Apnrt News

ఆస్ట్రేలియాలోని ప్రవాస తెలుగువారి సంక్షేమమే లక్ష్యంగా ఆంధ్రప్రదేశ్ నాన్-రెసిడెంట్ తెలుగు సొసైటీ (APNRT) కీలక అడుగు వేసింది. మెల్‌బోర్న్‌లోని భారత కాన్సులేట్ కార్యాలయంలో సోమవారం కాన్సుల్ జనరల్ శ్రీ అనీష్ రాజన్‌తో APNRT నూతన సమన్వయకర్తలు, ప్రతినిధులు మర్యాదపూర్వకంగా సమావేశమయ్యారు. ఆస్ట్రేలియాలో తెలుగువారు ఎదుర్కొంటున్న సమస్యల పరిష్కారానికి, వారికి మెరుగైన సేవలు అందించేందుకు ఈ భేటీ జరిగింది.దాదాపు గంటన్నర పాటు సాగిన ఈ సమావేశంలో, ఆస్ట్రేలియాలోని తెలుగు ప్రవాసులు ఎదుర్కొంటున్న పలు కీలక సమస్యలపై సమగ్రంగా చర్చించారు. ముఖ్యంగా ప్రమాదాలు, ఆసుపత్రి అత్యవసరాలు, మరణాలు, పాస్‌పోర్ట్ సంబంధిత సమస్యలు, ఇతర కుటుంబ అత్యవసర పరిస్థితుల్లో తక్షణ సహాయం అందించేందుకు కాన్సులేట్‌తో బలమైన సమన్వయం అవసరమని APNRT ప్రతినిధులు నొక్కిచెప్పారు. కమ్యూనిటీ గ్రీవెన్స్‌లను అధికారుల దృష్టికి తీసుకెళ్లే విధానంపై కూడా చర్చించారు. ఈ సమస్యలను వివరిస్తూ వారు కాన్సుల్ జనరల్‌కు ఒక వినతిపత్రాన్ని అందజేసి, ఆయన్ను ఘనంగా సత్కరించారు.ఆంధ్రప్రదేశ్ ప్రభుత్వం, భారత కాన్సులేట్, ప్రవాస తెలుగువారి మధ్య APNRT ఒక వారధిగా పనిచేస్తుందని ప్రతినిధులు ఈ సందర్భంగా స్పష్టం చేశారు. ప్రవాసులకు ఎదురయ్యే సమస్యలకు సరైన మార్గదర్శనం చేస్తూ, ప్రభుత్వ వ్యవస్థలతో సమర్థవంతంగా అనుసంధానం చేయడమే తమ ప్రధాన ధ్యేయమని వివరించారు. ప్రవాస తెలుగు సమాజం అభ్యున్నతి కోసం భవిష్యత్తులోనూ కాన్సులేట్‌తో కలిసి మరింత సమన్వయంతో పనిచేస్తామని వారు తమ నిబద్ధతను తెలియజేశారు

