మందిని బలిగొన్న విషపర్వం

ఛత్తీస్‌గఢ్‌లోని బలౌదా బజార్ జిల్లా ఖార్వే గ్రామం... కేవలం వెయ్యి మంది జనాభాతో ప్రశాంతంగా సాగిపోయే చిన్న పల్లెటూరు. కానీ, గడిచిన ఐదు నెలలుగా ఆ ఊరి మట్టిలో ఏదో తెలియని భయం దాగుంది. ఫిబ్రవరిలో మొదలైన మరణాల పరంపర, మే నెల వరకు ఎనిమిది మందిని బలితీసుకుంది. మృతులంతా ఒకేలా, ఆకస్మికంగా కుప్పకూలిపోవడంతో.. గ్రామాన్ని ఎవరో కీడు ఆవహించిందని గ్రామస్థులు వణికిపోయారు. ఏకంగా పూజారులు వచ్చి శాంతి పూజలు చేసినా ఆ మృత్యు ఛాయలు తగ్గలేదు. అసలు అక్కడ ఏం జరుగుతోంది? అదృశ్య శక్తులా? లేక దైవ ఆగ్రహమా? అని అందరూ భీతావహులయ్యారు. కానీ, ఆ ఊరిని పట్టిపీడిస్తున్నది దైవ ఆగ్రహం కాదు.. కన్న ముందు నవ్వుతూ తిరిగే మనిషిలోని క్రూరమైన పగ!పోలీసుల దర్యాప్తులో వెలుగుచూసిన నిజం విని అందరూ నివ్వెరపోయారు. ఆ వరుస హత్యల వెనుక ఉన్నది మరెవరో కాదు, ఆ ఊరిలో కిరాణా దుకాణం నడుపుతూ అందరితో నవ్వుతూ మాట్లాడే రామ్‌సహాయ్ జైస్వాల్! స్వల్ప గొడవలు, వ్యక్తిగత పగలు, తనకు సమాజంలో దక్కాల్సిన గౌరవం దక్కడం లేదనే అక్కసు.. రామ్‌సహాయ్‌లో ఒక భయంకరమైన రాక్షసుడిని నిద్రలేపాయి. తనతో కలిసి మద్యం సేవించే అలవాటున్న ఎనిమిది మంది స్నేహితులను అతను ఎంచుకున్నాడు. ఏకంగా ఎలుకల మందులోని అత్యంత శక్తివంతమైన సుహాగాను గోవా బ్రాండ్ మద్యం సీసాలలో కలిపి, స్లో పాయిజన్లా వారికి ఇచ్చేవాడు. ఆ మద్యం తాగిన 15 నిమిషాలకే ప్రాణాలు గాలిలో కలిసిపోయేవి.మృతులంతా దాదాపు 50 ఏళ్లు పైబడిన వారు కావడంతో పాటు అందరికీ మద్యపాన అలవాటు ఉండటంతో, గుండెపోటు లేదా ఇతర సహజ అనారోగ్య కారణాల వల్ల వారు మరణించారని వైద్యులు, కుటుంబ సభ్యులు భావించారు. దీనిని ఆసరాగా చేసుకుని రామ్‌సహాయ్ తన పథకాన్ని సునాయాసంగా కొనసాగించాడు. స్వల్ప వ్యక్తిగత దూషణలు, చిన్నపాటి భూవివాదాలు, చివరికి సమాజంలో తనకు తగిన గౌరవం ఇవ్వడం లేదనే కోపమే ఈ వరుస హత్యలకు మూలమని తేలింది.మృతుల పరంపర.. గ్రామస్థుల భయాలుఈ కిరాతక క్రమం ఫిబ్రవరి 7న 58 ఏళ్ల బద్రీ పటేల్ మరణంతో ఆరంభమైంది. నిందితుడు రామ్‌సహాయ్‌తో కలిసి మద్యం సేవించి ఇంటికి వచ్చిన కొద్దిసేపటికే బద్రీ పటేల్ మంచంపై నిర్జీవంగా పడిపోయారు. ఆ సమయంలో వైద్యులు దీనిని గుండెపోటుగా ధ్రువీకరించారు. దాంతో ఎవరికీ అనుమానం రాలేదు. ఆ తర్వాత ఫిబ్రవరి 20న బుథాలు సాహు, మార్చి 2న మాజీ సర్పంచ్ ఛత్రురామ్ సాహు, మార్చి 12న బుధరామ్ జైస్వాల్ ఇలా ఒకరి తరువాత ఒకరు కన్నుమూశారు.వరుస చావులతో ఊరంతా ఏదో అరిష్టానికి గురైందని గ్రామస్థుల్లో ఆందోళన ప్రారంభమైంది. మార్చి 31న 38 ఏళ్ల వినోద్ సాహు నదికి స్నానానికి వెళ్లి తిరిగి వచ్చిన కొద్దిసేపటికే మరణించడంతో ఈ ఆందోళన తీవ్రమైంది. ఎంతో ఆరోగ్యంగా ఉండే యువకుడు వినోద్ మరణించడం వారిని తీవ్ర కలవరానికి గురిచేసింది. గ్రామానికి ఏదో పెద్ద కీడు సోకిందని భయపడి, ఏప్రిల్ నెలలో స్థానిక పూజారి జీవన విధానాల ప్రకారం భయాందోళనలు పోవడానికి రెండుసార్లు శాంతి పూజలు కూడా నిర్వహించారు. కళ్లు చెమర్చే నిజం: శిథిలాలు దాచిన ప్రాణం, 18 రోజుల మృత్యుంజయురాలు!