దండించడమే కాదు కష్టపడే కొడుకు భుజం తట్టి ప్రోత్సహించే తండ్రినిరా.. సాగర్ కి ఇచ్చిపడేసిన రామరాజు

తీసుకుని రావడానికి ఏం చేశారే మీరూ? అని నర్మద, ప్రేమల్ని అడుగుతుంది వేదవతి. ఏం చెప్తాం అంటూ భాగ్యం, ఇడ్లీలు ఎంట్రీ ఇచ్చి తెగ జీవించేస్తారు. ఇడ్లీకి చట్నీ సాక్ష్యంలాగా.. అక్కడ జరిగిన యాక్షన్ సీన్‌కి మేమే సాక్ష్యం అని అంటారు. ప్రేమ, నర్మదల వీరోచిత పోరాటాన్ని కళ్లకి కట్టినట్టుగా సినిమా చూపించినట్టుగా మేం చెప్తాం.. చిన్నల్లుడు ఎలాంటి నేరం చేయలేదని సాక్ష్యాధారాల కోసం ప్రేమ, నర్మదలు ఓ చిన్న సైజ్ యుద్దమే చేశారంటూ.. అక్కడ జరిగిన యాక్షన్ సీన్‌ని కళ్లకి కడతారు. ఆ రౌడీ గాడ్ని వెంటాడి వేటాడి పట్టుకుంటారు. కానీ వాడు ప్రేమని పక్కకితోసేసి.. పారిపోతుంటాడు. దాంతో ప్రేమ.. మళ్లీ పైకి లేచి.. ఓ పెద్ద కర్రని తీసుకుని చితకబాదేస్తుంది. కిందపడ్డవాడ్ని పైకి లేపి మరీ.. చెంపలు వాయించేస్తుంది ప్రేమ. డెలివరీ బాయ్‌ని అని.. మామిడిపండ్లు టైమ్‌కి డెలివరీ చేయకపోతే.. జాబ్ పోతుందని చెప్తే జాలిపడి కారు ఎక్కించుకుంటే.. మా ఆయన్నే కేసులో ఇరికిస్తావా? అంటూ ఆ రౌడీ గాడ్ని కుమ్మిపారేస్తుంది ప్రేమ. అదంతా పూసగుచ్చినట్టుగా చెప్తారు భాగ్యం ఇడ్లీలు. అది విన్న వేదవతి.. శ్రీరామా శ్రీరామా ప్రాణాలకు తెగించి అంత పెద్ద రిస్క్ చేశారా? అని అంటుంది. ‘మేం కరాటే నేర్చుకున్నాం అత్తయ్యా.. ఇలాంటి ఫైటింగ్‌లు మాకు పెద్ద రిస్క్ ఏం కాదులే అని అంటుంది నర్మద. వామ్మో కరాటే నేర్చుకున్నారా? అయితే మీతో జాగ్రత్తగా ఉండాలి సుమీ.. అంటే అన్నానని అంటారు కానీ.. పోయినసారి మన ముగ్గురం వెళ్లి ఫైటింగ్ సీన్ చేశాం కదా.. మరి ఇప్పుడు నన్నెందుకు పిలవలేదూ అని అంటుంది వేదవతి. యుద్దానికి వెళ్తూ ముసలి వాళ్లని తీసుకుని వెళ్తారా? అని పంచ్‌లు వేస్తుంది నర్మద. ఇదిగో వయసు గురించి మాట్లాడితే అస్సలు బాగోదు.. అని వేదవతి అంటే.. అవునులే ముసలి వాళ్లు స్పీడ్‌గా పరిగెత్తలేరు కదా అని సెటైర్లు వేస్తుంది. ఇక అంతా నవ్వుకుంటూ ఉంటే.. శ్రీవల్లి మాత్రం రగిలిపోతూ ఉంటుంది. ఇంతలో రామరాజు.. ‘చిన్నోడికి బెయిల్ రాదని లాయర్ గారు చెప్పినప్పుడు చాలా టెన్షన్ పడ్డాను. ప్రేమ, నర్మదలు లేకపోతే