నా ఫుట్ బాల్ కెరీర్ కు వచ్చే ఏడాదే చివరిది కావచ్చు

పోర్చుగల్ ఫుట్‌బాల్ స్టార్ క్రిస్టియానో రొనాల్డో తన కెరీర్‌ చివరి దశకు చేరుకుందని స్పష్టం చేశాడు. ఇదే ఆఖరి సీజన్‌ కావచ్చంటూ సంచలన వ్యాఖ్యలు చేశాడు.

స్పోర్ట్స్ డెస్క్: పోర్చుగల్ ఫుట్‌బాల్ స్టార్ క్రిస్టియానో రొనాల్డో (Cristiano Ronaldo) గురించి ప్రత్యేకంగా పరిచయం అక్కర్లేదు. తనదైన ఆటతో భారీగా ఫ్యాన్ ఫాలోయింగ్ సంపాదించాడు. ఇటీవల జరిగిన ఫిఫా ప్రపంచ కప్ 2026లో ఆశించిన మేర రాణించలేదు. ఈ మెగా టోర్నీలో పోర్చుగల్ నాకౌట్‌ స్టేజ్‌లోనే వెనుదిరిగింది. అప్పుడే తనకు చివరి వరల్డ్ కప్ అని రొనాల్డో ప్రకటించాడు. ఇది ఇలా ఉంటే.. తాజాగా ఓ ఇంటర్వ్యూలో రొనాల్డో తన కెరీర్‌ చివరి దశకు చేరుకుందంటూ సంచలన కామెంట్స్ చేశాడు. ఇదే ఆఖరి సీజన్‌ కావచ్చని తెలిపాడు.

‘నా ఫుట్‌బాల్ కెరీర్‌కు ఇదే(2026-27) చివరి సీజన్ కావచ్చు. ఆటకు వీడ్కోలు పలికిన తర్వాత ఎలాంటి జీవితం గడపాలనే దానిపై నాకు స్పష్టమైన ఆలోచనలు ఉన్నాయి. భవిష్యత్తు కార్యాచరణ ప్రణాళికలను ఎప్పుడో సిద్ధం చేసుకున్నా. నన్ను నేను బిజీగా ఉంచుకొనేందుకు చాలా విషయాలు ఉన్నాయి. మరోవైపు ఫుట్‌బాల్‌ను విడిచిపెట్టడం మాటల్లో చెప్పినంత తేలికేం కాదు. గత 25 ఏళ్లుగా ఫుట్‌బాల్‌తో అనుబంధం ఏర్పడింది. అద్భుతమైన జ్ఞాపకాలు ఉన్నాయి’ అని రొనాల్డో వెల్లడించాడు.

‘రిటైర్మెంట్ తర్వాత కోచింగ్‌ కాకుండా.. వ్యాపారం వైపు వెళ్లే అవకాశాలు ఎక్కువగా ఉన్నాయి. క్లబ్‌ ఓనర్ కావచ్చు. చాలాకాలం నుంచే నాకు ఆ ఆలోచన ఉంది. సొంతంగా ఫుట్‌బాల్ క్లబ్‌ ఉండాలనేది నా కోరిక. జాతీయ జట్టును వదిలి వెళ్లేటప్పుడు ముందుగా ఎవరికీ ఆ విషయం చెప్పను. నేను తీసుకొనే ఆకస్మిక నిర్ణయమే కానీ.. బాగా ఆలోచించే తీసుకున్నదే అవుతుంది’ అని రొనాల్డో వెల్లడించాడు. రొనాల్డో పోర్చుగల్ ఫుట్‌బాల్ తరఫున అత్యధిక 233 మ్యాచ్‌లు ఆడి 146 గోల్స్ సాధించాడు. అలానే 2026 ప్రపంచ కప్ తో కలిపి అర్జెంటీనాకు చెందిన లియోనెల్ మెస్సీ తర్వాత ఆరు ప్రపంచ కప్‌లలో ఆడిన ఏకైక ఆటగాడిగా రొనాల్డో నిలిచాడు.

పడిక్కల్ ఒక అరుదైన బ్యాటర్.. ఏబీ డివిలియర్స్ ప్రశంసల వర్షం

పంత్ బ్యాటింగ్ తీరుపై ఆగ్రహం వ్యక్తం చేసిన కైఫ్