హైదరాబాద్ వాసులకు అలర్ట్.. నేడు ఈ ప్రాంతాల్లో తాగునీటి సరఫరా నిలిపివేత

పైప్‌లైన్‌లో రుద్రారం వద్ద పెద్ద లీకేజీ రావడంతో, ఈరోజు జూన్ 12, శుక్రవారం నాడు హైదరాబాద్‌లోని పలు ప్రాంతాల్లో నీటి సరఫరా నిలిపివేస్తున్నట్లు వాటర్‌ బోర్డ్‌ అధికారులు తెలిపారు.

రుద్రారంలోని మంజీరా ఫేస్ 2 వాటర్ సప్లై సిస్టమ్ ప్రధాన పైప్‌లైన్‌లో లీకేజీ తలెత్తడం వల్ల ఈ నిర్ణయం తీసుకున్నట్లు హైదరాబాద్ మెట్రోపాలిటన్ వాటర్ సప్లై అండ్ సివరేజీ బోర్డు వెల్లడించింది.

ఈ లీకేజీని మరమ్మతు చేయడానికి ఈరోజు నీటి సరఫరాను నిలిపివేస్తున్నారు. దీనివల్ల నగరంలోని కొన్ని ముఖ్యమైన ప్రాంతాలపై ప్రభావం పడనుంది. ఈ ప్రాంతాల్లో ఈరోజు నీటి సరఫరా ఉండబోదు.

ముఖ్యంగా ఈరోజు ఆర్‌సీ పురం, అశోక్ నగర్, జ్యోతి నగర్, లింగంపల్లి, చందానగర్, గంగారం, మదినగూడ, మియాపూర్ ప్రాంతాల్లో నీటి సరఫరా ఉండదు. కావున ఈ ప్రాంతాల నివాసితులు తగిన జాగ్రత్తలు తీసుకోవాలని సూచించారు.

దీనితో పాటు బీరంగూడ, అమీన్ పూర్, ఎర్రగడ్డ, ఎస్ఆర్ నగర్, అమీర్‌పేట్, భాగ్యనగర్ కాలనీ, కేబిహెచ్‌బి కాలనీ, కూకట్‌పల్లి, ప్రగతి నగర్ ప్రాంతాల్లో కూడా జూన్ 12న నీటి సరఫరా నిలిపివేత ఉంటుంది.

ఈ పరిస్థితిని దృష్టిలో ఉంచుకుని హైదరాబాద్ మెట్రోపాలిటన్ వాటర్ సప్లై అండ్ సివరేజీ బోర్డు నివాసితులకు అలర్ట్ జారీ చేసింది. నీటిని పొదుపుగా వాడుకోవాలని కోరుతూనే, మరమ్మతు పనులు పూర్తయిన వెంటనే తిరిగి యథావిధిగా నీటి సరఫరాను పునరుద్ధరిస్తామని బోర్డు తెలిపింది.