యూఎస్-ఇరాన్ శాంతి ఒప్పందం.. దూసుకుపోయిన సెన్సెక్స్

అమెరికా, ఇరాన్ దేశాల మధ్య శాంతి ఒప్పందం కుదిరిందన్న వార్తల నేపథ్యంలో సోమవారం భారత స్టాక్ మార్కెట్లు భారీ లాభాలతో ముగిశాయి. అంతర్జాతీయంగా సానుకూల సంకేతాలు వెలువడటంతో మదుపరులు కొనుగోళ్ల వైపు మొగ్గు చూపారు. ఫలితంగా బీఎస్ఈ సెన్సెక్స్ 736 పాయింట్లు (0.97 శాతం) మేర ఎగబాకగా, ఎన్‌ఎస్‌ఈ నిఫ్టీ సైతం గణనీయమైన లాభాలను నమోదు చేసింది.గత నాలుగు నెలలుగా కొనసాగుతున్న అమెరికా-ఇరాన్ ఉద్రిక్తతలు సద్దుమణిగే సూచనలు కనిపిస్తుండటంతో అంతర్జాతీయ మార్కెట్లో ముడిచమురు ధరలు ఒక్కసారిగా తగ్గుముఖం పట్టాయి.

చమురు రవాణాకు అత్యంత కీలకమైన హర్మూజ్ జలసంధిని తిరిగి ప్రారంభించేందుకు, ఇరాన్ నౌకాశ్రయాలపై ఉన్న ఆంక్షలను ఎత్తివేసేందుకు ఇరు దేశాల మధ్య ప్రాథమిక అవగాహన కుదిరినట్లు వార్తలు వచ్చాయి.ఇరాన్‌తో ఒప్పందం ఖరారైందని అమెరికా అధ్యక్షుడు డొనాల్డ్ ట్రంప్ సామాజిక మాధ్యమాల వేదికగా వెల్లడించారు. ఇంధన దిగుమతులపై అధికంగా ఆధారపడే భారత్ వంటి దేశాలకు ఈ పరిణామం పెద్ద ఊరటనిచ్చే అంశం.

చమురు ధరలు తగ్గుదల వల్ల ద్రవ్యోల్బణం అదుపులోకి వచ్చి, తద్వారా దేశ ఆర్థిక వృద్ధికి దోహదపడుతుందని మార్కెట్ విశ్లేషకులు అభిప్రాయపడుతున్నారు.ఈ శాంతి ఒప్పందంపై స్విట్జర్లాండ్‌లో శుక్రవారం అధికారికంగా సంతకాలు జరగనున్నాయి. అయితే, ఇరాన్ అణు కార్యక్రమం వంటి కీలక అంశాలపై రానున్న 60 రోజుల్లో తదుపరి చర్చలు కొనసాగనున్నాయి.

కాగా, ఈ ఒప్పందంలోని కొన్ని నిబంధనలను ఇజ్రాయెల్ వ్యతిరేకించడం గమనార్హం. ఏదేమైనప్పటికీ, పశ్చిమాసియాలో ఉద్రిక్తతలు తగ్గడం ప్రపంచ ఆర్థిక విపణికి సానుకూల పరిణామంగా మారింది