మార్కులు సేమ్ .. ఒకే ర్యాంకు ఎందుకివ్వరు? సీఎంను ప్రశ్నించిన బాలిక

ఇంటర్నెట్‌ డెస్క్‌: బోర్డు పరీక్షల్లో సమాన మార్కులు వచ్చినప్పుడు.. వయసు ఆధారంగా ర్యాంకులను కేటాయించడంపై పంజాబ్‌ ముఖ్యమంత్రి భగవంత్‌ మాన్‌ (Bhagwant Mann)ను ఓ విద్యార్థిని ప్రశ్నించింది. ప్రభుత్వ విధానం సరిగా లేదని అభిప్రాయపడింది. ఇందుకు బదులిచ్చిన సీఎం.. వెంటనే ఆయా విద్యార్థులకు మొదటి స్థానం కేటాయించాలని అధికారులను ఆదేశించారు.

పంజాబ్‌ స్టేట్‌ బోర్డులో 8, 10, 12వ తరగతుల్లో అత్యుత్తమ ప్రతిభ కనబరిచిన విద్యార్థులను సత్కరించేందుకు ‘సితారే జమీన్‌ తే’ పేరుతో రాష్ట్ర ప్రభుత్వం ఆదివారం ఓ కార్యక్రమాన్ని ఏర్పాటు చేసింది. ఇందులో భాగంగా విద్యార్థులతో ముఖ్యమంత్రి ముఖాముఖి నిర్వహించారు. ఈ క్రమంలో అమృత్‌సర్‌కు చెందిన ఓ విద్యార్థిని లేచి నిలబడి.. ‘‘మేమందరం ఒకే తరగతిలో చదువుకుంటాం. అందరం కష్టపడతాం. టీచర్లు కూడా అంతే కృషి చేస్తారు. కానీ, వయసు ఆధారంగా మొదటి, రెండు, మూడు స్థానాలు ఎందుకు ప్రకటిస్తారు? అని ఆ బాలిక ప్రశ్నించడంతో సభాప్రాంగణం చప్పట్లతో మారుమోగింది.

OnMark పోర్టల్‌.. లోపాలు పరిశీలిస్తున్నాం : సీబీఎస్‌ఈ

ఇందుకు సీఎం స్పందిస్తూ.. మా దృష్టిలో మీ ముగ్గురిది తొలి స్థానమేనని బదులిచ్చారు. అంతేకాదు.. సమాన మార్కులు సాధించిన ముగ్గురు విద్యార్థులకు సంయుక్తంగా తొలి ర్యాంకు ఇవ్వాలని అధికారులను ఆదేశించారు. వయసు ఆధారంగా కాకుండా మార్కుల ఆధారంగానే స్థానాలు కేటాయించాలని స్పష్టం చేశారు. అనంతరం విద్యార్థులందరితో కలిసి సీఎం ఫొటో తీసుకున్నారు. అదే వేదికపై ఉన్న దిల్లీ మాజీ డిప్యూటీ సీఎం మనీశ్‌ సిసోదియా మాట్లాడుతూ.. ‘మీ విధానం తప్పు’ అని ముఖ్యమంత్రికి ఓ విద్యార్థిని చెప్పడాన్ని చూసి సంతోషిస్తున్నానని అన్నారు.

ఇదిలాఉంటే, పంజాబ్‌ ప్రభుత్వ విద్యా విధానం ప్రకారం.. బోర్డు పరీక్షల్లో ముగ్గురు విద్యార్థులు సమానంగా మార్కులు సాధిస్తే.. వారిలో అతి చిన్న వయసు గల విద్యార్థికి మొదటి ర్యాంకు కేటాయిస్తారు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

For digital advertisements Contact : 040 - 23318181 eMail: marketing@eenadu.in

© 1999 - 2026 Ushodaya Enterprises Pvt.Ltd,All rights reserved.

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.

This website follows the DNPA Code of Ethics.