సంగీత సంచలనం ఏఆర్ రెహమాన్ కాశ్మీర్ అంశంపై దర్శకుల ఆలోచనా విధానంలో మార్పు రావాల్సిన అవసరం ఉందని అభిప్రాయపడ్డారు. కాశ్మీర్ అనగానే హింస, ఉగ్రవాదం , గొడవలనే వెండితెరపై ఎక్కువగా చూపించడం పట్ల రెహమాన్ అసంతృప్తి వ్యక్తం చేశారు. కాశ్మీర్ అంటే కేవలం వివాదాస్పద ప్రాంతం మాత్రమే కాదని అది భూతల స్వర్గం లాంటి అద్భుతమైన ప్రకృతి సౌందర్యానికి నిలయమని ఈ సందర్భంగా గుర్తుచేశారు.
దర్శకులు కాశ్మీర్లోని హింసాత్మక కోణాన్ని మాత్రమే హైలైట్ చేయడం మానేసి అక్కడి ప్రశాంతమైన వాతావరణాన్ని, సుందర దృశ్యాలను ప్రపంచానికి చాటిచెప్పాలని రెహమాన్ పిలుపునిచ్చారు. కాశ్మీర్ లోయల్లో దాగి ఉన్న ప్రకృతి రమణీయతను, అక్కడి ప్రజల జీవన విధానంలో ఉండే సహజత్వాన్ని దృశ్యరూపంలో ఆవిష్కరించాల్సిన బాధ్యత సినీ రంగానికి ఉందన్నారు. ప్రతికూల అంశాల కంటే అనుకూల ..సానుకూల విషయాలను తెరపైకి తీసుకురావడం వల్ల సమాజంలో మంచి సందేశం వెళ్తుందని భావించారు.
దశాబ్దాలుగా వెండితెరపై కాశ్మీర్ను చూపించే క్రమంలో ఎక్కువ శాతం ఉద్రిక్తతలు , ఘర్షణలకే పెద్దపీట వేశారని రెహమాన్ పేర్కొన్నారు. దీంతో కాశ్మీర్ పట్ల సాధారణ ప్రజల్లో ఒక రకమైన భయం, ప్రతికూల అభిప్రాయం ఏర్పడే ప్రమాదం ఉందన్నారు. ఆ భావనను తుడిచిపెట్టి కాశ్మీర్ అసలైన అందాలను, సాంస్కృతిక వైవిధ్యాన్ని, అక్కడి శాంతియుత దృశ్యాలను చూపించడం ద్వారా పర్యాటకరంగం కూడా పుంజుకోవడానికి ఆస్కారం ఉంటుందని అభిప్రాయపడ్డారు.
సినిమా అనేది సమాజంపై ..ప్రజల మనస్సులపై తీవ్ర ప్రభావం చూపే శక్తివంతమైన మాధ్యమం. కాబట్టి దర్శకులు తమ కథలు, సన్నివేశాల ద్వారా కాశ్మీర్లోని ఆహ్లాదకరమైన వాతావరణాన్ని, అక్కడి పర్వతాలు, నదులు , పచ్చ దనపు లోయలను దృశ్యమానం చేయాలి. హింస కంటే శాంతికి, విధ్వంసం కంటే సౌందర్యానికి ప్రాధాన్యత ఇచ్చినప్పుడే కాశ్మీర్ నిజమైన అందం ప్రపంచానికి పూర్తిగా అర్థమవుతుందని రెహమాన్ వివరించారు.
కళ అనేది మనుషులను .. ప్రాంతాలను జోడించే వారధిలా పనిచేయాలి తప్ప భయాందోళనలను పెంచేదిగా ఉండకూడదని గుర్తుచేశారు. సంగీతంతో సరిహద్దులను చెరిపివేసి హృదయాలను గెలుచుకున్న రెహమాన్ చిత్రసీమ కూడా అదే దారిలో నడవాలని కోరుకుంటున్నారు. కాశ్మీర్ ప్రకృతి అందాలకు చలనచిత్రాల ద్వారా మరింత ప్రచారం లభిస్తే అక్కడి ప్రాంతీయ ప్రశాంతతకు ..అభివృద్ధికి ఎంతగానో తోడ్పడుతుందని రెహమాన్ విశ్వసిస్తున్నారు. రెహమాన్ వ్యాఖ్యలు పరిశ్రమలో, ప్రేక్షకుల్లోనూ ఆలోచనను రేకెత్తిస్తున్నాయి. ఇప్పటికైనా మేకర్స్ కాశ్మీర్ కథాంశాలపై దృష్టికోణాన్ని మార్చుకుని, హింసాత్మక దృశ్యాల స్థానంలో ప్రశాంతతను , ప్రకృతి సౌందర్యాన్ని చూపిస్తారని ఆశిద్దాం.