చిన్నారి జ్ఞానేశ్వరి కుటుంబాన్ని పరామర్శించిన హోం మంత్రి

చిన్నారి జ్ఞానేశ్వరిని క్షేమంగా తీసుకొచ్చేందుకు ప్రయత్నిస్తున్నాం హోం మంత్రి .. కాకినాడ జిల్లా తుని నియోజకవర్గంలో తీవ్ర కలకలం రేపుతున్న రెండేళ్ల చిన్నారి జ్ఞానేశ్వరి అదృశ్యం కేసు రాష్ట్రవ్యాప్తంగా చర్చనీయాంశంగా మారింది. గత 11 రోజులుగా ఆచూకీ లేని బాలిక కుటుంబ సభ్యులను ఆంధ్రప్రదేశ్ రాష్ట్ర హోంశాఖ మంత్రి వంగలపూడి అనిత బుధవారం స్వయంగా కలిసి పరామర్శించారు.

చిన్నారి తల్లిదండ్రులకు ధైర్యం చెప్పిన ఆమె, పాపను సురక్షితంగా రక్షించేందుకు ప్రభుత్వం శాయశక్తులా ప్రయత్నిస్తోందని హామీ ఇచ్చారు. తుని మండలం సీహెచ్ అగ్రహారంలోని ఓ తోటలో నివాసముంటున్న గణేష్, భవానీ దంపతుల కుమార్తె జ్ఞానేశ్వరి హఠాత్తుగా మాయమవ్వడం స్థానికంగా పెను విషాదాన్ని నింపింది.

ఈ సంఘటన తీవ్రతను పరిగణనలోకి తీసుకున్న హోంమంత్రి, బాలిక అదృశ్యమైన పరిసర ప్రాంతాలను స్వయంగా పరిశీలించారు. అనంతరం జిల్లా పోలీస్ సూపరింటెండెంట్ (ఎస్పీ) బిందుమాధవ్‌తో కేసు దర్యాప్తు పురోగతిపై సుదీర్ఘంగా సమీక్షించారు. గత 11 రోజులుగా క్షేత్రస్థాయిలో జరుగుతున్న గాలింపు చర్యల వివరాలను ఎస్పీ ఈ సందర్భంగా మంత్రికి వివరించారు.

చిన్నారి ఆచూకీ కోసం వందలాది మంది పోలీసు సిబ్బంది అడవులతో పాటు సమీపంలోని చెరువులు, బావులను కూడా జల్లెడ పడుతున్నట్లు తెలిపారు. అటవీ ప్రాంతం సమీపంలో ఉండటంతో క్రూర జంతువుల సంచారం ఏమైనా ఉందా అనే కోణాన్ని కూడా అధికారులు నిశితంగా పరిశీలిస్తున్నారని వివరించారు.

దర్యాప్తును మరింత వేగవంతం చేసేందుకు అధునాతన సాంకేతిక పరిజ్ఞానాన్ని వాడుతున్నట్లు పోలీస్ యంత్రాంగం వెల్లడించింది. దట్టమైన అటవీ ప్రాంతాల్లో నిఘా పెట్టేందుకు ప్రత్యేకంగా డ్రోన్ కెమెరాలను రంగంలోకి దించారు. వీటితో పాటు వైల్డ్‌లైఫ్ ట్రాకింగ్ కెమెరాలు, గ్రామంలోని సీసీటీవీ విజువల్స్ ఆధారంగా విచారణ సాగుతోంది.