ప్రధాని మోదీపై రాహుల్ గాంధీ విమర్శలు
Eenadu
Rahul on CBSE OSM row | దిల్లీ: సీబీఎస్ఈ ఆన్స్క్రీన్ మార్కింగ్ వివాదంపై రాహుల్ గాంధీ మరోసారి కేంద్ర ప్రభుత్వంపై విమర్శలు గుప్పించారు.
‘మన్కీ బాత్’లో మామిడి పండ్ల గురించి మాట్లాడ్డానికి ప్రధాని మోదీకి సమయం ఉంటుంది గానీ, 18.5 లక్షల మంది విద్యార్థుల భవితవ్యం గురించి మాట్లాడేందుకు తీరిక లేదంటూ విమర్శించారు. సీబీఎస్ఈ ఆన్ స్క్రీన్ మార్కింగ్ సమస్య కేవలం నిర్లక్ష్యం కాదని.. అదో కుమ్మక్కు అంటూ రాహుల్ గాంధీ ఆరోపించారు.
ఈ ఉదయం ‘మన్కీబాత్’లో ప్రధాని మోదీ పండ్ల మామిడి పండ్ల గురించి ప్రత్యేకంగా ప్రస్తావించారు. మామిడి పండ్ల గురించి చర్చలేని ఇల్లు ఉండదని పేర్కొన్నారు. ఒక్కో ప్రాంతానికి ఒక్కో రకం మామిడి పండు ఉంటుందని, దానికంటూ రుచి వేరేగా ఉంటుందన్నారు. మహారాష్ట్ర అల్ఫోన్సో, గుజరాత్ కేసర్, తెలుగు రాష్ట్రాల్లో బంగినపల్లి, తోతాపురి, నీలం, సువర్ణ రేఖ వంటి రకాలు లభిస్తాయని చెప్పారు. భారత్లో గ్రామీణ ప్రాంతాల్లో పండే మామిడి పండ్లకు ప్రపంచస్థాయి మార్కెట్ ఉందని పేర్కొన్నారు.
ఈ నేపథ్యంలో ప్రధాని మోదీపై రాహుల్ గాంధీ విమర్శలు గుప్పించారు. సీబీఎస్ఈ మూల్యంకనం గురించి ప్రశ్నలు లేవనెత్తిన విద్యార్థులతో ముచ్చటించిన వీడియోను తన సోషల్మీడియా ఖాతాలో పంచుకున్నారు. మోదీ ప్రభుత్వాన్ని ప్రశ్నించిన ధైర్యవంతులు అని కొనియాడారు. అయితే, వారికి సమాధానాలకు బదులు అవమానాలు ఎదురయ్యాయని ఆందోళన వ్యక్తంచేశారు.
సీబీఎస్ఈ టెండర్ నిబంధనలను మార్చేసిన ఫలితమే ఇదీ అని రాహుల్ గాంధీ తన ఎక్స్లో పేర్కొన్నారు. వాస్తవానికి 300 డీపీఐతో ఆటోమేటిక్ రోబోటిక్ స్కానర్లను పరీక్ష పత్రాల స్కానింగ్కు వినియోగించాల్సి ఉండగా.. తర్వాత నిబంధనలను సవరించారని పేర్కొన్నారు. దీంతో సంబంధిత టెండర్ దక్కించుకున్న కోఎంప్ట్ సంస్థ ఆన్సర్ షీట్లను మొబైల్ ఫోన్ సాయంతో స్కాన్ చేసి తప్పిదాలకు పాల్పడిందని ఆరోపించారు. దీనివల్ల విద్యార్థులు బాధితులుగా మారారని తెలిపారు. దీనిపై కేంద్రమంత్రి ధర్మేంద్ర ప్రదాన్ నిమ్మకు నీరెత్తినట్లుగా ఉండగా.. ప్రధాని మోదీ ‘మన్కీ బాత్’లో ఒక్క మాటా మాట్లాడలేదని విమర్శలు గుప్పించారు.
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
For digital advertisements Contact : 040 - 23318181 eMail: marketing@eenadu.in
© 1999 - 2026 Ushodaya Enterprises Pvt.Ltd,All rights reserved.
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.
This website follows the DNPA Code of Ethics.