రివ్యూ: మండాడి (Mandaadi)

తారాగణం: సూరి, సుహాస్, మహిమా నంబియార్, సత్యరాజ్, రవీంద్ర విజయ్, మిథున్ జై శంకర్ దర్శకుడు: మదిమారన్ పుగళేంధి సంగీతం: జి.వి. ప్రకాష్ కుమార్ ఛాయాగ్రహణం: ఎస్.ఆర్. కదిర్ నిర్మాణ సంస్థ: ఆర్ఎస్ ఇన్ఫోటైన్‌మెంట్ తీర ప్రాంతంలో పెరిగిన కాళి (సూరి)కి పడవ నడపడంలో మంచి నైపుణ్యం ఉంటుంది. చిన్నప్పటి నుంచి సముద్రంతో అనుబంధం ఉన్న అతను తెరచాప పడవ పోటీల్లో తన ప్రతిభను చూపిస్తాడు. కానీ కొన్ని అనుకోని పరిస్థితుల కారణంగా అతను తన ఊరిని, తనకు ఇష్టమైన ఆ క్రీడను వదిలి వెళ్లాల్సి వస్తుంది. కొన్నేళ్ల తర్వాత ఓ కీలక పరిస్థితి కారణంగా కాళి మళ్లీ తన స్వగ్రామానికి తిరిగి వస్తాడు. అక్కడ అతడికి పాత సంబంధాలు, పాత గొడవలు ఎదురవుతాయి. ముఖ్యంగా సట్టపులి (సుహాస్)తో ఉన్న విభేదాలు మళ్లీ బయటకు వస్తాయి. తన గతాన్ని ఎదుర్కొంటూ కాళి తిరిగి పడవ పోటీల్లోకి అడుగుపెడతాడు. అసలు అతను ఎందుకు ఊరు వదిలి వెళ్లాడు? సట్టపులికి కాళిపై ఉన్న కక్ష ఏంటి? వీరి మధ్య గొడవ ఎలా ముగిసింది? అన్నదే సినిమా కథ. ‘మండాడి’కి మొదటి ఆకర్షణ దాని నేపథ్యమే. సముద్రం, మత్స్యకారుల జీవితం, తెరచాప పడవ పోటీలు.. ఇవన్నీ తెరపై కొత్త అనుభూతిని ఇస్తాయి. సాధారణంగా మనం చూసే పగ కథకు ఇలాంటి ప్రపంచాన్ని జోడించడం దర్శకుడు మదిమారన్ చేసిన మంచి ప్రయత్నం. కానీ కొత్త నేపథ్యానికి సరిపోయేంత కొత్త కథనం మాత్రం కనిపించదు. హీరో ఊరు వదిలి వెళ్లడానికి కారణం, అతని గతం చుట్టూ నడిచే డ్రామాను ఆసక్తిగా చూపించే ప్రయత్నం చేశారు. ఫ్లాష్ బ్యాక్ మొదలయ్యే వరకు సినిమా నెమ్మదిగా సాగినా.. ఆ తర్వాత కథలో కొంత ఊపు వస్తుంది. సూరి పోషించిన కాళి పాత్ర సినిమాకు ప్రధాన బలం. తీర ప్రాంతానికి చెందిన వ్యక్తిగా అతని శరీర భాష, మాట తీరు, నటన సహజంగా అనిపిస్తాయి. ముఖ్యంగా భావోద్వేగ సన్నివేశాల్లో సూరి తన అనుభవాన్ని చూపించాడు. హీరో పాత్రలో అవసరమైన బలం, బాధ రెండింటినీ సమతుల్యంగా చూపించాడు. సుహాస్ ఈ సినిమాలో ప్రతినాయకుడిగా మరోసారి ఆకట్టుకున్నాడు. మొదటి నుంచి నెగెటివ్ ఛాయలు ఉన్న పాత్రలో కనిపిస్తూ, ఎలాంటి అతిశయోక్తి లేకుండా నటించాడు. అతని లుక్, బాడీ లాంగ్వేజ్ పాత్రకు సరిపోయాయి. అయితే పాత్రను మరింత బలంగా తీర్చిదిద్దే అవకాశం ఉన్నా.. ఒక దశ తర్వాత సాధారణ విలన్ పాత్రగానే మిగిలిపోతుంది. మహిమా నంబియార్‌కు కూడా మంచి పాత్ర దక్కింది. ఏంజెల్ చిలకమ్మ పాత్రలో ఆమె సహజంగా కనిపించింది. కొన్ని సన్నివేశాల్లో ఆమె నటన ఆకట్టుకున్నా.. ప్రేమకథకు సంబంధించిన భావోద్వేగం మాత్రం ప్రేక్షకుడికి పూర్తిగా కనెక్ట్ కాదు. సత్యరాజ్, రవీంద్ర విజయ్ తమ అనుభవంతో సినిమాకు బలం ఇచ్చారు. ఎక్కువ సేపు కనిపించకపోయినా తమ పాత్రలకు అవసరమైన ప్రభావాన్ని తీసుకొచ్చారు. సినిమాలో అసలు ఆసక్తి తెరచాప పడవ పోటీల దగ్గర మొదలవుతుంది. సముద్రంలో జరిగే ఈ పోటీలను తెరపైకి తీసుకొచ్చిన తీరు అభినందనీయం. ఈ సన్నివేశాల కోసం చిత్రబృందం పడిన కష్టం స్పష్టంగా కనిపిస్తుంది. అయితే ఇలాంటి నేపథ్యం నుంచి ప్రేక్షకుడు మరింత ఉత్కంఠను ఆశిస్తాడు. పోటీ సన్నివేశాలు బాగున్నప్పటికీ కట్టిపడేసే స్థాయికి చేరవు.