అఖిల్ కెరీర్ కు కీలకమైన లెనిన్’.. ఫైనల్ వెర్షన్ తర్వాత రీషూట్లు ఎందుకంటే

అక్కినేని అఖిల్(Akkineni Akhil) నటిస్తున్న లెనిన్(Lenin) సినిమా విడుదలకు ముందే మరోసారి చర్చనీయాంశంగా మారింది. ఇప్పటికే పలుమార్లు వాయిదా పడిన ఈ సినిమా తాజాగా జూలై 10న ప్రేక్షకుల ముందుకు రానుండగా, ఆలస్యానికి కారణం కేవలం ప్రీ ప్రొడ‌క్ష‌న్ వ‌ర్క్స్ మాత్రమే కాదనే ప్రచారం ఇండస్ట్రీలో వినిపిస్తోంది. సమాచారం ప్రకారం, ఫైనల్ వెర్షన్‌ను పరిశీలించిన తర్వాత మూవీ యూనిట్ కొన్ని కీలక భాగాలపై మరింత శ్రద్ధ పెట్టినట్లు తెలుస్తోంది. ప్రేక్షకులకు మెరుగైన అనుభూతి ఇవ్వాలనే ఉద్దేశంతో కొన్ని సీన్స్ ను రీషూట్ చేయ‌డ‌మే కాకుండా, ఇప్పటికే పూర్తైన ఒక పాటను కూడా కొత్తగా తెరకెక్కించినట్లు టాక్ నడుస్తోంది. ఇటీవల వరకు షూటింగ్ కార్యక్రమాలు కొనసాగినట్లు తెలుస్తుండటంతో, మేకర్స్ సినిమా అవుట్‌పుట్ విషయంలో ఎలాంటి రాజీ పడలేదని అర్థమవుతోంది.

అఖిల్ కెరీర్ పరంగా చూస్తే లెనిన్ అత్యంత కీలక ప్రాజెక్ట్‌గా నిలిచింది. గత సినిమాలు ఆశించిన స్థాయిలో విజయాన్ని అందుకోకపోవడంతో, ఈసారి సరైన హిట్ కోసం అభిమానులు ఆసక్తిగా ఎదురుచూస్తున్నారు. మరోవైపు వరుస వాయిదాలు, రీషూట్ల వార్తలు కొంత అనుమానాలకు దారితీసినా, అదే సమయంలో సినిమాపై ఉన్న అధిక అంచనాలను కూడా తగ్గించాయి.

ట్రేడ్ వర్గాల అభిప్రాయం ప్రకారం, తక్కువ అంచనాలతో థియేటర్లకు వచ్చే ప్రేక్షకులను కంటెంట్ ఆకట్టుకుంటే ఫలితం పూర్తిగా మారే అవకాశం ఉంది. దీంతో ఇప్పుడు అందరి దృష్టి జూలై 10పై నిలిచింది. లెనిన్ అఖిల్ కెరీర్‌కు కొత్త దిశ చూపుతుందా లేదా అన్నది విడుదల తర్వాతే తేలనుంది.