News
న్యాయమూర్తుల నియామకాలపై ఘర్షణ లేదు
Eenadu
దిల్లీ: సుప్రీం కోర్టు, హైకోర్టుల న్యాయమూర్తుల నియామకాల విషయంలో న్యాయ వ్యవస్థ, కార్యనిర్వాహక వ్యవస్థల మధ్య ఎలాంటి ఘర్షణ వాతావరణం లేదని కేంద్ర న్యాయశాఖ మంత్రి అర్జున్రాం మేఘ్వాల్ స్పష్టం చేశారు.
దిల్లీ: సుప్రీం కోర్టు, హైకోర్టుల న్యాయమూర్తుల నియామకాల విషయంలో న్యాయ వ్యవస్థ, కార్యనిర్వాహక వ్యవస్థల మధ్య ఎలాంటి ఘర్షణ వాతావరణం లేదని కేంద్ర న్యాయశాఖ మంత్రి అర్జున్రాం మేఘ్వాల్ స్పష్టం చేశారు. న్యాయ వ్యవస్థలో ఖాళీల భర్తీకి చక్కటి సంప్రదింపుల ప్రక్రియ కొనసాగుతోందని తెలిపారు. ఆదివారం ఆయన పీటీఐతో మాట్లాడారు. న్యాయమూర్తుల నియామకాలకు సంబంధించి వివిధ దేశాలు అనుసరిస్తున్న విధానాలను కేంద్ర ప్రభుత్వం పరిశీలిస్తున్నట్లు చెప్పారు. అయితే ఈ అధ్యయనానికి ఎలాంటి అధికారిక కమిటీని ఏర్పాటు చేయలేదని, అనధికారికంగానే దీన్ని చేపట్టినట్లు వివరించారు. అందులో వెల్లడయ్యే అంశాల గురించి ఎదురు చూస్తున్నట్లు చెప్పారు. కొలీజియం విధానానికి ప్రత్యామ్నాయాన్ని తీసుకొస్తారా అన్న ప్రశ్నకు ఆయన ఇలా స్పందించారు. న్యాయమూర్తుల నియామకాల్లో కొన్నిసార్లు కేంద్రం ప్రతిపాదించిన పేర్లను సుప్రీం కోర్టు కొలీజియం తిరస్కరించిన సందర్భాలున్నాయని, అదే విధంగా కొలీజియం ప్రతిపాదించిన పేర్లను కేంద్రం తిరస్కరించిందని గుర్తు చేశారు. ఆ జాబితాల్లోని వ్యక్తుల నేపథ్య చరిత్ర సక్రమంగా లేకపోవడంలాంటివి అందుకు కారణాలు కావొచ్చన్నారు. కొలీజియం వ్యవస్థను రద్దు చేస్తూ దాని స్థానంలో ప్రత్యేక కమిటీని ఏర్పాటు చేసేందుకు వీలు కల్పించే బిల్లును గతంలో పార్లమెంటు ఆమోదించింది. అయితే సుప్రీం కోర్టు దాన్ని కొట్టివేసిన సంగతి తెలిసిందే. న్యాయ వ్యవస్థల్లో 5 కోట్లకుపైగా కేసులు పెండింగ్లో ఉండటంపై మేఘ్వాల్ స్పందిస్తూ.. వాటి పరిష్కారానికి తమ ప్రభుత్వం ప్రత్యామ్నాయ యంత్రాంగంపై దృష్టి సారిస్తున్నట్లు చెప్పారు.
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
For digital advertisements Contact : 040 - 23318181 eMail: marketing@eenadu.in
© 1999 - 2026 Ushodaya Enterprises Pvt.Ltd,All rights reserved.
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.
This website follows the DNPA Code of Ethics.