అఫ్గానిస్థాన్ చిత్తు... మూడు మ్యాచ్ ల సిరీస్ భారత్ కైవసం

కెప్టెన్ శుభ్‌మన్ గిల్ (154), ఇషాన్ కిషన్ (125) రికార్డు శతకాలతో విరుచుకుపడటంతో టీమిండియా ఘనవిజయం సాధించింది. లక్నో వేదికగా అఫ్గానిస్థాన్‌తో జరిగిన రెండో వన్డేలో భారత్ 170 పరుగుల భారీ తేడాతో విజేతగా నిలిచింది. ఈ గెలుపుతో మూడు మ్యాచ్‌ల సిరీస్‌ను మరో మ్యాచ్ మిగిలి ఉండగానే 2-0తో భారత్ కైవసం చేసుకుంది.

వన్డే కెప్టెన్‌గా శుభ్‌మన్ గిల్‌కు ఇదే తొలి సిరీస్ విజయం కావడం విశేషం.టాస్ గెలిచిన అఫ్గానిస్థాన్ తొలుత బౌలింగ్ ఎంచుకుంది. మొదట బ్యాటింగ్ చేసిన భారత్, గిల్, కిషన్‌ల వీరవిహారంతో నిర్ణీత ఓవర్లలో 402 పరుగుల భారీ స్కోరును నమోదు చేసింది.

ఆరంభంలో 9 పరుగులకే ఒక వికెట్ కోల్పోయినప్పటికీ, రెండో వికెట్‌కు గిల్, కిషన్ భారీ భాగస్వామ్యాన్ని నెలకొల్పారు. ఒకే ఓవర్‌లో వీరిద్దరూ సెంచరీలు పూర్తి చేసుకుని ప్రేక్షకులను ఉర్రూతలూగించారు. గిల్ 110 బంతుల్లో 154 పరుగులు చేయగా, కిషన్ కేవలం 79 బంతుల్లోనే 125 పరుగులు సాధించాడు.అనంతరం 403 పరుగుల భారీ లక్ష్యంతో బరిలోకి దిగిన అఫ్గానిస్థాన్ 45వ ఓవర్లో 232 పరుగులకే ఆలౌట్ అయింది.

అఫ్గాన్ బ్యాటర్లలో రహ్మత్ షా (79) ఒంటరి పోరాటం చేసినప్పటికీ, మిగిలిన వారు విఫలమయ్యారు. భారత బౌలర్లు క్రమం తప్పకుండా వికెట్లు పడగొట్టి జట్టుకు ఘన విజయాన్ని అందించారు. అఫ్గాన్ బౌలర్లలో నంగేయాలియా ఖరోటే 4 వికెట్లు పడగొట్టాడు.

ఈ సిరీస్‌లో చివరిదైన మూడో వన్డే చెన్నై వేదికగా జరగనుంది