బద్రీనాథ్ క్షేత్రానికి ముఖేశ్ అంబానీ కళ్లు చెదిరే విరాళం

రిలయన్స్ ఇండస్ట్రీస్ అధినేత ముఖేశ్ అంబానీ బద్రీనాథ్ క్షేత్రానికి భారీ విరాళం ప్రకటించారు. సోమవారం ఉత్తరాఖండ్‌లోని ప్రసిద్ధ పుణ్యక్షేత్రాలైన బద్రీనాథ్, కేదార్‌నాథ్‌లను ఆయన కుటుంబ సభ్యులతో కలిసి సందర్శించారు. లోక కల్యాణాన్ని కాంక్షిస్తూ స్వామివారికి ప్రత్యేక పూజలు నిర్వహించిన ఆయన..

బద్రీనాథ్ - కేదార్‌నాథ్ ఆలయాల అభివృద్ధి, భక్తులకు మౌలిక వసతుల కల్పన కోసం రూ. 10 కోట్ల విరాళాన్ని అందజేశారు.సోమవారం ఉదయం హెలికాప్టర్‌లో బద్రీనాథ్ ధామ్‌కు చేరుకున్న ముఖేశ్ అంబానీకి బద్రీనాథ్-కేదార్‌నాథ్ ఆలయ కమిటీ (BKTC) అధికారులు ఘనస్వాగతం పలికారు.

అనంతరం ఆయన బద్రీ విశాల్ ఆలయంలో నిర్వహించిన ప్రత్యేక పూజా కార్యక్రమాల్లో పాల్గొన్నారు. అనంతరం కేదార్‌నాథ్ క్షేత్రాన్ని కూడా సందర్శించి ప్రార్థనలు చేశారు.అంబానీ అందించిన విరాళాన్ని ఆలయాల అభివృద్ధి పనులకు, యాత్రికుల సౌకర్యార్థం మెరుగైన వసతుల కల్పనకు వినియోగించనున్నట్లు బీకేటీసీ ముఖ్య కార్యనిర్వహణాధికారి సోహన్ సింగ్ రాణా వెల్లడించారు.

ముఖేశ్ అంబానీ ఈ పుణ్యక్షేత్రాలను క్రమం తప్పకుండా సందర్శించడం ఆనవాయితీగా వస్తోంది. ప్రస్తుతం చార్‌ధామ్ యాత్ర కొనసాగుతుండగా, శీతాకాలంలో ఆలయాల మూసివేతకు ముందు ఆయన ఈ పర్యటన చేపట్టడం విశేషం. ఈ ఏడాది యాత్రకు భక్తుల తాకిడి రికార్డు స్థాయిలో ఉంది.

ఇప్పటివరకు కేదార్‌నాథ్‌ను 12 లక్షల మంది, బద్రీనాథ్‌ను సుమారు 11 లక్షల మంది యాత్రికులు దర్శించుకున్నారు