కొత్త’ సంచలనం

అరంగేట్రంలో కాబోవెర్డె అద్భుత ప్రదర్శన టైటిల్‌ ఫేవరెట్‌ స్పెయిన్‌తో మ్యాచ్‌ డ్రా అట్లాంటా ఒకవైపేమో ప్రపంచ మేటి జట్లలో ఒకటి.. దానికి ప్రపంచకప్‌ గెలిచిన చరిత్ర ఉంది.. ఈసారి టైటిల్‌ ఫేవరెట్లలో ఒకటైన ఆ జట్టులో ఎటు చూసినా స్టార్లే.

ఇంకోవైపేమో ప్రపంచకప్‌లో తొలి మ్యాచ్‌ ఆడుతున్న జట్టు.. ఆ దేశం పేరు కూడా అభిమానులకు పెద్దగా తెలియదు.. అందులో అందరూ అనామక ఆటగాళ్లే. ఇలాంటి రెండు జట్ల మధ్య పోరంటే.. ఫలితంపై ఎలాంటి అంచనా ఉంటుందో చెప్పేదేముంది? ఆ పెద్ద జట్టు.. ఈ చిన్న జట్టును ఎంత తేడాతో కొడుతుందనే చూస్తారంతా!

కానీ ప్రపంచకప్‌లో అరంగేట్ర మ్యాచ్‌ ఆడుతున్న జట్టు.. అవతలున్న మేటి జట్టును నిలువరిస్తే? ప్రత్యర్థికి ఒక్క గోలూ ఇవ్వకుండా మ్యాచ్‌ను డ్రాగా ముగిస్తే? ఫుట్‌బాల్‌ ప్రపంచకప్‌లో ఈ అనూహ్య ఫలితమే వచ్చింది సోమవారం. ఐరోపా దిగ్గజ జట్టు స్పెయిన్‌ను..

కాబోవెర్డె అనే పసికూన నిలువరించింది. ఫిఫా ప్రపంచకప్‌ 2026లో తొలి సంచలనం నమోదైంది. కేవలం 5 లక్షల జనాభా ఉన్న, తొలిసారి ఈ మెగా టోర్నీకి అర్హత సాధించిన కాబోవెర్డె.. మాజీ ఛాంపియన్‌ స్పెయిన్‌ను నిలువరించి ప్రకంపనలు రేపింది. కురసావ్‌ మీద జర్మనీలాగే, ప్రపంచకప్‌ అరంగేట్ర జట్టుపై గోల్స్‌ వర్షం కురిపించేస్తుందనుకున్న ఐరోపా ఛాంపియన్‌..

ఒక్కసారీ బంతిని నెట్‌లోకి పంపించలేకపోయింది. సోమవారం గ్రూప్‌-హెచ్‌లో కాబోవెర్డెతో ఆ జట్టు పోరు 0-0తో డ్రాగా ముగిసింది. మ్యాచ్‌లో ఎక్కువ శాతం (62) బంతిని తన అధీనంలోనే ఉంచుకున్నప్పటికీ గోల్‌ మాత్రం సాధించలేకపోయింది స్పెయిన్‌.

ఆ జట్టు 27 సార్లు గోల్‌ ప్రయత్నాలు చేయగా.. ప్రత్యర్థి ఆరుసార్లే ప్రయత్నించింది. ఈ మ్యాచ్‌లో హీరో కాబోవెర్డె గోల్‌ కీపర్‌ వోజినానే. స్పెయిన్‌ ఆటగాళ్లు నేరుగా ఏడుసార్లు నెట్‌ను లక్ష్యంగా షాట్లు ఆడగా.. అందులో చాలా వాటిని అతను అద్భుతంగా అడ్డుకున్నాడు.