Rajamouli | దర్శకధీరుడు ఎస్.ఎస్. రాజమౌళి సినిమా అంటేనే భారీ స్థాయి, అద్భుతమైన విజువల్స్, అత్యంత కచ్చితమైన ప్రణాళిక గుర్తొస్తాయి. ఆయన దర్శకత్వంలో ఒక సినిమా మొదలైందంటే.. ఆ ప్రాజెక్ట్ పూర్తయ్యే వరకు హీరోలు, హీరోయిన్లు ఇతర సినిమాలకు పెద్దగా సమయం కేటాయించలేరనే అభిప్రాయం ఇండస్ట్రీలో ఉంది. ప్రభాస్, జూనియర్ ఎన్టీఆర్, రామ్ చరణ్ వంటి స్టార్ హీరోలు రాజమౌళి సినిమాల కోసం ఏళ్ల తరబడి కాల్షీట్లు కేటాయించిన విషయం తెలిసిందే. అయితే ఇప్పుడు మహేష్ బాబుతో రాజమౌళి తెరకెక్కిస్తున్న ప్రతిష్టాత్మక చిత్రం ‘వారణాసి’ విషయంలో మాత్రం ఓ స్టార్ నటుడు ఈ సంప్రదాయానికి భిన్నంగా వ్యవహరించాకరు. మలయాళ స్టార్ హీరో, దర్శకుడు పృథ్విరాజ్ సుకుమారన్ ఏకంగా తొమ్మిది ప్రాజెక్టులను పూర్తి చేస్తూనే ‘వారణాసి’లో తన పాత్రను కూడా విజయవంతంగా ముగించారనే వార్త ప్రస్తుతం సినీ వర్గాల్లో ఆసక్తిని రేకెత్తిస్తోంది. మహేష్ బాబు ప్రధాన పాత్రలో నటిస్తున్న ‘వారణాసి’ని రాజమౌళి అత్యంత భారీ స్థాయిలో తెరకెక్కిస్తున్నారు. పురాణ అంశాలు, విజ్ఞాన కల్పితం, కాల ప్రయాణం, సాహసంతో కూడిన కథాంశంతో ఈ చిత్రం రూపొందుతున్నట్లు ఇప్పటికే ప్రచారం జరుగుతోంది. ఈ సినిమాలో పృథ్విరాజ్ సుకుమారన్ ‘కుంభ’ అనే కీలక ప్రతినాయకుడి పాత్రలో కనిపించనున్నట్లు సమాచారం. మహేష్ బాబుతో పాటు పృథ్విరాజ్ పాత్ర కూడా సినిమాకు ప్రధాన ఆకర్షణగా నిలిచే అవకాశాలు ఉన్నాయని తెలుస్తోంది. తాజా సమాచారం ప్రకారం ‘వారణాసి’లో పృథ్విరాజ్కు సంబంధించిన చిత్రీకరణ పూర్తయినట్లు సమాచారం. ఇదే ఇప్పుడు ఈ సినిమాకు సంబంధించిన కీలకమైన తాజా అప్డేట్గా మారింది. సాధారణంగా రాజమౌళి సినిమాల్లో నటించే నటీనటులు ఆయన ప్రాజెక్ట్ కోసం తమ ఇతర కమిట్మెంట్లను పక్కన పెట్టాల్సి వస్తుంది. కానీ పృథ్విరాజ్ మాత్రం అందుకు భిన్నంగా వ్యవహరించారు. ‘వారణాసి’ ప్రీ-ప్రొడక్షన్ దశ మొదలైనప్పటి నుంచి తన పాత్ర షూటింగ్ పూర్తయ్యే వరకు.. నటుడిగా, దర్శకుడిగా కలిపి ఏకంగా తొమ్మిది సినిమాలను పూర్తి చేసినట్లు సినీ వర్గాల్లో ప్రచారం జరుగుతోంది. ఒకవైపు రాజమౌళి సినిమాకు అవసరమైన సమయాన్ని కేటాయిస్తూనే.. మరోవైపు తన ఇతర ప్రాజెక్టులను కూడా ప్రణాళిక ప్రకారం పూర్తి చేయడం పృథ్విరాజ్ పనితీరుకు నిదర్శనంగా చెప్పుకుంటున్నారు. ముఖ్యంగా నటుడిగా మాత్రమే కాకుండా దర్శకుడిగానూ బాధ్యతలు నిర్వహిస్తూ ఇంతటి స్థాయిలో ప్రాజెక్టులను పూర్తి చేయడం ఇప్పుడు చర్చనీయాంశంగా మారింది.
