జేసన్ సంజయ్ నిర్ణయంపై సందీప్ ఇంట్రెస్టింగ్ కామెంట్స్

సందీప్ కిషన్(Sundeep Kishan) ప్రధాన పాత్రలో తెరకెక్కిన ఈ సినిమా జూలై 31న ప్రపంచవ్యాప్తంగా ప్రేక్షకుల ముందుకు రానుంది. టీజర్ రిలీజైనప్ప‌టి నుంచే సినిమాపై మంచి ఆసక్తి నెలకొంది. సోషల్ మీడియాలో టీజర్‌కు వచ్చిన రెస్పాన్స్ తో పాటు, జేసన్ సంజయ్ తొలి దర్శకత్వ ప్రయత్నం కావడం కూడా ఈ ప్రాజెక్ట్‌పై అంచనాలను మరింత పెంచింది. రిలీజ్ టైమ్ దగ్గరపడుతున్న నేపథ్యంలో చిత్రబృందం ప్రచార కార్యక్రమాలను వేగవంతం చేసింది.

ప్రమోషన్స్‌లో భాగంగా సందీప్ కిషన్ చేసిన కామెంట్స్ ప్రస్తుతం సినీ వర్గాలు, సోషల్ మీడియాలో చర్చనీయాంశంగా మారాయి. జేసన్ సంజయ్‌కు హీరోగా ఎంట్రీ ఇవ్వడానికి అన్ని అవకాశాలు ఉన్నప్పటికీ, నటుడిగా కాకుండా డైరెక్ట‌ర్ గా తన ప్రయాణాన్ని ప్రారంభించడం ధైర్యమైన నిర్ణయమని ఆయన పేర్కొన్నారు. సరైన ప్రణాళికతో తెరకెక్కిన ఈ సినిమా జేసన్ ఆలోచనా విధానాన్ని ప్రతిబింబిస్తుందని, డైరెక్ట‌ర్ గా అతని విజన్ సినిమాకు ప్రధాన బలమని సందీప్ అభిప్రాయపడ్డారు. అలాగే థియేటర్లలో ఈ సినిమాను చూసేందుకు ప్రేక్షకుల్లో మంచి ఆసక్తి కనిపిస్తోందని చెప్పారు.

అయితే సందీప్ కామెంట్స్ పై సోషల్ మీడియాలో భిన్నాభిప్రాయాలు వ్యక్తమవుతున్నాయి. కొందరు జేసన్ సంజయ్ హీరోగా వచ్చినా భారీ ఆరంభం దక్కేదని భావిస్తుండగా, మరికొందరు కేవలం ఫ్యామిలీ బ్యాక్‌గ్రౌండ్ లేదా మొద‌టి అవకాశంతోనే కెరీర్ నిర్మించలేమని అభిప్రాయపడుతున్నారు. ప్రతిభ, కథల ఎంపిక, ప్రేక్షకుల ఆదరణే భవిష్యత్‌ను నిర్ణయిస్తాయని వారు అంటున్నారు. ఈ నేపథ్యంలో జేసన్ సంజయ్ డైరెక్ట‌ర్ గా తొలి ప్రయత్నం ఎంతవరకు ఆకట్టుకుంటుందో, సిగ్మా బాక్సాఫీస్ వద్ద ఎలాంటి ఫలితాన్ని అందుకుంటుందో ఆసక్తిగా ఎదురుచూస్తున్నారు.