రెడ్ రోడ్ లో యోగా వేడుకలు.. పశ్చిమ బెంగాల్ లో ప్రధాని మోదీ మార్క్
SkyC Media
ప్రధాన మంత్రి నరేంద్ర మోదీ జూన్ 20, 21 తేదీల్లో పశ్చిమ బెంగాల్, ఒడిశా రాష్ట్రాల్లో భారీ పర్యటనకు సిద్ధమయ్యారు. ఈ పర్యటనలో భాగంగా తారకేశ్వర్లో పశ్చిమబంగా దినోత్సవం, అంతర్జాతీయ యోగా దినోత్సవ వేడుకల్లో ప్రధాని పాల్గొంటారు. ఈ నేపథ్యంలో రెండు రాష్ట్రాల్లో పలు అభివృద్ధి కార్యక్రమాలకు మోదీ శ్రీకారం చుట్టనున్నారు.
పశ్చిమ బెంగాల్లో బీజేపీ ప్రభుత్వం ఏర్పడిన తర్వాత మోదీ ఇక్కడ పర్యటించడం గమనార్హం. దీంతో ఈ పర్యటన దేశవ్యాప్తంగా హాట్ టాపిక్గా మారింది. ఈ పర్యటన ద్వారా అటు రైతు సంక్షేమం, ఇటు రక్షణ రంగ బలోపేతానికి మోదీ బిగ్ ప్లాన్ వేశారు. జూన్ 20న తారకేశ్వర్లో జరిగే పశ్చిమబంగా దినోత్సవ వేడుకల్లో ప్రధాని మోదీ పాల్గొని ప్రసంగించనున్నారు.
ఇక్కడ రైల్వే, వ్యవసాయం, గ్రామీణాభివృద్ధి, చేపల పరిశ్రమ, పశుసంవర్ధన రంగాల్లో అనేక ప్రాజెక్టులను ప్రారంభిస్తారు. ఈ క్రమంలోనే దేశవ్యాప్తంగా ఉన్న 9.44 కోట్ల మంది రైతులకు మోదీ బంపర్ గిఫ్ట్ ఇవ్వనున్నారు. PM-кисан సమ్మాన్ నిధి 23వ విడత కింద రూ.18,880 కోట్లను విడుదల చేయనున్నారు.
ఫలితంగా పశ్చిమ బెంగాల్లోని 45 లక్షల మంది రైతులకు రూ.900 కోట్ల ఆర్థిక సహాయం నేరుగా అందుతుంది. ఇదిలా ఉండగా పశ్చిమ బెంగాల్ వ్యవసాయ రంగాన్ని బలోపేతం చేసేందుకు ప్రధాని మోదీ సరికొత్త వ్యూహాన్ని అమలు చేయనున్నారు. ఇందులో భాగంగా సుమారు 50 లక్షల మంది రైతులను కవర్ చేస్తూ PM ఫసల్ బీమా యోజనను ప్రారంభిస్తారు.
డిజిటల్ అగ్రికల్చర్ మిషన్ కింద అగ్రి స్టాక్, నేచురల్ ఫార్మింగ్ మిషన్ను కూడా ప్రధాని లాంచ్ చేయనున్నారు. వీటితో పాటు ఫ్రాసర్గంజ్ ఫిషింగ్ హార్బర్ అప్గ్రేడ్, సైంథియాలో మోడర్న్ ఫిష్ మార్కెట్ ప్రాజెక్టులు ప్రారంభం కానున్నాయి.
రూ.590 కోట్ల కేటాయింపులతో చేపట్టిన రైల్వే ప్రాజెక్టులు కూడా అందుబాటులోకి వస్తాయి. జూన్ 21 ఉదయం కోల్కతాలోని ప్రసిద్ధ రెడ్ రోడ్లో 12వ అంతర్జాతీయ యోగా దినోత్సవ జాతీయ
వేడుకలు జరగనున్నాయి. ఈ సామూహిక యోగా సెషన్కు ప్రధాని నరేంద్ర మోదీ స్వయంగా నాయకత్వం వహించనున్నారు. పశ్చిమ బెంగాల్లో ఇలాంటి జాతీయ స్థాయి యోగా వేడుకలు నిర్వహించడం ఇదే మొదటిసారి కావడం విశేషం. ఈ ఏడాది యోగా దినోత్సవాన్ని “యోగా ఫర్ హెల్తీ ఏజింగ్” అనే థీమ్తో నిర్వహిస్తున్నారు. ఈ ఈవెంట్కు ముందుగానే జూన్ 19న “దౌడ్ సే ధ్యాన్” పేరిట భారీ మెరథాన్ నిర్వహించారు. అదే రోజు సాయంత్రం శ్యామా ప్రసాద్ ముఖర్జీ పోర్ట్లో డిఫెన్స్ రంగానికి సంబంధించి మోదీ కీలక నిర్ణయం అమలు చేయనున్నారు. దేశీయంగా తయారు చేసిన INS దునగిరి, INS సంశోధక్, INS అగ్రయ్ అనే మూడు యుద్ధ నౌకలను నౌకాదళంలో చేర్చనున్నారు. ఇది ఆత్మనిర్భర్ భారత్ సాధనలో దేశ రక్షణ రంగానికి ఒక ముఖ్యమైన మైలురాయిగా నిలవనుంది. దీంతో భారత నౌకాదళ బలం మరింత పెరగనుందని రక్షణ నిపుణులు విశ్లేషిస్తున్నారు. రక్షణ రంగంలో స్వావలంబనకు ఈ మూడు నౌకల కమిషనింగ్ అత్యంత కీలకంగా మారనుంది. పశ్చిమ బెంగాల్ పర్యటన ముగించుకుని ప్రధాని మోదీ నేరుగా ఒడిశా రాష్ట్రానికి చేరుకోనున్నారు. అక్కడ రాష్ట్రపతి ద్రౌపది ముర్ముతో కలిసి మయూర్భంజ్ జిల్లా పహడ్పూర్లోని సంథాలి జహెరా, హో జహెరా పవిత్ర స్థలాల్లో ప్రార్థనలు చేస్తారు. అనంతరం రైరెంట్పూర్లో బీజేపీ ప్రభుత్వం రెండేళ్ల సాధనలపై సమీక్ష నిర్వహిస్తారు. ఈ నేపథ్యంలో ఒడిశా అభివృద్ధి కోసం రూ.47,600 కోట్లకు పైగా విలువైన ఎనర్జీ, ఇన్ఫ్రా, రోడ్డు ప్రాజెక్టులను మోదీ ప్రారంభించనున్నారు. ప్రధాని మోదీ పర్యటన రెండు రాష్ట్రాల ఆర్థిక వృద్ధికి దోహదపడనుంది.