రూ. 5 లక్షల కోట్ల విలువైన ఐపీఓ వస్తోంది.. వాటా విక్రయిస్తున్న ఎస్బీఐ.. షేర్లు డౌన్

NSE IPO DRHP : భారత స్టాక్ మార్కెట్లో మళ్లీ ఐపీఓల సందడి నెలకొంది. వాయిదా పడ్డాయనుకున్న సంస్థలు ఐపీఓలుగా ఎంట్రీ ఇచ్చేందుకు రంగం సిద్ధం చేసుకుంటున్నాయి. వీటిల్లో ముకేశ్ అంబానీకి చెందిన రిలయన్స్ జియో ప్లాట్‌ఫామ్స్ లిమిటెడ్, జెప్టో, NSE గురించి చర్చ ప్రధానంగా నడుస్తోంది.

కొద్ది రోజుల కిందటి వరకు పశ్చిమాసియా యుద్ధం నేపథ్యంలో మార్కెట్ పరిస్థితులు బాగోలేక ఐపీఓ ప్రణాళికల్ని వాయిదా వేసుకున్నాయి. ఇప్పుడు ఇరాన్- అమెరికా మధ్య డీల్ కుదరగా.. మార్కెట్లలో జోష్ నెలకొంది. వరుసగా 4 సెషన్లలో భారత సూచీలు దూసుకెళ్లాయి.

దీంతో మళ్లీ తమ ఐపీఓల్ని తీసుకొచ్చేందుకు ప్లాన్ చేస్తున్నాయి. ఇప్పటికే రిలయన్స్ ఇండస్ట్రీస్ ఏజీఎంకు ముందుగానే సెబీకి డ్రాఫ్ట్ పేపర్స్ సమర్పించనున్నట్లు వార్తలు రాగా.. ఇప్పుడు అతిపెద్ద స్టాక్ ఎక్స్చేంజీగా ఉన్నటువంటి NSE కూడా అదే ప్లాన్ చేస్తున్నట్లు తెలుస్తోంది.

NSE కూడా సెబీకి ముసాయిదా పత్రాల్ని ఈ వారంలోగా అంటే శుక్రవారం లోపటి వరకు సమర్పించనున్నట్లు తెలుస్తోంది. ఈ ఐపీఓ పూర్తిగా ఆఫర్ ఫర్ సేల్ (OFS) విధానంలో ఉంటుందని భావిస్తున్నారు. ఇక్కడ NSE లో లైఫ్ ఇన్సూరెన్స్ కార్పొరేషన్ ఆఫ్ ఇండియా అత్యధికంగా 10.72 శాతం వాటాతో అతిపెద్ద వాటాదారుగా ఉంది.

కానీ ఎల్ఐసీ.. ఈ ఐపీఓలో భాగంగా వాటాను విక్రయించకూడదని నిర్ణయించుకున్నట్లు తెలుస్తోంది. స్టేట్ బ్యాంక్ ఆఫ్ ఇండియా సహా దాని సబ్సిడరీ ఎస్బీఐ క్యాపిటల్ మార్కెట్స్‌కు కూడా వాటా 7.5 శాతం వరకు ఉంది. ఇక మొత్తంగా ఎన్ఎస్ఈ ఐపీఓ కోసం 6 శాతం వరకు వాటాను ఓఎఫ్ఎస్ రూపంలో విక్రయించనున్నట్లు సిద్ధమైనట్లు సమాచారం.

ఐపీఓ కోసం సంస్థ మార్కెట్ విలువను సుమారు రూ. 5 లక్షల కోట్లుగా అంచనా వేస్తుండగా రూ. 30 వేల కోట్ల వరకు నిధుల్ని సమీకరించాలని ప్లాన్ చేస్తున్నట్లు సమాచారం. దీంతో భారతదేశ చరిత్రలో అతిపెద్ద ఐపీఓల్లో ఒకటిగా నిలిచేందుకు సిద్ధమైనట్లు చెబుతున్నారు