Solar eclipse 2026 | ఆగస్టు 12న (బుధవారం) అరుదైన సంపూర్ణ సూర్యగ్రహణం ఏర్పడనుంది. ఇదే రోజు ఆషాఢ బహుళ అమావాస్య (చుక్కల అమావాస్య) కూడా కావడం విశేషం. ఈ గ్రహణం భారతదేశంలో కనిపించకపోయినా, ప్రపంచంలోని అనేక దేశాల్లో ప్రత్యక్షమవుతుంది. అందువల్ల ఈ గ్రహణానికి సంబంధించిన శాస్త్రీయ, ధార్మిక, జ్యోతిషపరమైన అంశాలను తెలుసుకోవడం అవసరం.
ఈ ఏడాదిలో సంభవించే తొలి సంపూర్ణ సూర్యగ్రహణం ఇదే కావడం విశేషం.ఈ గ్రహణం ప్రపంచంలోని 55 దేశాల్లో ఏదో ఒక రూపంలో కనిపిస్తుంది. వాటిలో స్పెయిన్, ఐస్లాండ్ దేశాల్లో మాత్రమే సంపూర్ణ సూర్యగ్రహణం ప్రత్యక్షమవుతుంది. మిగిలిన 53 దేశాల్లో పాక్షిక సూర్యగ్రహణం మాత్రమే దర్శనమిస్తుంది.
ఈ సంపూర్ణ సూర్య గ్రహణంలో చంద్రుడు సూర్యబింబాన్ని పూర్తిగా కప్పివేయడంతో, కొన్ని ప్రాంతాల్లో సుమారు రెండు నిమిషాలకు పైగా సంపూర్ణ చీకటి ఏర్పడుతుంది. అదే సమయంలో సాధారణంగా కనిపించని సూర్యుని బాహ్య వాతావరణమైన ‘కరోనా (Corona)’ స్పష్టంగా దర్శనమిస్తుంది. ఈ అవకాశాన్ని ఉపయోగించుకొని ఖగోళ శాస్త్రవేత్తలు పరిశోధనలు నిర్వహిస్తారు. ఐరోపాలోని కొన్ని ప్రాంతాల్లో పాక్షిక గ్రహణం కొనసాగుతుండగానే సూర్యాస్తమయం జరుగుతుంది. దీనిని ‘గ్రస్తాస్తమయ గ్రహణం’ అని పిలుస్తారు.
ఈ గ్రహణం భారతదేశంలో ఎక్కడా కనిపించదు. అందువల్ల భారతదేశ ప్రజలకు ప్రత్యక్ష గ్రహణ దర్శనం ఉండదు. ధర్మశాస్త్రాలలో ప్రధానంగా దృశ్యగ్రహణమే ఆచారానికి ప్రమాణం. అందువల్ల భారతదేశంలో కనిపించని ఈ గ్రహణానికి సాధారణంగా సూతకం, దేవాలయాల మూసివేత, ఆహార నియమాలు, ప్రత్యేక శాంతులు వంటి ఆచారాలు అవసరం లేదని అనేక పంచాంగ సంప్రదాయాలు పేర్కొంటున్నాయి. ఈ సంపూర్ణ సూర్యగ్రహణం కర్కాటక రాశిలోని ఆశ్లేషా నక్షత్రంలో కేతుగ్రస్త సూర్యగ్రహణంగా సంభవిస్తోంది.
జ్యోతిష సంప్రదాయం ప్రకారం.. గ్రహణం ప్రత్యక్షంగా దర్శనమిచ్చే ప్రాంతాల్లో నివసించే ఆశ్లేషా నక్షత్రజాతకులు, కర్కాటక రాశివారు గ్రహణ శాంతి, జపం, దానం వంటి శాస్త్రోక్త పరిహారాలు ఆచరించడం శ్రేయస్కరంగా భావిస్తారు. భారతదేశంలో ఈ గ్రహణం కనిపించనందున మన దేశంలో నివసించే వారికి గ్రహణ శాంతులు అవసరం లేదు. గ్రహణం ప్రత్యక్షంగా కనిపించే దేశాల్లో నివసించే వారికి మాత్రమే ఆయా సంప్రదాయాల ప్రకారం ఈ నియమాలు వర్తిస్తాయి.
గమనిక: ఇవి సాధారణ గోచార ఫలితాలు మాత్రమే. వ్యక్తిగత ఫలితాలు జన్మకుండలి, దశా-భుక్తులు, గోచారాలు, గ్రహణ నక్షత్ర సంబంధం వంటి అంశాలపై ఆధారపడి ఉంటాయి.
భారతదేశంలో గ్రహణం కనిపించకపోయినా ఆధ్యాత్మికంగా ఈ సమయంలో గాయత్రీ మంత్ర జపం, ఆదిత్య హృదయ పారాయణం, నవగ్రహ స్తోత్రం, విష్ణు సహస్రనామం, మహామృత్యుంజయ మంత్ర జపం చేయడం శ్రేయస్కరంగా భావిస్తారు.
గ్రహణాన్ని వీక్షించే వారు తప్పనిసరిగా పాటించాల్సిన జాగ్రత్తలివీ..
ఈసారి భారతదేశంలో గ్రహణం కనిపించనందున ప్రజలు ఎలాంటి అపోహలు, భయాందోళనలకు గురికావాల్సిన అవసరం లేదు. ఆషాఢ బహుళ అమావాస్యను తెలుగు ప్రాంతాల్లో చుక్కల అమావాస్యగా పిలుస్తారు. ఈ రోజున పితృదేవతలకు తర్పణం, అన్నదానం, వస్త్రదానం, గోసేవ, బ్రాహ్మణ సంతర్పణ వంటి పుణ్యకార్యాలు చేయడం విశేష ఫలప్రదమని శాస్త్రాలు పేర్కొంటాయి. కొన్ని ప్రాంతాల్లో మహిళలు కుటుంబ క్షేమం, సంతానాభివృద్ధి కోసం ప్రత్యేక పూజలు నిర్వహిస్తారు.
గమనిక: ఈనాడు.నెట్లో కనిపించే వ్యాపారరకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
