నీళ్లలో కలిపి కాకుండా.. పెరుగులో చియా సీడ్స్ కలిపి తీసుకుంటే ఏమౌతుంది

పెరుగులో కలిపి చియా సీడ్స్ ని తీసుకోవడం వల్ల మరిన్ని ఎక్కువ ప్రయోజనాలు కలుగుతాయి. ముఖ్యంగా.. పెరుగులో ఉండ ప్రోబయోటిక్స్( మంచి బ్యాక్టీరియా), ప్రోటీన్ తో పాటు.. చియా సీడ్స్ లో ఉండే ఫైబర్, ఒమేగా 3 ఫ్యాటీ యాసిడ్స్ మనకు లభిస్తాయి.

పెరుగులోని ప్రోబయోటిక్స్ పేగు ఆరోగ్యాన్ని మెరుగుపరుస్తాయి. చియా సీడ్స్ లో అధికంగా ఉండే ఫైబర్ జీర్ణక్రియను మెరుగుపరుస్తుంది. ముఖ్యంగా మలబద్దకం సమస్యను తగ్గిస్తుంది.

చియా సీడ్స్ నీటిని పీల్చుకొని జెల్ లాంటి ఆకృతికి మారతాయి. పెరుగులో కలిపి తీసుకుంటే కూడా ఇలానే ఉబ్బుతాయి. ఇలా పెరుగులో కలిపి తీసుకుంటే.. ఎక్కువ సేపు కడుపు నిండుగా ఉన్న భావన కలుగుతుంది. బరువు తగ్గాలి అనుకునేవారికి ఇది బెస్ట్ ఛాయిస్. రోజూ ఇలా తీసుకుంటే.. ఈజీగా బరువు తగ్గడానికి సహాయం చేస్తుంది.

పెరుగులో ప్రోటీన్, కాల్షియం పుష్కలంగా ఉంటాయి. చియా సీడ్స్ లో కూడా కాల్షియం, మెగ్నీషియం, ఫాస్పరస్ వంటి ఖనిజాలను అందిస్తాయి. ఇవి ఎముకల ఆరోగ్యానికి సహాయపడతాయి.

చియా సీడ్స్ లో ఉండే ఒమేగా 3 ఫ్యాటీ యాసిడ్స్ గుండె ఆరోగ్యానికి మేలు చేస్తాయి. శరీరంలో చెడు కొలెస్ట్రాల్ తగ్గించడంలో కూడా సహాయపడతాయి.

చియా సీడ్స్ లో ఫైబర్ ఎక్కువగా ఉంటుంది. కాబట్టి.. ఆహారం నెమ్మదిగా జీర్ణమౌతుంది. దీంతో.. రక్తంలో షుగర్ లెవల్స్ ఒక్కసారిగా పెరగకుండా ఉండేందుకు సహాయపడతాయి.

ఒక కప్పు పెరుగులో 1 నుండి 2 టీస్పూన్ల చియా సీడ్స్ కలపండి.

కావాలంటే తేనె, పండ్ల ముక్కలు లేదా డ్రై ఫ్రూట్స్ కలిపి తినవచ్చు.

ఉదయం అల్పాహారంగా లేదా సాయంత్రం స్నాక్‌గా తీసుకోవచ్చు.

అయితే..మొదటిసారి తీసుకునేవారు తక్కువ మోతాదుతో ప్రారంభించాలి.చియా సీడ్స్ ఎక్కువగా తింటే కొందరికి గ్యాస్ లేదా కడుపు ఉబ్బరం రావచ్చు.తగినంత నీరు కూడా తాగాలి.