జైలర్ 2లో బాలీవుడ్ గ్రీక్ గాడ్ స్పెషల్ క్యామియో

గ్రీక్ గాడ్ హృతిక్ రోషన్ ఒక పవర్‌ఫుల్ క్యామియో చేయబోతున్నారట. కేవలం అతిథి పాత్రలా వచ్చి వెళ్ళిపోయేలా కాకుండా, కథలో ఎంతో ప్రాధాన్యత ఉన్న రోల్ అని సమాచారం. సినిమా కథను ఒక కీలకమైన మలుపు తిప్పే సందర్భంలో హృతిక్ క్యారెక్టర్ ఎంట్రీ ఇస్తుందని సమాచారం. టైగర్ ముత్తూవేల్ పాండియన్ కథను ముందుకు తీసుకెళ్లే క్రమంలో హృతిక్ పాత్ర ఉండబోతుంది. ఈ ఇద్దరు సూపర్ స్టార్స్ కలిసే సన్నివేశాలను మేకర్స్ అత్యంత భారీ స్థాయిలో గ్రాండ్‌గా విజువలైజ్ చేయడానికి ప్లాన్ చేస్తున్నారు.

జూన్ మూడో వారంలో, ముఖ్యంగా జూన్ 22, 23 తేదీల్లో చెన్నైలో ఈ కీలక షెడ్యూల్ షూటింగ్ జరగనున్నట్లు ఇండస్ట్రీ టాక్. ఈ షూటింగ్‌లో పాల్గొనడానికి ముందే హృతిక్ రోషన్‌పై లుక్ టెస్ట్‌లు నిర్వహించనున్నారు. ఈ సినిమాలో హృతిక్‌ను మునుపెన్నడూ చూడని ఒక కంప్లీట్ డిఫరెంట్ లుక్‌లో చూపించబోతున్నారట. అలాగే ఈ రోల్ ఫుల్ యాక్షన్ ప్యాక్డ్‌గా, హై-వోల్టేజ్ రేంజ్‌లో ఉండబోతుందని తెలుస్తోంది. ఇదిలా ఉండగా దాదాపు 40 సంవత్సరాల తర్వాత రజనీకాంత్, హృతిక్ రోషన్ ఒకే స్క్రీన్‌పై కనిపించబోతున్నారు. గతంలో 1986లో వచ్చిన ‘భగవాన్ దాదా’ అనే హిందీ సినిమాలో హృతిక్ బాలనటుడిగా రజనీకాంత్‌తో కలిసి నటించారు. మళ్లీ ఇన్నాళ్లకు ‘జైలర్ 2’ ద్వారా ఈ ఇద్దరు స్టార్స్ కలవబోతుండడం విశేషం. సన్ పిక్చర్స్ నిర్మిస్తున్న ఈ భారీ చిత్రంలో మోహన్ లాల్, శివరాజ్ కుమార్, విజయ్ సేతుపతి, మిథున్ చక్రవర్తి వంటి స్టార్స్ కూడా భాగం కానుండడంతో సినిమాపై అంచనాలు స్కై హైకి చేరాయి.