంచనాలను ప్రకటించడంతో శుక్రవారం నాటి ట్రేడింగ్‌లో భారత ఐటీ షేర్లు కుప్పకూలాయి. ఈ ప్రభావంతో దేశీయ స్టాక్ మార్కెట్ సూచీలు భారీ నష్టాల్లో ముగిశాయి. ట్రేడింగ్ ముగిసే సమయానికి సెన్సెక్స్ 608 పాయింట్లు నష్టపోయి 76,802 వద్ద స్థిరపడింది.

నిఫ్టీ 155 పాయింట్లు పతనమై 24,013 వద్ద ముగిసింది.యాక్సెంచర్ నిరాశాజనక అంచనాల నేపథ్యంలో ఐటీ రంగ షేర్లలో అమ్మకాల ఒత్తిడి తీవ్రంగా కనిపించింది. నిఫ్టీ, సెన్సెక్స్‌లలో ఇన్ఫోసిస్, టీసీఎస్, టెక్ మహీంద్రా, హెచ్‌సీఎల్ టెక్ టాప్ లూజర్లుగా నిలిచాయి.

రంగాల వారీగా చూస్తే నిఫ్టీ ఐటీ అత్యధికంగా నష్టపోయింది. నిఫ్టీ రియాల్టీ, ఆటో, ఆయిల్ & గ్యాస్ సూచీలు కూడా నష్టాల్లో ముగియగా, నిఫ్టీ ఫార్మా లాభపడింది.అయితే, ఈ ట్రెండ్‌కు భిన్నంగా బ్రాడర్ మార్కెట్లు లాభాలను నమోదు చేశాయి. నిఫ్టీ మిడ్‌క్యాప్ 0.22 శాతం, స్మాల్‌క్యాప్ 0.42 శాతం మేర లాభపడ్డాయి.

టెక్నికల్‌గా నిఫ్టీకి 24,100–24,200 స్థాయిల్లో తక్షణ నిరోధం ఉందని, దీనిని దాటితే 24,400 స్థాయికి చేరవచ్చని విశ్లేషకులు చెబుతున్నారు. అదే సమయంలో, 23,900 స్థాయి కీలక మద్దతుగా ఉంటుందని పేర్కొన్నారు.మరోవైపు, ముడి చమురు ధరలు తగ్గడంతో రూపాయి మారకం విలువ బలపడింది.

డాలర్‌తో పోలిస్తే రూపాయి 7 పైసలు లాభపడి 94.31 వద్ద ట్రేడ్ అయింది. భవిష్యత్తులో మార్కెట్ గమనాన్ని విదేశీ పెట్టుబడులు, రుతుపవనాల పురోగతి, ముడి చమురు ధరలు, రిలయన్స్ ఏజీఎం వంటి కీలక పరిణామాలు నిర్దేశిస్తాయని నిపుణులు అంచనా వేస్తున్నారు