జ్యేష్ఠ శుద్ధ పౌర్ణమి పర్వదినాన్ని పురస్కరించుకుని ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర రైతాంగానికి హృదయపూర్వక ఏరువాక పున్నమి శుభాకాంక్షలు తెలియజేశారు. దేశానికి వెన్నెముకగా నిలిచిన అన్నదాతల సంక్షేమమే ధ్యేయంగా తమ ప్రభుత్వం అడుగులు వేస్తోందని ఆయన స్పష్టం చేశారు. ఈ పండుగ రోజున రైతుల ఇళ్లలో సుఖసంతోషాలు నిండాలని ఆకాంక్షించారు. రైతులు భూమిని, పశుసంపదను పూజించి ప్రకృతితో మమేకమయ్యే ఈ విశిష్ట పండుగ సాంప్రదాయాలకు ప్రతీక అని చంద్రబాబు పేర్కొన్నారు. పాడి పంటలతో ప్రతి ఒక్క రైతు ఇల్లు వెలుగులతో నిండాలని భగవంతుడిని ప్రార్థించినట్లు ఆయన వివరించారు. వ్యవసాయ రంగంలో ఎదురవుతున్న సవాళ్లను అధిగమించేలా రైతులు ముందడుగు వేయాలని కోరారు. తమ ప్రభుత్వం రైతుల శ్రేయస్సుకు ఎల్లప్పుడూ కట్టుబడి ఉంటుందని ముఖ్యమంత్రి చంద్రబాబు నాయుడు ఈ సందర్భంగా గట్టి భరోసా ఇచ్చారు. ఇందులో భాగంగానే 'అన్నదాత సుఖీభవ' పథకం కింద పీఎం కిసాన్ నిధులను రైతులకు సకాలంలో అందించామని ఆయన గుర్తు చేశారు. ఆర్థిక సాయం ద్వారా రైతులకు పెట్టుబడి కష్టాలు తీర్చడమే లక్ష్యమని చెప్పారు. ప్రస్తుత కాలంలో ఎల్ నినో వల్ల వస్తున్న వాతావరణ మార్పులు, సవాళ్లను రైతులు సమర్థవంతంగా ఎదుర్కోవాలని పిలుపునిచ్చారు. ప్రకృతి వైపరీత్యాల నుంచి పంటలను కాపాడుకుంటూ వ్యవసాయాన్ని లాభసాటిగా మార్చుకోవాల్సిన అవసరం ఎంతైనా ఉందని ఆయన అభిప్రాయపడ్డారు. ఇందుకోసం రైతులు తగిన ప్రణాళికలతో ముందుకు సాగాలన్నారు. రైతులలో వస్తున్న ఆధునిక ఆలోచనలకు అనుగుణంగా సేంద్రీయ వ్యవసాయం వైపు మొగ్గు చూపాలని ముఖ్యమంత్రి సూచించారు. కొత్త తరహా సాగు పద్ధతులను అలవర్చుకుంటూ, ఆధునిక సాంకేతికతను జోడించి పొలాల్లో సిరులు పండించాలని కోరారు. తక్కువ పెట్టుబడితో ఎక్కువ దిగుబడి సాధించే మార్గాలను ఎంచుకోవాలన్నారు