దేశంలో టెలిగ్రామ్ యాప్ దుర్వినియోగంపై ఢిల్లీ హైకోర్టుకు కేంద్రం అఫిడవిట్

టెలిగ్రామ్ ఒక సరికొత్త 'డార్క్ వెబ్'లా రూపాంతరం చెందిందని, నేరస్థులు, సైబర్ మోసగాళ్లు, తీవ్రవాద గ్రూపులు చట్టం నుంచి తప్పించుకోవడానికి దీనిని విరివిగా ఉపయోగిస్తున్నారని కేంద్రం ఆందోళన వ్యక్తం చేసింది. ఈ మేరకు ఢిల్లీ హైకోర్టులో ఒక అఫిడవిట్‌ను దాఖలు చేసింది.

లీకైన పరీక్ష పత్రాలు - ప్రశ్నార్థకమైన భవిష్యత్తు: NEET వంటి ప్రతిష్టాత్మక పరీక్షల ప్రశ్నపత్రాల లీకేజీ, పంపిణీకి టెలిగ్రామ్ ఛానళ్లు వేదికగా మారాయని ప్రభుత్వం పేర్కొంది. ఇది దేశంలోని లక్షలాది మంది విద్యార్థుల భవిష్యత్తును ప్రమాదంలో పడేస్తోందని తెలిపింది.

సైబర్ నేరాలు, డేటా లీకులు: నేషనల్ సైబర్ క్రైమ్ రిపోర్టింగ్ పోర్టల్ డేటా ప్రకారం, టెలిగ్రామ్ వేదికగా జరుగుతున్న సైబర్ మోసాలపై ఫిర్యాదులు భారీగా పెరిగాయి. హ్యాకర్లు, సైబర్ నేరగాళ్లు దొంగిలించిన డేటాను విక్రయించడానికి, మనీ లాండరింగ్ కోసం 'మ్యూల్ బ్యాంక్ ఖాతాల'ను కొనుగోలు చేయడానికి ఈ ప్లాట్‌ఫారమ్‌ను వాడుతున్నారు.

చిన్నారులపై లైంగిక వేధింపుల కంటెంట్ (CSEAM): టెలిగ్రామ్‌లో అత్యంత ఆందోళనకరమైన అంశం చిన్నారుల లైంగిక వేధింపులకు సంబంధించిన కంటెంట్ (Child Sexual Exploitative and Abuse Material) వ్యాప్తి చెందుతోందని కేంద్రం తెలిపింది. భద్రతా సంస్థలకు ఇది పెద్ద సవాలుగా మారిందని పేర్కొంది.

తీవ్రవాద ప్రచారం - శాంతిభద్రతలకు విఘాతం: ఉగ్రవాద సంస్థలు, తీవ్రవాద గ్రూపులు తమ భావజాలాన్ని ప్రచారం చేయడానికి, తప్పుడు సమాచారాన్ని వ్యాప్తి చేయడం ద్వారా పౌర సమాజంలో అశాంతిని రేకెత్తించడానికి టెలిగ్రామ్ గ్రూపులను వాడుకుంటున్నాయని చెప్పింది. మాల్వేర్, కమాండ్ అండ్ కంట్రోల్ హబ్: కొన్ని ప్రమాదకరమైన ఆండ్రాయిడ్ అప్లికేషన్లు బాధితుల డేటాను దొంగిలించడానికి టెలిగ్రామ్‌ను కమాండ్-అండ్-కంట్రల్ ప్లాట్‌ ఫామ్‌గా వాడుకుంటున్నాయి.