హర్మూజ్ జలసంధిని మళ్లీ మూసివేసిన ఇరాన్.. చమురు సరఫరాపై తీవ్ర ఆందోళన

ఈ నిర్ణయంతో అంతర్జాతీయ ఇంధన మార్కెట్లలో ఒక్కసారిగా ఆందోళన మొదలైంది. గత కొద్ది వారాల్లోనే ఇరాన్ ఇటువంటి చర్యకు పాల్పడటం ఇది రెండోసారి కావడం గమనార్హం.ఇటీవల కుదిరిన కాల్పుల విరమణ ఒప్పందాన్ని ఉల్లంఘించి, ఇజ్రాయెల్ లెబనాన్‌పై నిరంతర దాడులకు పాల్పడుతోందని ఇరాన్ ఆరోపించింది. శనివారం తెల్లవారుజాము నుంచి ఇజ్రాయెల్ జరిపిన దాడుల్లో సుమారు 16 నుంచి 32 మంది వరకు మరణించినట్లు లెబనాన్ మీడియా వర్గాలు వెల్లడించాయి. ఈ దాడులకు నిరసనగానే హర్మూజ్ జలసంధిపై తాము పూర్తి నియంత్రణను తిరిగి చేపట్టినట్లు ఇరాన్ సైనిక కమాండ్ స్పష్టం చేసింది.ప్రపంచవ్యాప్తంగా సరఫరా అయ్యే చమురులో ఐదో వంతు, అలాగే భారీ మొత్తంలో సహజవాయువు రవాణా ఈ జలసంధి గుండానే సాగుతుంది. ఇరాన్‌పై ఆంక్షలను సడలించి, స్విట్జర్లాండ్‌లో అణు చర్చలు నిర్వహించాలని నిర్ణయించిన తరుణంలో ఇరాన్ తీసుకున్న ఈ నిర్ణయం ఆ చర్చలకు ఆటంకం కలిగించేలా ఉంది. ఇరాన్ చర్య ఆమోదయోగ్యం కాదని వైట్‌హౌస్ వ్యాఖ్యానించింది. అయినప్పటికీ, దౌత్యపరమైన చర్చలను కొనసాగించేందుకు ప్రయత్నిస్తామని అమెరికా వెల్లడించింది.