అయోధ్యలోని శ్రీరామజన్మభూమి తీర్థక్షేత్ర ట్రస్టుకు అందిన విరాళాల నిర్వహణలో ఆర్థిక అవకతవకలు జరిగాయని ఆరోపిస్తూ దాఖలైన ప్రజాప్రయోజన వ్యాజ్యాలపై (పిల్స్) సుప్రీంకోర్టు నేడు విచారణ చేపట్టనుంది. ఈ వ్యవహారంపై అత్యున్నత న్యాయస్థానం పర్యవేక్షణలో దర్యాప్తు జరపాలని పిటిషనర్లు కోరుతున్నారు.సుప్రీంకోర్టు వెబ్సైట్లో ప్రచురించిన జాబితా ప్రకారం.. భారత ప్రధాన న్యాయమూర్తి (సీజేఐ), జస్టిస్ సూర్యకాంత్, జస్టిస్ జాయ్ మాల్యా బాగ్చీ, జస్టిస్ వి.మోహనలతో కూడిన ధర్మాసనం ఈ పిటిషన్లను విచారించనుంది. అడ్వకేట్ నరేంద్ర కుమార్ గోస్వామి, అజయ్ కుమార్ రాయ్, ఆర్జేడీ ఎంపీ సుధాకర్ సింగ్ తదితరులు వేర్వేరుగా ఈ వ్యాజ్యాలను దాఖలు చేశారు.ట్రస్టుకు అందిన విరాళాలు, కానుకల వివరాలు, రికార్డులు, సీసీటీవీ ఫుటేజీని భద్రపరచాలని పిటిషనర్లు కోరుతున్నారు. ట్రస్ట్ ఏర్పాటైనప్పటి నుంచి అందిన అన్ని విరాళాలపై స్వతంత్ర ఫోరెన్సిక్ ఆడిట్ నిర్వహించి, ఆ నివేదికను సీల్డ్ కవర్లో కోర్టుకు సమర్పించాలని విజ్ఞప్తి చేశారు. ఇప్పటికే ఉత్తరప్రదేశ్ ప్రభుత్వం ఈ ఆరోపణలపై ప్రత్యేక దర్యాప్తు బృందాన్ని (సిట్) ఏర్పాటు చేసినప్పటికీ, ఆ విచారణను సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)కి బదిలీ చేయాలని ఎంపీ సుధాకర్ సింగ్ తన పిటిషన్లో కోరారు.గతంలో ఈ పిటిషన్పై తక్షణ విచారణకు సుప్రీంకోర్టు నిరాకరించగా, వేసవి సెలవుల అనంతరం విచారణ జాబితాలో చేర్చింది. దర్యాప్తు పూర్తయ్యే వరకు ట్రస్ట్ ఆర్థిక వ్యవహారాలను పర్యవేక్షించేందుకు విశ్రాంత న్యాయమూర్తులతో కమిటీని నియమించాలని కూడా పిటిషనర్లు కోరారు