అమరనాథ్ వ్యాఖ్యలపై అనిత ఫైర్.. ఏపీ రాజకీయాల్లో ముదురుతున్న వివాదం
Telugu Times
ఆంధ్రప్రదేశ్ (Andhra Pradesh) రాజకీయాల్లో మాజీ మంత్రి గుడివాడ అమరనాథ్ (Gudivada Amarnath) చేసిన వ్యాఖ్యలు పెద్ద ఎత్తున చర్చకు దారితీశాయి. హోంమంత్రి వంగలపూడి అనిత (Vangalapudi Anitha)పై ఆయన చేసిన విమర్శలు రాజకీయ వర్గాల్లో తీవ్ర స్పందనకు కారణమయ్యాయి.
ఈ వ్యాఖ్యలు వ్యక్తిగత విమర్శలను దాటి మహిళలను, ముఖ్యంగా ప్రజాప్రతినిధులుగా ఉన్న మహిళలను అవమానించే విధంగా ఉన్నాయని కూటమి నేతలు ఆరోపిస్తున్నారు. ఈ అంశంపై ఉప ముఖ్యమంత్రి పవన్ కళ్యాణ్ (Pawan Kalyan) కూడా స్పందించారు. అనంతరం హోంమంత్రి అనిత తన అధికారిక ఎక్స్ (X) ఖాతా ద్వారా ఘాటుగా స్పందిస్తూ ఒక పోస్టు చేశారు.
తనపై జరిగిన విమర్శలు కేవలం రాజకీయ దాడులు మాత్రమే కాదని, ఒక మహిళగా, రాజ్యాంగ పదవిలో ఉన్న ప్రజాప్రతినిధిగా తన గౌరవాన్ని దెబ్బతీసే ప్రయత్నమని ఆమె పేర్కొన్నారు. తన పోస్ట్లో అనిత నేరుగా ఎవరి పేరును ప్రస్తావించకపోయినా, ఇటీవలి వ్యాఖ్యలనే ఉద్దేశించి స్పందించినట్లు రాజకీయ వర్గాలు భావిస్తున్నాయి.
ప్రజాసేవ ద్వారా ఎదిగిన మహిళలను కొందరు వ్యక్తులు వ్యక్తిగత విమర్శలతో లక్ష్యంగా చేసుకోవడం బాధాకరమని ఆమె అభిప్రాయపడ్డారు. ఇలాంటి వ్యాఖ్యలు సమాజానికి సరైన సందేశాన్ని ఇవ్వవని కూడా ఆమె పేర్కొన్నారు. రాజకీయంగా ఎదుర్కోలేని పరిస్థితుల్లో కొందరు వ్యక్తిగత దూషణలు, విమర్శలను ఆయుధంగా ఉపయోగిస్తారని అనిత వ్యాఖ్యానించారు.
తన రాజకీయ ప్రయాణంలో ఇలాంటి పరిస్థితులను ఎన్నోసార్లు ఎదుర్కొన్నానని, అయితే వాటితో వెనక్కి తగ్గే ప్రసక్తే లేదని స్పష్టం చేశారు. తనపై వచ్చే ప్రతి విమర్శ తన సంకల్పాన్ని మరింత బలపరుస్తుందని ఆమె చెప్పారు. ఇదిలా ఉండగా, రాష్ట్ర హోంశాఖ పనితీరుపై మీడియాతో మాట్లాడిన సందర్భంగా కూడా ఈ వివాదంపై ప్రశ్నలు ఎదురయ్యాయి.
అయితే ఆ రోజు తాను ప్రభుత్వ విజయాలు, పోలీసు శాఖ సాధించిన పురోగతిని వివరించడానికి వచ్చినట్లు అనిత తెలిపారు. రాజకీయంగా స్థాయి లేని విమర్శలకు వెంటనే స్పందించి తన స్థాయిని తగ్గించుకోనని ఆమె పేర్కొన్నారు. అయితే
తగిన సమయంలో సమాధానం ఇస్తానని కూడా స్పష్టం చేశారు.
మరోవైపు వైఎస్సార్ కాంగ్రెస్ పార్టీ (YSR Congress Party) నాయకులు కూడా ఈ వ్యవహారంపై స్పందిస్తున్నారు. పార్టీకి చెందిన మహిళా నేతలు వరుసగా మీడియా ముందుకు వచ్చి హోంమంత్రి వ్యాఖ్యలపై అభ్యంతరం వ్యక్తం చేస్తున్నారు. మాజీ మంత్రి అమరనాథ్ గతంలో పలు శాఖలను నిర్వహించిన అనుభవం ఉన్న నాయకుడని, ఆయన గురించి అనుచితంగా మాట్లాడటం సరైంది కాదని వారు పేర్కొన్నారు.
రాజకీయాల్లో పదవులు శాశ్వతం కాదని, పరస్పర గౌరవం ఉండాలని వైఎస్సార్సీపీ నేతలు సూచిస్తున్నారు. అదే సమయంలో కూటమి నాయకులు మాత్రం హోంమంత్రిపై చేసిన వ్యాఖ్యలు అసభ్యకరంగా ఉన్నాయని ఆరోపిస్తూ గుడివాడ అమరనాథ్ను లక్ష్యంగా చేసుకుని విమర్శలు కొనసాగిస్తున్నారు. దీంతో ఈ వివాదం త్వరలో ముగిసేలా కనిపించకపోగా, రాష్ట్ర రాజకీయాల్లో మరో కీలక చర్చనీయాంశంగా మారింది.