హైదరాబాద్లో కీలకమైన ఉప్పల్–నారపల్లి ఎలివేటెడ్ కారిడార్ పనులపై రాష్ట్ర ప్రభుత్వం దృష్టి సారించింది. పనులు నత్తనడకన సాగుతుండటంపై రోడ్లు, భవనాల శాఖ మంత్రి కోమటిరెడ్డి వెంకట్రెడ్డి జాతీయ రహదారుల అధికారులపై తీవ్ర ఆగ్రహం వ్యక్తం చేశారు. 2026 దసరా నాటికి కారిడార్ను ప్రజలకు అందుబాటులోకి తీసుకురావాలని ప్రభుత్వం ఇప్పటికే మాట ఇచ్చిందని, ఇకపై ఎలాంటి జాప్యాన్ని సహించబోమని స్పష్టం చేశారు. సచివాలయంలో మంగళవారం ఎన్హెచ్ అధికారులతో నిర్వహించిన సమీక్షలో పనుల పురోగతిపై మంత్రి తీవ్ర అసంతృప్తి వ్యక్తం చేశారు.మ్యాన్పవర్ను పెంచి మూడు షిఫ్టుల్లో పనులు నిర్వహించాలని అధికారులను మంత్రి కోమటిరెడ్డి ఆదేశించారు. కారిడార్ కింద ఉన్న 6.25 కిలోమీటర్ల బీటీ రహదారి పనులను ఆగస్టు నెలాఖరులోగా పూర్తి చేయాలని స్పష్టం చేశారు. నారపల్లి, ఉప్పల్ రెండు వైపుల నుంచి లాంచింగ్ గడ్డర్లను వినియోగించి నిర్మాణ వేగాన్ని పెంచాలని సూచించారు. అదే సమయంలో కారిడార్కు అనుసంధానంగా జీహెచ్ఎంసీ నిర్మిస్తున్న ఫ్లైఓవర్ పనులతో ఎన్హెచ్ అధికారుల సమన్వయం పెంచాలని మంత్రి ఆదేశించారు. పనుల పురోగతిని ఇకపై తాను ప్రతి పది రోజులకు ఒకసారి క్షేత్రస్థాయిలో పరిశీలిస్తానని తెలిపారు. 2026లోనే ఎలివేటెడ్ కారిడార్ను పూర్తి చేసి ప్రజలకు అందుబాటులోకి తీసుకురావాల్సిందేనని ఆయన తేల్చిచెప్పారు.కాగా, ఉప్పల్ జంక్షన్ నుంచి నారపల్లి వైపు సీపీఆర్ఐ వరకు నిర్మిస్తున్న ఈ ఆరు లేన్ల ఎలివేటెడ్ కారిడార్ పొడవు 6.25 కిలోమీటర్లు. ప్రాజెక్టు అంచనా నిర్మాణ వ్యయం రూ.626.76 కోట్లు. భూసేకరణ వ్యయం అదనంగా ఉంది. జాతీయ రహదారి-163లో హైదరాబాద్ పట్టణ పరిధిలోని రద్దీని తగ్గించేందుకు ఈ ప్రాజెక్టును చేపట్టారు. ఈ కారిడార్ పూర్తయితే వరంగల్, యాదాద్రి, భువనగిరి వైపు వెళ్లే వాహనాలకు ఉప్పల్–నారపల్లి మార్గంలో వేగవంతమైన రాకపోకలు సాధ్యమవుతాయి.2018లో పునాది.. ఇప్పటికీ పూర్తి కాలేదుఈ ప్రాజెక్టుకు 2018లో కేంద్ర మంత్రి నితిన్ గడ్కరీ ప్రాజెక్టుకు శంకుస్థాపన చేశారు. అప్పట్లో నిర్ణీత గడువులో పనులు పూర్తి చేయాలని లక్ష్యంగా పెట్టుకున్నప్పటికీ, ప్రాజెక్టు అనేక అవాంతరాలను ఎదుర్కొంది. 2023లో కేంద్ర ప్రభుత్వ పార్లమెంటరీ సమాధానంలోనే దీని షెడ్యూల్ పూర్తి తేదీ 2024 జూన్ 24గా నమోదై ఉంది. అయితే ఆ గడువు కూడా దాటిపోయింది. ప్రాజెక్టు ఆలస్యానికి ప్రధానంగా కాంట్రాక్టర్ ఆర్థిక ఇబ్బందులు, పరిపాలనా సమస్యలు, వివిధ శాఖల మధ్య సమన్వయ లోపాలు కారణాలుగా వెల్లడించారు.2025లో రోడ్లు, భవనాల శాఖకు అందిన ఫిర్యాదుపై ఇచ్చిన సమాధానంలోనూ కాంట్రాక్టర్ ఆర్థిక సమస్యలు, జీహెచ్ఎంసీ పనులతో సమన్వయం వంటి అంశాలు ఆలస్యానికి కారణాలుగా పేర్కొన్నారు. భూసేకరణ, యుటిలిటీ మార్పులు, మెట్రో నిర్మాణానికి అనుగుణంగా డిజైన్లో మార్పులు వంటి అంశాలు కూడా పనుల వేగాన్ని ప్రభావితం చేశాయి. ముఖ్యంగా ఉప్పల్ మెట్రో స్టేషన్ ప్రాంతంలో ఎలివేటెడ్ కారిడార్ నిర్మాణానికి సంబంధించిన డిజైన్, ఎత్తు తదితర అంశాలపై అదనపు సమన్వయం అవసరమైంది. గతంలో భూసేకరణ పరిహారం చెల్లింపుల్లో జాప్యం కూడా పనులకు ఆటంకంగా నిలిచినట్లు అధికారులు పేర్కొన్నారు.కాంట్రాక్టర్ మార్పుతో వేగం పెంచే ప్రయత్నంఏళ్ల తరబడి పనులు ముందుకు సాగకపోవటంతో పాత కాంట్రాక్టర్ను మార్చి కొత్త కాంట్రాక్టర్తో పనులు ముందుకు తీసుకెళ్లే చర్యలు చేపట్టారు. 2025లో మంత్రి కోమటిరెడ్డి వెంకట్రెడ్డి కేంద్ర రహదారుల శాఖ మంత్రి నితిన్ గడ్కరీతో చర్చల అనంతరం కాంట్రాక్టర్ను మార్చామని, పనులను వేగవంతం చేస్తున్నామని ప్రకటించారు. అనంతరం 2026 దసరా నాటికి ప్రాజెక్టును పూర్తి చేస్తామని ప్రభుత్వం లక్ష్యంగా పెట్టుకుంది. ఇప్పటికే పనుల కారణంగా ఉప్పల్ ప్రధాన రహదారిపై ట్రాఫిక్ ఆంక్షలు అమల్లోకి వచ్చాయి. ఉప్పల్–వరంగల్ మార్గంలో రాకపోకలను మళ్లించడంతో వాహనదారులు ఇబ్బందులు ఎదుర్కొంటున్నారు. ఉప్పల్–నారపల్లి మధ్య సుమారు 6 కిలోమీటర్ల ప్రయాణానికి రద్దీ సమయాల్లో అదనంగా 30–45 నిమిషాలు పడుతున్నట్లు ప్రయాణికులు చెబుతున్నారు. అయితే ఇప్పటికే పలుమార్లు గడువులు మారిన నేపథ్యంలో ఈసారి అయినా నిర్దేశించిన డెడ్లైన్లో పనులు పూర్తవుతాయా? అన్నదే ఇప్పుడు చర్చనీయాంశంగా మారింది.