అయినప్పటికీ మరణాల పరంపర ఆగలేదు. ఏప్రిల్ 28న గజానన్ మంఝీ, ఏప్రిల్ 30న చైతురామ్ సాహు మరణించారు. అయితే మే 14న మహేత్రు సాహు మరణం ఈ అనుమానాస్పద కేసులో అత్యంత కీలకమైన మలుపుగా నిలిచింది. పూర్తిగా ఆరోగ్యంగా ఉన్న మహేత్రు సాహు నది ఒడ్డున రామ్‌సహాయ్‌తో మాట్లాడటం, ఆ తర్వాత ఆయన ఇచ్చిన మద్యం తాగిన కొద్ది నిమిషాల్లోనే నది పక్కనే పడిపోవడం ఇతరులు గమనించారు.కార్తీక్ చూపిన క్లూ.. నిజం బయటపడిన వేళఇదే సమయంలో గ్రామానికి చెందిన 23 ఏళ్ల రోజువారీ కూలి కార్తీక్ కుంహార్ ఉదంతం గ్రామస్థులకు నూతన వాస్తవాలను అందించింది. ఒకరోజు మధ్యాహ్నం రామ్‌సహాయ్ తన స్నేహితుడు ప్రమోద్‌కు ఇచ్చిన మిగిలిన మద్యం సీసాని కార్తీక్ తాగాడు. తాగిన కేవలం 20 సెకన్లలోనే కార్తీక్ తీవ్రంగా వాంతులు చేసుకుని, స్పృహ కోల్పోయాడు. దాదాపు 5 గంటల తర్వాతే అతనికి స్పృహ వచ్చింది. సకాలంలో వైద్య సేవలు అందడం వల్ల కార్తీక్ బతికి బయటపడ్డాడు.ఈ విషయాన్ని కార్తీక్  బయటపెట్టడంతో, అందరూ ఒక్కసారిగా ఆలోచనలో పడ్డారు. మరణించిన వారంతా చనిపోవడానికి కొద్ది నిమిషాల ముందు రామ్‌సహాయ్‌తో కలిసే ఉన్నారనే బలమైన ఆధారాలను ఒకటిగా చేర్చి చూశారు. దీంతో గ్రామస్థులు జూన్ 6న రామ్‌సహాయ్‌పై పోలీసులకు రాతపూర్వక ఫిర్యాదు చేశారు. పోలీసులు రంగంలోకి దిగి లోతుగా దర్యాప్తు జరిపిన అనంతరం జూన్ 22న నిందితుడిని అదుపులోకి తీసుకుని, ఎనిమిది విడివిడి హత్య కేసులు నమోదు చేశారు.పోలీసుల దర్యాప్తులో షాకింగ్ విషయాలునిందితుడి మనస్తత్వాన్ని, అతని క్రూరమైన నేర ప్రవృత్తిని చూసి విచారణ అధికారులు సైతం ఆశ్చర్యపోయారు. రామ్‌సహాయ్‌కి అందరితో సరదాగా మాట్లాడుతూనే, మనసులో చిన్నపాటి గొడవలకు కూడా పగ ప్రతీకారాలు పెంచుకునే క్రూరమైన నైజం ఉందని తేలింది. తను గ్రామానికి ఎంతో చేశానని, పెద్ద ఎత్తున ఆలయాలు నిర్మించానని, అయినా తనకు తగినంత గౌరవం దక్కడం లేదనే తీవ్ర అసంతృప్తి అతనిలో ఉండేది. ఎవరైనా తనతో వాదనకు దిగితే వారిని నిర్ధాక్షిణ్యంగా విషమిచ్చి చంపడమే లక్ష్యంగా పెట్టుకున్నాడని పోలీసు అధికారులు వెల్లడించారు. రాయల్ వెడ్డింగ్ రాసిన మరణశాసనం! చౌదరి కోసం అగర్వాల్ ప్రాణం తీసి.. ఈ కేసులో శాస్త్రీయ ఆధారాల కోసం పోలీసులు మరణించిన వారి మృతదేహాలను వెలికితీసి, వాటి నుంచి నమూనాలు సేకరించి రీజనల్ ఫోరెన్సిక్ సైన్స్ లాబొరేటరీకి పంపించారు. నిందితుడు రామ్‌సహాయ్ వాడిన సుహాగా విషపూరిత మూలకాలు ఈ పరీక్షలలో స్పష్టంగా బయటపడతాయని దర్యాప్తు అధికారి కౌశల్ వాస్నిక్ తెలిపారు. ఈ దర్యాప్తుతో స్థానిక ప్రాథమిక ఆరోగ్య కేంద్రాల నిర్లక్ష్యం కూడా బహిర్గతమైంది, మొదట్లో వైద్యులు మరణాలను సహజమైనవిగా సర్టిఫై చేయడం గమనార్హం.ప్రస్తుతం ఖార్వే గ్రామంలో రామ్‌సహాయ్ నడిపిన ఆ కిరాణా దుకాణం ఇప్పుడు మూతపడింది.  నిందితుడి కుటుంబ సభ్యులు గ్రామాన్ని వదిలి వెళ్లిపోయారు.  కానీ, తమ మధ్యే ఉంటూ పగతో ప్రాణాలు తీసిన ఆ నమ్మక ద్రోహి జ్ఞాపకం ఆ గ్రామస్థులను ఇంకా వెంటాడుతూనే ఉంది.