వాట్సాప్, ఫేస్ బుక్, ఇన్ స్టా యూజర్లకు బిగ్ షాక్? ఇక ఇవి ఉచితం కాదు? నెలకు ఎంత

Facebook: టెక్ దిగ్గజం మెటా కీలక నిర్ణయం తీసుకుంది. ప్రకటనల ఆదాయంపై దీర్ఘకాలంగా ఆధారపడటాన్ని అధిగమించి, తమ ఆదాయ మార్గాలను విస్తరించుకునేందుకు టెక్ దిగ్గజం మెటా తన ప్రధాన యాప్‌ల కోసం పెయిడ్ సబ్‌స్క్రిప్షన్ ప్లాన్‌లను ప్రారంభించింది. నివేదికల ప్రకారం, ఇన్‌స్టాగ్రామ్ ప్లస్ , ఫేస్‌బుక్ ప్లస్ ధర నెలకు 3.99 డాలర్లు కాగా, వాట్సాప్ ప్లస్ ధర నెలకు 2.99 డాలర్లుగా ఉంటుంది.

మెటా ఎట్టకేలకు తన ప్రకటనల ఆధారిత వ్యాపార నమూనాని దాటి ముందుకు వస్తోంది. వాస్తవంగా చెప్పాలంటే ఇది ఆ కంపెనీకి ఒక పెద్ద మార్పు కావచ్చు. ఈ టెక్ దిగ్గజం తన అతిపెద్ద ప్లాట్‌ఫామ్స్ ఇన్‌స్టాగ్రామ్, ఫేస్‌బుక్, వాట్సాప్‌ల కోసం అధికారికంగా పెయిడ్ సబ్‌స్క్రిప్షన్ ప్లాన్‌లను ప్రవేశపెట్టింది. ప్రతి నెలా అదనంగా చెల్లించడానికి సిద్ధంగా ఉన్న వినియోగదారుల కోసం ప్రీమియం స్థాయి ఫీచర్లను జోడించింది.

మెటా ప్రొడక్ట్ హెడ్ నవోమి గ్లీట్ ఇన్‌స్టాగ్రామ్‌లో షేర్ చేసిన ఒక వీడియో ద్వారా ఈ ప్రకటన చేశారు. ఫేస్‌బుక్ ప్లస్, ఇన్‌స్టాగ్రామ్ ప్లస్, వాట్సాప్ ప్లస్‌ల ప్రారంభాన్ని ధృవీకరించడంతో పాటు, భవిష్యత్తులో ముఖ్యంగా క్రియేటర్లు, వ్యాపారాలు, ఏఐ-ఆధారిత సాధనాల కోసం మెటా మరిన్ని సబ్‌స్క్రిప్షన్-ఆధారిత ఉత్పత్తులను ప్లాన్ చేస్తోందని కూడా ఆమె సూచించారు.

నివేదికల ప్రకారం ఇన్‌స్టాగ్రామ్ ప్లస్, ఫేస్‌బుక్ ప్లస్‌లకు నెలకు 3.99 డాలర్లు ఖర్చవుతుంది. ఇది భారత్ లో సుమారుగా నెలకు 340 రూపాయలకి సమానం. అదే సమయంలో వాట్సాప్ ప్లస్ ధర నెలకు 2.99 డాలర్లు. ఇండియాలో ఇది సుమారుగా 255 రూపాయలకి సమానం. అయితే, దీని అర్థం సాధారణ యాప్స్ త్వరలో మాయం అవుతాయని కాదు. ఉచిత వెర్షన్స్ కొనసాగుతాయి. ఈ కొత్త చెల్లింపు ప్లాన్స్, మరికొంత నియంత్రణ, విస్తృతి కోరుకునే వినియోగదారుల కోసం అదనపు ఫీచర్లు, ప్రీమియం సాధనాలను అన్‌లాక్ చేయడానికి ఉద్దేశించబడ్డాయి.

ఇన్‌స్టాగ్రామ్ ప్లస్, ఫేస్‌బుక్ ప్లస్ ద్వారా అధునాతన విశ్లేషణలు, స్టోరీ రీవాచ్ ఇన్‌సైట్స్, విస్తృత ప్రేక్షకుల చేరువ, ప్రొఫైల్ అనుకూల ఎంపికలతో సహా అదనపు ఫీచర్లు లభిస్తాయి. WhatsApp Plus ప్రీమియం స్టిక్కర్లు, కస్టమ్ రింగ్‌టోన్లు, యాప్ థీమ్‌లతో సహా పర్సనలైజేషన్ పై దృష్టి పెడుతుంది.

ఆర్టిఫిషియల్ ఇంటెలిజెన్స్ మౌలిక సదుపాయాలపై భారీగా ఖర్చు చేస్తున్నందుకు మెటాపై ఒత్తిడి పెరుగుతోంది. ఈ తరుణంలో ఈ చర్య తీసుకుంది.ఈ ఏడాది, ప్రధానంగా ఏఐ డేటా సెంటర్లు, సంబంధిత సాంకేతికత కోసం, కంపెనీ 125 బిలియన్ డాలర్ల నుండి 145 బిలియన్ డాలర్ల వరకు భారీ వ్యయాన్ని అంచనా వేసింది. సాంప్రదాయ ప్రకటనలకు మించి ఆదాయాన్ని పెంచుకుంటూనే, ఈ భారీ ఖర్చులను మెటా ఎలా సమతుల్యం చేయాలని యోచిస్తుందో పెట్టుబడిదారులు నిశితంగా గమనిస్తున్నారు.

Also Read: ట్రంప్ కొత్త స్కీమ్.. పిల్లలకు 1000 డాలర్లు.. యాప్ రిలీజ్..