లెజెండరీ డైరెక్టర్ సింగీతం శ్రీనివాసరావు (Singeetham Srinivasa Rao) దర్శకత్వంలో రూపుదిద్దుకుంటోన్న ‘సింగ్ గీతం’ (Sing Geetham) చిత్రానికి అందాల నటి శ్రుతి హాసన్ (Shruti Haasan) సపోర్ట్ అందించారు. వైజయంతి మూవీస్ బ్యానర్‌పై నాగ్ అశ్విన్ నిర్మిస్తున్న ఈ చిత్రానికి సంబంధించి ఇప్పటికే విడుదలైన ప్రమోషనల్ కంటెంట్‌.. సినిమాని వార్తలలో నిలుపుతోంది. తాజాగా ఈ సినిమా నుంచి ‘ఏమైంది’ అనే పాటను శ్రుతి హాసన్ విడుదల చేసి, చిత్రయూనిట్‌కు శుభాకాంక్షలు తెలిపారు. ప్రస్తుతం ఈ సాంగ్ టాప్‌లో ట్రెండ్ అవుతోంది.

ఈ పాటని గమనిస్తే.. ఈ పాట ఒక మ్యూజికల్ పజిల్‌లా సాగుతుంది. ఒక వింత పరిస్థితిలో చిక్కుకున్న గ్రామాన్ని ఈ పాట పరిచయం చేస్తోంది. ఆ గ్రామంలో జరిగే సాధారణ సంభాషణలన్నీ పాటలుగా మారిపోతుంటాయి. ఎందుకు ఇలా జరుగుతుందనేది ఎవరికీ అర్థం కాకపోయినా, గ్రామస్తులంతా ఆ పరిస్థితికి అలవాటు పడాల్సి వస్తుంది. ప్రశ్నలు, సందేహాలు, ఆశ్చర్యాలన్నీ ట్యూన్స్‌గా మారిపోతూ ఎంటర్‌టైన్ చేస్తుంటాయి. ఈ పాట ప్రత్యేకత ఏమిటంటే, కథను ముందుకు నడిపిస్తూనే ఎంటర్‌టైన్ చేస్తుండటం. గ్రామస్తుల గందరగోళం, ఆసక్తి, ఆ వింత పరిస్థితికి సమాధానం వెతికే ప్రయత్నం ప్రతి లిరిక్‌లో తెలుస్తుండటం విశేషం.

రాక్‌స్టార్ దేవిశ్రీ ప్రసాద్ అందించిన ట్యూన్ ఈ పాటకు మరింత ఆకర్షణగా నిలుస్తోంది. శ్రీమణి, దేవిశ్రీ ప్రసాద్, గౌతమ్ చల్లగుల్ల, రత్న శ్రీకర్, శశాంక్ చింతలపూడి కలిసి ఈ పాటకు సాహిత్యం అందించడం మరో విశేషం. ఈ పాటను చిత్రంలోని నటీనటులే ఆలపించడంతో పాట మరింత సహజంగా, కథలో భాగంగా అనిపిస్తోంది. అయాన్, అహల్య, శాలిని ప్రధాన పాత్రల్లో నటిస్తున్న ఈ చిత్రాన్ని జూన్ 11న గ్రాండ్‌గా విడుదల చేసేందుకు మేకర్స్ సన్నాహాలు చేస్తున్నారు.

ఇవి కూడా చదవండి:

First Week Collections Stories