మొదటి రోజే 135.36 కోట్ల గ్రాస్ వసూలు

గ్లోబల్ స్టార్ రామ్ చరణ్, జాన్వీ కపూర్ జంటగా నటించిన స్పోర్ట్స్ యాక్షన్ డ్రామా చిత్రం పెద్ది. ఈ సినిమా మొదటి రోజే ప్రపంచవ్యాప్తంగా భారీ వసూళ్లను సాధించింది. తొలిరోజే ఈ చిత్రం ఏకంగా 135.36 కోట్ల రూపాయల గ్రాస్ వసూలు చేసినట్టు పెద్ది టీం ఆఫీసియల్గా వెల్లడించింది.రామ్ చరణ్ కెరీర్‌లో ఆర్ఆర్ఆర్ తర్వాత ఈ స్థాయి ఓపెనింగ్స్ రావడం ఇదే మొదటిసారి. తెలుగు సినీ పరిశ్రమలో మొదటి రోజే 100 కోట్ల క్లబ్‌లో చేరిన 11వ చిత్రంగా పెద్ది నిలిచింది. ఈ విజయంతో పెద్ది బాక్సాఫీస్ కలెక్షన్లు సరికొత్త రికార్డుల దిశగా దూసుకుపోతున్నాయి. దర్శకుడు బుచ్చిబాబు సన రూపొందించిన ఈ చిత్రంపై మొదటి నుంచి అంచనాలు భారీగా ఉన్నాయి. గేమ్ ఛేంజర్ తర్వాత రామ్ చరణ్ నటించిన సినిమా కావడంతో అభిమానులు థియేటర్లకు క్యూ కట్టారు. శివ రాజ్‌కుమార్, జగపతి బాబు, బోమన్ ఇరానీ, దివ్యేందు వంటి ప్రముఖ నటులు ఈ చిత్రంలో కీలక పాత్రలు పోషించారు. సినిమాలోని యాక్షన్ ఘట్టాలు, నటీనటుల ప్రదర్శన ప్రేక్షకులను ఎంతగానో ఆకట్టుకున్నాయి. దీంతో మొదటి రోజు నుంచే థియేటర్ల వద్ద పండుగ వాతావరణం నెలకొంది. ఈ సినిమా కథనం మరియు సాగుతున్న విధానంపై కొన్ని మిశ్రమ సమీక్షలు వ్యక్తమయ్యాయి. ఫలితంగా సినిమా వేగంపై కొంతమంది విమర్శకులు భిన్నాభిప్రాయాలు వ్యక్తం చేసినప్పటికీ, సాధారణ ప్రేక్షకులు మాత్రం బ్రహ్మాండమైన ఆదరణ అందిస్తున్నారు. రామ్ చరణ్ మాస్ కంబ్యాక్ మూవీగా ఈ చిత్రాన్ని అభిమానులు ఎంజాయ్ చేస్తున్నారు. సినిమాకు వస్తున్న వసూళ్ల వేగాన్ని చూసి ట్రేడ్ వర్గాలు మొదటి వీకెండ్ పై భారీ అంచనాలు వేస్తున్నాయి. మొదటి వారాంతం ముగిసే సమయానికి పెద్ది బాక్సాఫీస్ కలెక్షన్లు 250 నుంచి 300 కోట్ల రూపాయలకు చేరుకుంటాయని అంచనా వేస్తున్నారు. రామ్ చరణ్ కు ఉన్న క్రేజ్, వీకెండ్ అడ్వాంటేజ్ ఈ చిత్రానికి మరింతగా కలిసిరానున్నాయి. రాబోయే రోజుల్లో ఈ సినిమా మరిన్ని కలెక్షన్ల రికార్డులను తిరగరాయడం ఖాయంగా కనిపిస్తోంది.