ఒక సక్సెస్ఫుల్ సినిమా తర్వాత వెంటనే కొత్త ప్రాజెక్టులను అనౌన్స్ చేయడం కంటే సరైన కథల కోసం ఎదురుచూడటమే తన ప్రాధాన్యమని నటి ఐశ్వర్యా రాజేష్(Aishwarya Rajesh) స్పష్టం చేశారు. తాజాగా ఆమె ఓ సినీ కార్యక్రమంలో మాట్లాడుతూ, కెరీర్కు సంబంధించిన పలు ఆసక్తికర విషయాలను పంచుకున్నారు. ముఖ్యంగా భారీ విజయాన్ని అందుకున్న తర్వాత ప్రేక్షకుల అంచనాలు మరింత పెరుగుతాయని, అలాంటి సమయంలో తీసుకునే ప్రతి నిర్ణయం ఎంతో కీలకమవుతుందని ఆమె అభిప్రాయపడ్డారు. అందుకే పాత్రల ఎంపిక విషయంలో తొందరపడకుండా, కథలో బలం మరియు పాత్రలో ప్రత్యేకత ఉన్న ప్రాజెక్టులకే ప్రాధాన్యం ఇస్తున్నట్లు వెల్లడించారు. గత కొంతకాలంగా తాను ఎక్కువగా మహిళా ప్రాధాన్యత కలిగిన సినిమాపై నటిస్తున్నాననే అభిప్రాయంపై కూడా ఆమె స్పందించారు. అలాంటి సినిమాలు వరుసగా చేయడం లేదని, గత రెండు సంవత్సరాల్లో పూర్తిస్థాయి ఫీమేల్ ఓరియెంటెడ్ ప్రాజెక్ట్ చేయలేదని పేర్కొన్నారు. మహిళా కేంద్రంగా సాగే చిత్రాల్లో ప్రధాన నటిపై బాధ్యతలు మరింత ఎక్కువగా ఉంటాయని ఆమె అభిప్రాయపడ్డారు. సినిమా సక్సెస్ అయినా, ఆశించిన ఫలితాన్ని అందుకోకపోయినా మొదటగా చర్చకు వచ్చే వ్యక్తి హీరోయిన్ కావడంతో అలాంటి కథలను ఎంపిక చేసేటప్పుడు మరింత జాగ్రత్త అవసరమని చెప్పారు. అదే సమయంలో తన వద్దకు వచ్చిన కొన్ని ఆసక్తికరమైన కథలను ఇప్పటికే ఎంపిక చేసుకున్నట్లు ఐశ్వర్యా వెల్లడించారు. ప్రస్తుతం రెండు నుంచి మూడు మహిళా ప్రధాన కథల్ని ఫైనల్ చేశానని, త్వరలో వాటికి సంబంధించిన అధికారిక ప్రకటనలు వచ్చే అవకాశం ఉందని సంకేతాలు ఇచ్చారు. మరోవైపు ప్రముఖ దర్శకుడు అనిల్ రావిపూడి(Anil Ravipudi)తో మరోసారి కలిసి పనిచేయాలనే తన ఆసక్తిని కూడా ఆమె వ్యక్తం చేయడం అభిమానుల్లో ఆసక్తిని పెంచుతోంది. మొత్తంగా చూస్తే, వేగం కంటే నాణ్యతకు ప్రాధాన్యం ఇస్తూ తన సినీ ప్రయాణాన్ని ఆచితూచి ముందుకు తీసుకెళ్లాలని ఐశ్వర్యా రాజేష్ నిర్ణయించుకున్నట్లు ఆమె వ్యాఖ్యలు స్పష్టంచేస్తున్నాయి