ఆంధ్రప్రదేశ్ స్థానిక సంస్థల ఎన్నికల్లో వెనుకబడిన తరగతులకు 34 శాతం రిజర్వేషన్ కల్పిస్తూ రాష్ట్ర ప్రభుత్వం జారీ చేసిన ఉత్తర్వుల చట్టబద్ధతపై హైకోర్టు విచారణ ముగించింది. చీఫ్ జస్టిస్ లిసా గిల్, జస్టిస్ చల్లా గుణరంజన్లతో కూడిన ధర్మాసనం బుధవారం ఇరువైపుల వాదనలు విన్న తర్వాత తీర్పును రిజర్వ్ చేసింది. ప్రభుత్వం సమర్పించాల్సిన కమిషన్ ఉత్తర్వులు, సర్వే గణాంకాలు, సిఫార్సు ఆధారాలను పూర్తిగా పరిశీలించిన తర్వాతే తుది నిర్ణయం వెలువరిస్తామని ధర్మాసనం స్పష్టం చేసింది. పిటిషనర్ తాండవ యోగేష్ వ్యక్తిగతంగా వాదిస్తూ, గ్రామీణ స్థానిక సంస్థలకు జారీ చేసిన జీవో 105, పట్టణ స్థానిక సంస్థలకు ఇచ్చిన జీవో 1065 ద్వారా బీసీలకు కల్పించిన కోటా రాజ్యాంగ పరిమితిని దాటుతుందని తెలిపారు. సుప్రీంకోర్టు రాజ్యాంగ ధర్మాసనంతో పాటు గతంలో ఏపీ హైకోర్టు బిర్రు ప్రతాప్ రెడ్డి కేసులో ఇచ్చిన తీర్పుల ప్రకారం ఎస్సీ, ఎస్టీ, బీసీ రిజర్వేషన్ల మొత్తం 50 శాతం మించకూడదని ఆయన వాదించారు. 2019లో జీవో 176 ద్వారా మొత్తం రిజర్వేషన్లు 59.85 శాతానికి చేరినప్పుడు హైకోర్టు దాన్ని కొట్టివేసిందని, ఆ నిర్ణయాన్ని సుప్రీంకోర్టు కూడా సమర్థించిందని గుర్తు చేశారు. ప్రభుత్వం తరఫున సీనియర్ న్యాయవాది దేవదత్ కామత్ వాదనలు వినిపించారు. సమగ్ర కుటుంబ సర్వే ప్రకారం రాష్ట్రంలో బీసీ జనాభా 50.42 శాతం ఉందని వివరించారు. రిటైర్డ్ ఐఏఎస్ అధికారి రాజీవ్ రంజన్ మిశ్రా నేతృత్వంలోని ప్రత్యేక కమిషన్ సిఫార్సుల ఆధారంగానే బీసీలకు 34 శాతం రిజర్వేషన్ నిర్ణయించామని ధర్మాసనానికి తెలిపారు. 50 శాతం పరిమితి అనేది అన్ని పరిస్థితుల్లోనూ మారని నియమం కాదని, రాష్ట్ర సామాజిక-ఆర్థిక పరిస్థితులను దృష్టిలో ఉంచుకుని రిజర్వేషన్ నిర్ణయించవచ్చని పేర్కొన్నారు. ఇ‑డబ్ల్యూ‑ఎస్ కోటా అమలు వల్ల మొత్తం రిజర్వేషన్ శాతం పెరిగిందని వివరించారు. ప్రభుత్వం ఇచ్చిన సమాధానాలపై ధర్మాసనం అస్పష్టత వ్యక్తం చేసింది. కమిషన్ను నియమించిన ఉత్తర్వులు, దాని నిబంధనలు, అధ్యయన పరిధి, 34 శాతం సిఫార్సుకు ఉపయోగించిన పూర్తి గణాంకాలను సమర్పించాలని ప్రభుత్వాన్ని ఆదేశించింది. సమగ్ర కుటుంబ సర్వే ఏ ఉద్దేశంతో నిర్వహించారు, ఆ డేటాలను కమిషన్ ఏ విధంగా ఉపయోగించుకుందో వివరించాలని కోరింది. ఈ పత్రాలను ధర్మాసనం స్వయంగా పరిశీలించిన తర్వాతే తుది తీర్పు వెలువరిస్తుందని స్పష్టం చేసింది. ఆగస్టు 18న ముఖ్యమంత్రి నారా చంద్రబాబు నాయుడు అధ్యక్షతన జరిగిన మంత్రివర్గ సమావేశంలో గ్రామీణ స్థానిక సంస్థల్లో బీసీలకు 34 శాతం, పట్టణ స్థానిక సంస్థల్లో 33.33 శాతం రిజర్వేషన్లు కల్పిస్తూ ఆమోదం తెలిపారు. ఎస్సీ, ఎస్టీల శాతాలను యథాతథంగా ఉంచారు. ఉమ్మడి రాష్ట్రంలో 1995, 2001, 2006, 2013 ఎన్నికల్లో 34 శాతం రిజర్వేషన్లు అమలయ్యాయని ప్రభుత్వం పేర్కొంది. గత వైఎస్సార్సీపీ ప్రభుత్వం ఈ కోటాను 24.15 శాతానికి తగ్గించడం వల్ల వేలాది పదవులు బీసీలకు దూరమయ్యాయని తెలిపారు. ఇచ్చిన ఎన్నికల హామీని నెరవేర్చేందుకే ఈ నిర్ణయం తీసుకున్నట్లు సీఎం అసెంబ్లీలో ప్రకటించారు. ఈ చట్టపరమైన సవాలు స్థానిక సంస్థల ఎన్నికల ప్రక్రియపై ప్రభావం చూపుతోంది. తీర్పు వెలువడే వరకు ఎన్నికల షెడ్యూల్, వార్డుల కేటాయింపు, రొటేషన్ ప్రక్రియపై అనిశ్చితి కొనసాగనుంది. ప్రభుత్వం కోరిన ఆధార పత్రాలను సమర్పించిన తర్వాత హైకోర్టు వెలువరించే తీర్పుపైనే ఏపీ స్థానిక పోరు భవిష్యత్తు ఆధారపడి ఉంటుంది.