అమెరికాలోనూ, ఇతర దేశాల్లో ఉన్న తెలుగువారి సంక్షేమంకోసం ఆంధ్రప్రదేశ్ ప్రభుత్వం ఏర్పాటు చేసిన ఆంధ్రప్రదేశ్ నాన్-రెసిడెంట్ తెలుగు సొసైటీ (ఎపిఎన్నార్టీ) అమెరికా సౌత్ ఈస్ట్ కోఆర్డినేటర్‌గా శ్రీ మల్లినేని టాగూర్ నియమితులయ్యారు. ఈ మేరకు ఆ సంస్థ అధికారిక నియామకపత్రాన్నిజారీ చేసింది. లూసియానా, ఫ్లోరిడా, జార్జియా, నార్త్ కరొలినా, సౌత్ కరొలినా, అలబామా, కెంటకీ, మిసిసిపీ మరియు టెన్నెస్సీ రాష్ట్రాల్లో నివసిస్తున్న తెలుగు ఎన్నారైల సంక్షేమం కోసం ఆయన కృషి చేయనున్నారు. ఎన్నారైలు ఎదుర్కొంటున్న వివిధ సమస్యల పరిష్కారానికి, ఇతర వ్యవహారాల్లో ఇండియన్ ఎంబసీ మరియు స్థానిక అధికారులతో సమన్వయం చేసుకుంటూ ఆయన సేవలందించనున్నారు. కాగా తనకు ఈ పదవిని అప్పగించడం పట్ల మల్లినేని టాగూర్ ముఖ్యమంత్రి చంద్రబాబు నాయుడుకు, ఎపి ఎన్నార్టీఎస్ అధ్యక్షులు డాక్టర్ రవికుమార్ వేమూరుకి, ఎన్నారై వ్యవహారాల శాఖ మంత్రి శ్రీ కొండపల్లి శ్రీనివాస్ గారికీ ప్రత్యేక ధన్యవాదాలు తెలియజేశారు. అమెరికాలోని సౌత్ ఈస్ట్ లో ఉన్న తెలుగు వారికి అందుబాటులో ఉంటూ సంస్థ అభివృద్ధికి, ప్రవాసాంధ్రుల సంక్షేమానికి శక్తివంచన లేకుండా కృషి చేస్తానని ఈ సందర్భంగా ఆయన పేర్కొన్నారు. ఆయనకు ఈ పదవి లభించడం పట్ల పలువురు సంతోషం వ్యక్తం చేశారు. మల్లినేని టాగూర్ తానా ఫౌండేషన్ ట్రస్టీగా కూడా వ్యవహరిస్తున్న సంగతి తెలిసిందే. తానా ద్వారా గతంలో ఆయన జన్మభూమిలో పలు సహాయ కార్యక్రమాలను చేశారు

యునైటెడ్ అరబ్ ఎమిరేట్స్ (యూఏఈ)లోని ప్రవాసాంధ్రుల కోసం ఆంధ్రప్రదేశ్ ప్రభుత్వం కీలక నియామకం చేపట్టింది. శ్రీపొట్టి శ్రీరాములు జిల్లాకు చెందిన ఎన్నారై దారపనేని ప్రసాద్‌ను యూఏఈలో ఆంధ్రప్రదేశ్‌ నాన్ రెసిడెంట్ తెలుగు సొసైటీ (ఏపీఎన్ఆర్టీఎస్) కంట్రీ కోఆర్డినేటర్‌గా నియమించింది. ఈ మేరకు రాష్ట్ర ప్రభుత్వం మంగళవారం ఉత్తర్వులు జారీ చేసింది. దుత్తలూరు మండలం తిమ్మాపురం గ్రామానికి చెందిన ప్రసాద్, ఇకపై యూఏఈలోని ప్రవాసాంధ్రుల సంక్షేమం కోసం సేవలందించనున్నారు.ఈ నూతన బాధ్యతల్లో భాగంగా, యూఏఈలో నివసిస్తున్న తెలుగు వారి సంక్షేమ వ్యవహారాలను ప్రసాద్ పర్యవేక్షించనున్నారు. ప్రవాసాంధ్రుల సమస్యలు, ఫిర్యాదుల పరిష్కారంలో చొరవ చూపుతూ వారికి అవసరమైన సహాయ సహకారాలు అందిస్తారు. ఏపీఎన్ఆర్టీఎస్, భారత రాయబార కార్యాలయం, యూఏఈలోని స్థానిక అధికారులతో సమన్వయం చేసుకుంటూ పనిచేసే బాధ్యతలను ప్రభుత్వం ఆయనకు అప్పగించింది.ఈ నియామకం ద్వారా యూఏఈలోని ప్రవాసాంధ్రులకు ప్రభుత్వపరమైన సేవలు, సహాయం మరింత వేగంగా అందుతాయని అధికార యంత్రాంగం భావిస్తోంది