ఫ్యామిలీ బ్యాగ్రౌండ్ తో సినీ ఇండస్ట్రీలో హీరోలుగా ఎంట్రీ ఇచ్చిన 'స్టార్ కిడ్స్' చాలామందే ఉన్నారు. ఇటీవల కాలంలో దర్శక నిర్మాతలకుటుంబాల నుంచి కూడా 'హీరోలు' వస్తున్నారు. 'దసరా' దర్శకుడు శ్రీకాంత్ ఓదెల తమ్ముడు శశి ఈ మధ్యనే 'KJQ' సినిమాతో తెరంగేట్రం చేశాడు. ఇప్పుడు డైరెక్టర్ కార్తీక్ దండు సోదరుడు కూడా హీరోగా పరిచయం కాబోతున్నాడు.‘విరూపాక్ష’, ‘వృషకర్మ’ సినిమాల దర్శకుడు కార్తీక్ సోదరుడు వివేక్ దండు ' పనసపల్లి ఫ్యాన్స్ అసోసియేషన్ ' అనే సినిమాతో ఆరంగేట్రం చేస్తున్నాడు. ఇందులో సంగీర్తన విపిన్ హీరోయిన్ గా నటిస్తుండగా.. సప్తగిరి కీలక పాత్ర పోషిస్తున్నారు. తాజాగా మేకర్స్ ఈ చిత్రాన్ని అధికారికంగా ప్రకటిస్తూ, టైటిల్ మోషన్ పోస్టర్ రిలీజ్ చేశారు. సినిమాలో హీరో హీరోయిన్ల పాత్రలను పరిచయం చేశారు. ''సినిమానే మా ఎమోషన్'' అని పేర్కొన్నారు.'అయ్యగారే నెం.1'గా పాపులర్ అయిన అక్కినేని వీరాభిమాని నాగరాజుతో రూపొందించిన 'పనసపల్లి ఫ్యాన్స్ అసోసియేషన్' మోషన్ పోస్టర్ ఆకట్టుకుంటోంది. ఇందులో ఆయన సైకిల్ తొక్కుకుంటూ వచ్చి, పనసపల్లి ఊర్లోని గోడపై ఈ సినిమా వాల్ పోస్టర్ ను అంటించడంతో టైటిల్ రివీల్ అవుతుంది. దీంట్లో పనసపల్లి మెగా కామ్రేడ్స్ ఫ్యాన్స్ సంఘానికి అధ్యక్షుడుగా వివేక్ దండు.. బాలయ్య అభిమాన సంఘం ప్రెసిడెంట్ గా సంగీర్తన విపిన్ కనిపించారు. ఇద్దరూ తమ హీరోల సినిమాలు సాధించే బాక్సాఫీస్ రికార్డులపై పోటా పోటీలు పడటం మోషన్ పోస్టర్ లో ఆసక్తి కలిగిస్తోంది.''మా రికార్డ్ బద్దలు కొట్టాలంటే పదేళ్లు పట్టుద్ది.. వినపడుతుందా'' అని హీరో అంటే.. ''మా రికార్డ్ కొట్టాలంటే పదేళ్లు కాదు, పది తరాలు పడుతుందిరా'' అంటూ హీరోయిన్ కౌంటర్ ఇస్తోంది. టాలీవుడ్ సీరియర్ హీరోలైన మెగాస్టార్ చిరంజీవి, నందమూరి బాలకృష్ణ అభిమానుల మధ్య ఫ్యాన్ వార్స్ ఏ రేంజ్ లో జరుగుతుంటాయో మనం చూస్తున్నాం. ఇప్పుడంటే సోషల్ మీడియాలో ఒకరిపై ఒకరు విమర్శలు చేసుకుంటున్నారు కానీ, ఒకప్పుడు ఇరువర్గాలు థియేటర్ల దగ్గర నువ్వా నేనా అనే రీతిలో తలపడేవారు. అభిమానం పేరుతో విపరీతంగా గొడవలు పడేవారు. ఇప్పుడు 'పనసపల్లి ఫ్యాన్స్ అసోసియేషన్' సినిమాలో బాలకృష్ణ ఫ్యాన్, చిరంజీవి అభిమాని ఫ్యాన్ వార్ ఎక్కడి దాకా వెళ్లింది?, ఎలాంటి మలుపులు తిరిగింది?, ఎలా వినోదాన్ని పంచింది? వారి మధ్య ప్రేమ ఎలా పుట్టింది? అనేది చూపించబోతున్నారని తెలుస్తోంది.Read Also: అక్కినేని కల్ట్ ఫ్యాన్ను కలిసిన అఖిల్.. ‘అయ్యగారే నెం.1’ ఎమోషనల్..విలేజ్ బ్యాక్ డ్రాప్ పీరియాడిక్ ఎంటర్టైనర్ గా 'పనసపల్లి ఫ్యాన్స్ అసోసియేషన్' సినిమా రూపొందుతోంది. సి.హెచ్. రవికిషోర్ ఈ చిత్రానికి దర్శకత్వం వహించారు. క్యాండిడ్ ఫిలింస్ బ్యానర్ పై వివేకానంద్ వర్మ ఈ మూవీని నిర్మిస్తున్నారు. ఎంఎల్ రాజా సంగీతం సమకూర్చగా.. మోహన్ చారి డీఓపీగా, నరేష్ అడుపా ఎడిటర్ గా వర్క్ చేస్తున్నారు. ఈ సినిమాలో రాజా రవీందర్, బాబు మోహన్, వంశీధర్ గౌడ్, షైనింగ్ ఫణి, జబర్దస్త్ అశోక్, జబర్దస్త్ అప్పారావు తదితరులు ఇతర పాత్రల్లో కనిపించనున్నారు. అయ్యగారే నెం.1 ఫ్యాన్ నాగరాజుని ప్రమోషన్స్ లోనే భాగం చేశారా? లేదా సినిమాలో కూడా ఉన్నాడా? అనేది చూడాలి.
