హైదరాబాద్: ప్రముఖ ఫోక్ డ్యాన్సర్ ఈశ్వర్ సాయికి తెలంగాణ హైకోర్టులో ఊరట లభించింది. సైబరాబాద్ కమిషనరేట్ పరిధిలోని నార్సింగి పోలీస్ స్టేషన్‌లో నమోదైన కేసులో ఆయనకు హైకోర్టు ముందస్తు బెయిల్ మంజూరు చేసింది.
ఈశ్వర్ సాయి తరఫున న్యాయవాది నాగూరుబాబు ఎన్ వాదనలు వినిపించారు.తోటి ఫోక్ ఆర్టిస్ట్ మాధురి రాథోడ్ ఇచ్చిన ఫిర్యాదు ఆధారంగా నార్సింగి పోలీసులు కేసు నమోదు చేశారు. భారతీయ న్యాయ సంహిత (BNS)లోని సెక్షన్ 69తో పాటు, షెడ్యూల్డ్ కాస్ట్స్ అండ్ షెడ్యూల్డ్ ట్రైబ్స్ (ప్రివెన్షన్ ఆఫ్ అట్రాసిటీస్) యాక్ట్, 1989లోని సెక్షన్ 3(2)(v) కింద కేసు నమోదైనట్లు సమాచారం.
ఈ కేసులో అరెస్ట్ నుంచి రక్షణ కోరుతూ ఈశ్వర్ సాయి క్రిమినల్ పిటిషన్ నంబర్ 14088/2026 ద్వారా తెలంగాణ హైకోర్టును ఆశ్రయించారు. ఆయన తరఫున ఎం/ఎస్ నాగూరుబాబు లా ఫర్మ్‌కు చెందిన న్యాయవాదులు కోర్టులో వాదనలు వినిపించారు.
ఈశ్వర్ సాయి, ఫిర్యాదుదారు మధ్య గతంలో సుదీర్ఘకాలంగా సంబంధం కొనసాగిందని, అది పరస్పర అంగీకారం, స్వచ్ఛంద సమ్మతితో కూడుకున్నదని డిఫెన్స్ తరఫు న్యాయవాది కోర్టు దృష్టికి తీసుకెళ్లారు. కేసులోని వాస్తవ పరిస్థితులను సమగ్రంగా పరిశీలించాల్సిన అవసరం ఉందని వాదించారు.అలాగే ఈశ్వర్ సాయిని కస్టడీలోకి తీసుకుని విచారించాల్సిన అవసరం లేదని న్యాయవాది పేర్కొన్నారు. దర్యాప్తుకు పూర్తిగా సహకరించేందుకు పిటిషనర్ సిద్ధంగా ఉన్నారని కోర్టుకు తెలిపారు.
కేసులో నమోదైన ఆరోపణల వాస్తవికత, సంబంధిత చట్టపరమైన నిబంధనలు వర్తిస్తాయా లేదా అనే అంశాలను దర్యాప్తులో వెలుగులోకి వచ్చే ఆధారాలు, తదుపరి న్యాయ ప్రక్రియ ఆధారంగా పరిశీలించాల్సి ఉంటుందని డిఫెన్స్ వాదించింది. ఇరుపక్షాల వాదనలు విన్న తెలంగాణ హైకోర్టు.. కోర్టు ముందు ఉంచిన రికార్డులు, సంబంధిత అంశాలను పరిశీలించిన అనంతరం ఈశ్వర్ సాయికి ముందస్తు బెయిల్ మంజూరు చేసింది. అయితే కోర్టు విధించిన షరతులకు లోబడి మాత్రమే ఈ రక్షణ వర్తిస్తుందని స్పష్టం చేసింది.హైకోర్టు ఉత్తర్వులతో ఈశ్వర్ సాయికి అరెస్ట్ నుంచి తాత్కాలిక న్యాయపరమైన రక్షణ లభించింది. అయితే కేసు దర్యాప్తు చట్ట ప్రకారం కొనసాగనుంది.
ముందస్తు బెయిల్ మంజూరు చేసినంత మాత్రాన కేసులోని ఆరోపణలు నిజమని లేదా అవాస్తవమని కోర్టు తుది నిర్ణయం తీసుకున్నట్లు కాదని న్యాయ నిపుణులు చెబుతున్నారు. దర్యాప్తు సమయంలో సేకరించే ఆధారాలు, తదుపరి జరిగే న్యాయ ప్రక్రియలో కేసు మెరిట్స్‌పై పరిశీలన కొనసాగుతుంది.ఫోక్ ఆర్ట్స్ రంగంలో ప్రముఖంగా ఉన్న ఈశ్వర్ సాయి, మరో ఫోక్ ఆర్టిస్ట్ మాధురి రాథోడ్‌కు సంబంధించిన కేసు కావడంతో ఈ వ్యవహారం ఫోక్ ఆర్ట్స్ వర్గాల్లో ఆసక్తిని రేకెత్తించింది. ప్రస్తుతం హైకోర్టు ఇచ్చిన ముందస్తు బెయిల్ ఉత్తర్వులు ఈశ్వర్ సాయికి అరెస్ట్ విషయంలో ఊరట కల్పించగా, కేసు దర్యాప్తు మాత్రం కొనసాగనుంది.
