పవన్ కళ్యాణ్ ను కొండగట్టు అంజన్న తో పోల్చిన నిరంజన్ తండ్రి

Pawan Kalyan : జనసేన అధినేత పవన్ కళ్యాణ్ తన మానవీయ కోణాన్ని చాటుకుంటూ హనుమకొండలో అరుదైన వ్యాధితో బాధపడుతున్న తన వీరాభిమాని నిరంజన్‌ను నేరుగా కలిసి పరామర్శించారు. నిరంజన్ ఆరోగ్యం గురించి అడిగి తెలుసుకున్న పవన్, ఆ బాలుడిని ఎంతో ఆప్యాయంగా దగ్గరకు తీసుకుని మాట్లాడి, గుండె నిండా ధైర్యాన్ని నింపారు.

ఈ అత్యంత భావోద్వేగభరితమైన పరామర్శకు సంబంధించిన వీడియోను జనసేన పార్టీ ‘హార్ట్ వార్మింగ్ మూమెంట్స్’ (Heart warming moments) పేరిట సోషల్ మీడియా వేదికగా పంచుకుంది. ఈ భేటీలో పవన్ కళ్యాణ్ కేవలం ఒక నాయకుడిలా కాకుండా, తమ కుటుంబ సభ్యుడిలా కలిసిపోవడంతో అక్కడున్న వారంతా తీవ్ర భావోద్వేగానికి లోనయ్యారు.

బాధితుడికి ఉన్నత స్థాయి వైద్య సహాయం అందించడంతో పాటు, ఆ కుటుంబం ఆర్థికంగా నిలదొక్కుకునేందుకు తగిన ఉపాధి అవకాశాలు కల్పిస్తామని జనసేనాని ఈ సందర్భంగా గట్టి భరోసా ఇచ్చారు. Read Also : రాజకీయాల్లోకి మంత్రి పొంగులేటి అల్లుడు ? అత్యంత క్లిష్ట పరిస్థితుల్లో ఉన్న తమను వెతుక్కుంటూ వచ్చి పవన్ కళ్యాణ్ కొండంత అండగా నిలవడంపై నిరంజన్ తండ్రి ఆనందబాష్పాలు రాల్చారు.

తమ కష్టాలను తీర్చడానికి సాక్షాత్తూ కొండగట్టు అంజన్నే (ఆంజనేయ స్వామి) పవన్ కళ్యాణ్ రూపంలో తమ ఇంటికి నడచివచ్చినట్లు అనిపిస్తోందంటూ ఆయన అత్యంత భావోద్వేగంగా మాట్లాడారు. పవన్ కళ్యాణ్‌కు కొండగట్టు అంజన్న ఆలయంతో ఉన్న ఆధ్యాత్మిక అనుబంధం, ఆయన తన ప్రచార రథం ‘వారాహి’కి అక్కడే పూజలు నిర్వహించిన సంగతి తెలిసిందే.

ఈ నేపథ్యంలో, తమను ఆదుకోవడానికి వచ్చిన పవన్‌ను ఆ కొండగట్టు దేవుడితో పోల్చుతూ ఆ తండ్రి పలికిన కృతజ్ఞతా పూర్వక మాటలు సోషల్ మీడియాలో నెటిజన్లను సైతం కదిలిస్తున్నాయి. ఆపదలో ఉన్న అభిమాని కుటుంబానికి పవన్ అందించిన ఈ మానవీయ సాయంపై సర్వత్రా ప్రశంసలు వ్యక్తమవుతున్నాయి.