నాని 'ది ప్యారడైజ్' సినిమాకు హైక్స్ ప్లస్సా..? మైనస్సా..?

సినిమా కంటెంట్ బాగుంటే థియేటర్లకు క్యూ కట్టడానికి ప్రేక్షకులు సిద్ధంగా ఉన్నారు. కానీ టికెట్ రేట్ల విషయంలో ఏదైనా తేడా జరిగితే, తిప్పి కొట్టడానికి అంతే కఠినంగా ఉంటారు. గతంలో టాక్సిక్ లాంటి పెద్ద సినిమాను కూడా కనీసం పట్టించుకోలేదు. అలాంటిది ఇప్పుడు నాని నటించిన ది పారడైజ్ సినిమా విషయంలో రేట్ల పెంపు మళ్ళీ తెరపైకి వచ్చింది. ఈ హైక్స్ సినిమాకు ప్లస్సా, మైనస్సా అనేది చర్చనీయాంశంగా మారింది.టాక్సిక్ సినిమా రేట్లు పెంచినప్పుడే చాలా సమస్యలు తలెత్తాయి. అది తెలుగు సినిమా కాకపోయినా, డబ్బింగ్ సినిమాకు రేట్ల పెంపు ఏంటని చాలా మంది ప్రశ్నించారు. ప్రేక్షకులను రేట్ల పేరుతో భయపెడితే అసలు సినిమాకే నష్టం వాటిల్లుతుంది. ఈ హైక్స్ విధానం మన పెద్ద సినిమాలనే దెబ్బకొట్టింది. అందుకే రేట్ల పెంపు అడిగే ముందు బాగా ఆలోచించాల్సిన అవసరం ఉంది. 2024లో శంకర్ వరప్రసాద్ సినిమాకు మాత్రమే హైక్స్ వర్కవుట్ అయ్యాయి. అది కూడా సంక్రాంతికి విడుదల కావడం, కుటుంబ ప్రేక్షకులు ఆదరించడం వల్లనే సాధ్యమైంది. లేదంటే పరిస్థితి మరోలా ఉండేది. గత ఏడాది సమ్మర్‌లో వచ్చిన పెద్ది, ఓజీ లాంటి సినిమాలకు కూడా టికెట్ హైక్స్ నష్టాన్నే కలిగించాయి.తాజాగా ది పారడైజ్ సినిమాకు టికెట్ హైక్స్ అడుగుతున్నారనే చర్చ మొదలైంది. తెలంగాణలో రూ. 100 కోట్లు దాటిన సినిమాకు పర్ఫెక్ట్ లెక్కలు చూపిస్తేనే 10 రోజుల పాటు టికెట్ రేట్లు పెంచుకునే సౌలభ్యం ఉంటుంది. అలా పెంచితే నైజాంలో ది పారడైజ్ మల్టీప్లెక్స్ రేటు రూ. 400 వరకు చేరుతుంది. ఆంధ్రప్రదేశ్‌లో అయితే ఈ నియమాలు ఏమీ లేవు. ఈ సమయంలో రేట్లు పెంచితే లేనిపోని తలనొప్పులు ఖాయం. ఈ విషయంలో నిర్మాతలు ఎలాంటి నిర్ణయం తీసుకోబోతున్నారో చూడాలి.