లక్నో-ఢిల్లీ ఇండిగో విమానానికి బాంబు బెదిరింపు... టాయిలెట్ లో నోట్

లక్నో నుంచి ఢిల్లీ బయలుదేరాల్సిన ఇండిగో విమానంలో శుక్రవారం ఉదయం బాంబు బెదిరింపు కలకలం సృష్టించింది. విమానం టేకాఫ్‌కు సిద్ధమవుతున్న తరుణంలో, విమానంలోని టాయిలెట్‌లో ఒక టిష్యూ పేపర్‌పై 'బాంబ్' అని రాసి ఉండటాన్ని సిబ్బంది గమనించారు. దీంతో అప్రమత్తమైన అధికారులు తక్షణమే విమానాన్ని నిలిపివేశారు.లక్నోలోని చౌదరి చరణ్ సింగ్ అంతర్జాతీయ విమానాశ్రయం నుంచి ఉదయం 10:45 గంటలకు ఈ విమానం ఢిల్లీకి బయలుదేరాల్సి ఉంది. సుమారు 180 మంది ప్రయాణికులతో టేకాఫ్‌కు సిద్ధమవుతున్న సమయంలో ఈ ఘటన వెలుగుచూసింది. భద్రతా నిబంధనల (ప్రోటోకాల్) ప్రకారం విమానాన్ని వెంటనే ఐసోలేషన్ బేకు తరలించారు. ప్రయాణికులను సురక్షితంగా కిందకు దించి, బాంబ్ స్క్వాడ్, స్నిఫర్ డాగ్స్‌ సహాయంతో విమానాన్ని, ప్రయాణికుల లగేజీని క్షుణ్ణంగా తనిఖీ చేశారు.గంటల తరబడి నిర్వహించిన సోదాల్లో ఎటువంటి పేలుడు పదార్థాలు లేదా అనుమానాస్పద వస్తువులు లభించలేదని అధికారులు వెల్లడించారు. అది కేవలం నకిలీ బెదిరింపు మాత్రమేనని నిర్ధారించారు. ఈ ఘటనపై ఇండిగో ఎయిర్‌లైన్స్ ఒక అధికారిక ప్రకటన విడుదల చేసింది. "లక్నో-ఢిల్లీ విమానంలో భద్రతాపరమైన ముప్పును గుర్తించిన వెంటనే నియంత్రణ అధికారులకు సమాచారం అందించాం. ప్రయాణికుల భద్రతే మాకు అత్యంత ప్రాధాన్యత. ప్రయాణికులకు అవసరమైన సదుపాయాలను కల్పిస్తున్నాం" అని సంస్థ పేర్కొంది.ఈ ఆకస్మిక ఘటనతో ప్రయాణికులు గంటల పాటు తీవ్ర ఇబ్బందులకు గురయ్యారు. చివరకు అది ఉత్తుత్తి బెదిరింపు మాత్రమేనని తేలడంతో అందరూ ఊపిరి పీల్చుకున్నారు. అయితే, టాయిలెట్‌లో 'బాంబ్' అని రాసిన వ్యక్తిని గుర్తించేందుకు అధికారులు సమగ్ర దర్యాప్తు చేపట్టారు.