పుట్టినరోజు కానుక.. కొత్త రేషన్ కార్డుల పంపిణీకి సీఎం విజయ్ శ్రీకారం

తమిళనాడు ముఖ్యమంత్రి సి. జోసెఫ్ విజయ్ తన పుట్టినరోజు సందర్భంగా రాష్ట్రవ్యాప్తంగా నూతన రేషన్ కార్డుల పంపిణీ కార్యక్రమాన్ని ప్రారంభించనున్నారు. ప్రజా పంపిణీ వ్యవస్థను (PDS) మరింత బలోపేతం చేసి, అర్హులైన లబ్ధిదారులందరికీ ప్రయోజనం చేకూర్చాలనే లక్ష్యంతో జూన్ 22న ఆయన ఈ కార్యక్రమానికి శ్రీకారం చుట్టనున్నారు.పౌర సరఫరాల శాఖ వెల్లడించిన వివరాల ప్రకారం, మొదటి విడత పంపిణీ కోసం సుమారు 46 వేల నూతన రేషన్ కార్డులను ఇప్పటికే సిద్ధం చేశారు. పెండింగ్‌లో ఉన్న దరఖాస్తులను పరిష్కరించే క్రమంలో, అర్హత ధ్రువీకరించిన లబ్ధిదారులకు ఈ కార్డులను జారీ చేయనున్నారు. ఈ ఏడాది జనవరి నుంచి రాష్ట్రవ్యాప్తంగా కొత్త రేషన్ కార్డుల కోసం దాదాపు 2.25 లక్షల దరఖాస్తులు అందినట్లు అధికారులు తెలిపారు. ప్రస్తుతం దరఖాస్తుల పరిశీలన ప్రక్రియ కొనసాగుతోందని, తదుపరి దశల్లో మిగిలిన కార్డులను పంపిణీ చేస్తామని ఒక సీనియర్ అధికారి వెల్లడించారు.ఈ కార్యక్రమాన్ని ముఖ్యమంత్రి విజయ్ తన అసెంబ్లీ నియోజకవర్గమైన పెరంబూర్‌లో లాంఛనంగా ప్రారంభించే అవకాశం ఉంది. అక్కడ ఎంపిక చేసిన కొంతమంది లబ్ధిదారులకు ఆయన స్వయంగా కార్డులను అందజేయనున్నారు. ఈ సందర్భంగా విజయ్ నేతృత్వంలోని అధికార పార్టీ 'తమిళగ వెట్రి కళగం' (TVK) రాష్ట్రవ్యాప్తంగా పలు సేవా కార్యక్రమాలను కూడా నిర్వహిస్తోంది