తొలిసారి అరబిక్ చిత్రానికి ఏఆర్ రెహమాన్ సంగీతం.. విడుదలైన 'బాబ్' సౌండ్ ట్రాక్

ప్రముఖ దర్శకురాలు నైలా అల్ ఖాజా రూపొందించిన సైకలాజికల్ ఫాంటసీ-థ్రిల్లర్ ‘బాబ్’ కోసం రెహమాన్ స్వరపరిచిన ఒరిజినల్ సౌండ్‌ట్రాక్ శుక్రవారం విడుదలైంది.ఈ ఆల్బమ్‌లో మొత్తం 10 పాటలు ఉన్నాయి. రెహమాన్‌కు చెందిన కేఎమ్ మ్యూజిక్ లేబుల్‌పై విడుదలైన ఈ సౌండ్‌ట్రాక్‌ను డివో సంస్థ ప్రపంచవ్యాప్తంగా పంపిణీ చేస్తోంది. అన్ని ప్రధాన మ్యూజిక్ స్ట్రీమింగ్ ప్లాట్‌ఫామ్‌లలో ఇది ప్రస్తుతం అందుబాటులో ఉంది.ఈ ప్రాజెక్ట్ గురించి రెహమాన్ మాట్లాడుతూ.. ‘‘బాబ్’ చిత్రంలోని భావోద్వేగభరితమైన కథ, దర్శకురాలు నైలా సృష్టించిన విలక్షణమైన ప్రపంచం నన్ను ఎంతగానో ఆకట్టుకున్నాయి. సినిమాకు తగ్గట్టుగా ప్రామాణికమైన సంగీతాన్ని అందించేందుకు కొత్త శబ్దాలను అన్వేషించాను. అరబిక్ సినిమాల్లోకి ఇది నాకు ఒక అర్థవంతమైన అడుగు’’ అని వివరించారు.‘బాబ్’ చిత్రంలో వాహిదా అనే యువతి, తన కవల సోదరి మరణం వెనుక ఉన్న నిజాన్ని కొన్ని పాత క్యాసెట్ టేపుల ద్వారా కనుగొంటుంది. ఈ ఆసక్తికరమైన కథాంశంతో ఈ సినిమా తెరకెక్కింది. షైమా ఎల్ ఫదుల్ ప్రధాన పాత్ర పోషించారు. ఇప్పటికే హాలీవుడ్, ఆసియా, యూరప్ సినిమాలకు అద్భుతమైన సంగీతం అందించి ప్రపంచ ఖ్యాతి పొందిన రెహమాన్, ఇప్పుడు అరబిక్ చిత్రంతో తన కీర్తిని మరింత విస్తరించుకున్నారు.