చిన్నోడు జైలుకి వెళ్లేవాడు’ అని అంటాడు. దాంతో వేదవతి.. ప్రేమ, నర్మదలను దగ్గరకు తీసుకుని నా కోడళ్లు బంగారం అని అంటుంది. అది చూసి శ్రీవల్లి కడుపు మండిపోతుంది. ఇదిగో పిన్నిగారూ.. క్రెడిట్ మొత్తం వాళ్లకే ఇచ్చేయండి.. మా అత్తా, మామయ్యలు కూడా పోరాడారు అని అంటుంది సుకన్య. ఔనౌను.. మీరు రావడం వల్లే ఇంత లేటు అయ్యింది.. లేదంటే ధీరజ్ ఎప్పుడో ఇంటికి వచ్చేసేవాడు అంటూ గాలి తీసేస్తుంది నర్మద. ఇంతలో కరెక్ట్ టైమ్‌కి వేరు కాపురం సాగర్ వస్తాడు. అతన్ని చూసి.. ‘రేయ్ నడిపోడా.. నీ తమ్ముడి కోసం స్టేషన్‌కి కూడా రాలేదు.. అంటే నాపై నీకు కోపం పోలేదా? అని అడుగుతాడు ధీరజ్. ‘నాకు ఎవరిపైనా కోపం లేదు.. నాపై నాకే జాలిగా ఉంది’ అని అంటాడు సాగర్. అదేంట్రా అలా అంటావ్ అని ధీరజ్ అంటే.. ‘లేకపోతే ఏంట్రా.. నువ్వు అరెస్ట్ కాగానే.. ఇదిగో ఈ పెద్ద మనిషి.. పోలీస్ స్టేషన్ దగ్గర పడిగాపులు కాచారు. దగ్గరుండి పోలీస్ స్టేషన్ నుంచి విడిపించారు. అదే నీ ప్లేస్‌లో నేను ఉంటే.. ఏరా పరువుని తగలేశావ్.. నన్ను పోలీస్ స్టేషన్ మెట్లు ఎక్కిస్తావా? అని నన్ను మెడపట్టి బయటకు గెంటేసేవారు’ అని అంటాడు సాగర్. ఆ మాటతో నర్మద.. ‘ఏంటి సాగర్ బుద్దిలేకుండా’ అని రొటీన్ డైలాగ్ కొడుతుంది. బుద్దిలేకపోవడం ఏంటి? నిజమే కదా.. నా జాబ్ విషయంలో నానా హంగామా చేశారు.. నేను జాబ్ కొనుక్కున్నానని చేయకూడని నేరం చేశానని ఇప్పటికీ నిందిస్తూనే ఉన్నారు. కానీ వీడు మాత్రం అంత పెద్ద నేరం చేసినా కూడా వాడ్ని ఒక్క మాట కూడా అనలేదు. వాడంటే అంత నమ్మకం.. నేనంటే అంత అపనమ్మకం. వీడ్ని అర్థం చేసుకున్నట్టే నన్నూ అర్థం చేసుకోవాలి కదా.. అని అంటాడు సాగర్. ఆ మాటతో రామరాజు.. ‘బుజ్జమ్మా వాడికి చెప్పూ.. తప్పు చేసిన కొడుకుని దండించి దారిపెట్టడంతో పాటు.. కష్టపడే కొడుకు భుజం తట్టి భరోసాగా ఈ నాన్న నిలబడతాడని వాడికి చెప్పు’ అని ఇచ్చిపడేస్తాడు. అయితే సాగర్ మాత్రం అస్సలు తగ్గడు.. ‘మొన్నటి వరకూ నేను రైస్ మిల్లులో పడింది కష్టం కాదేమో.. నా భుజం కూడా తట్టొచ్చు కదా.. దానికి మాత్రం ఈగో అడ్డొచ్చేస్తుందే’ అని అంటాడు సాగర్. వీడేంట్రా ఇలా తయారయ్యాడని తలపట్టుకుంటాడు ధీరజ్. మొత్తానికి నేటి ఎపిసోడ్ అలా సాగిపోయింది.