ఆంధ్రప్రదేశ్ పోలీసులు ఎక్స్లో పోస్టులు తొలగించేందుకు పంపిన టేక్డౌన్ రిక్వెస్ట్లో తమ సంస్థ పేరును ‘FBI’గా పేర్కొన్నారంటూ వచ్చిన వివరాలపై మాజీ సీఎం వైఎస్ జగన్ మోహన్ రెడ్డి తీవ్ర విమర్శలు చేశారు. చంద్రబాబు నాయుడు ప్రభుత్వంలో ‘రెడ్ బుక్ గవర్నెన్స్’ గ్లోబల్ స్థాయికి చేరిందని ఆరోపించారు. పోలీసు వ్యవస్థను రాజకీయ విమర్శకుల గొంతు అణచివేసేందుకు ఉపయోగిస్తున్నారని మండిపడ్డారు. ఈ వ్యవహారం ప్రజాస్వామ్యానికి ముప్పని, రాష్ట్రం, దేశ ప్రతిష్ఠను దెబ్బతీస్తుందని జగన్ వ్యాఖ్యానించారు. గుంటూరు అర్బన్ ఎస్పీ కార్యాలయ అధికారిక ఈమెయిల్ నుంచి ఇన్స్పెక్టర్ ఆఫ్ పోలీస్ ఏవీ బ్రహ్మం పేరుతో టేక్డౌన్ రిక్వెస్ట్ పంపినట్లు ఎక్స్ నుంచి యూజర్ నాగార్జున యాదవ్కు వచ్చిన మెయిల్లో పేర్కొన్నారు. ఆ రిక్వెస్ట్లో సంస్థ పేరు వద్ద ‘FBI’ అని నమోదు చేసినట్లు అందులో ఉంది. ఈ అభ్యర్థన అమెరికా ఎఫ్బీఐ నుంచి రాలేదని, ఆంధ్రప్రదేశ్ పోలీసుల నుంచి వచ్చిందని ఎక్స్ పేర్కొన్నట్లు నాగార్జున యాదవ్కు పంపిన మెయిల్లో ఉంది. ఈ వ్యవహారాన్ని ప్రస్తావిస్తూ జగన్ చంద్రబాబు ప్రభుత్వంపై పలు ప్రశ్నలు సంధించారు. ఇది పోలీసింగ్నా లేక రాజకీయ కక్ష సాధింపులో భాగంగా జరిగిన మోసమా అని ప్రశ్నించారు. టేక్డౌన్ రిక్వెస్ట్ను ఎవరు ఆదేశించారని, ఎఫ్బీఐ గుర్తింపును ఎందుకు ఉపయోగించాల్సి వచ్చిందని నిలదీశారు. ప్రభుత్వం ఇచ్చిన హామీలు, డీఎస్సీ నియామకాలు, అమరావతి, రాష్ట్ర అప్పులు, పాలనపై ప్రశ్నలు అడుగుతున్నందుకే సోషల్ మీడియా పోస్టులను లక్ష్యంగా చేసుకుంటున్నారా అని జగన్ ఆరోపించారు. నాగార్జున యాదవ్ చేసిన పోస్టుల్లో డీఎస్సీ నియామకాలపై ఆరోపణలు, నారా లోకేష్ రాజీనామా డిమాండ్ వంటి అంశాలు ఉన్నాయి. ఈ పోస్టుల తొలగింపు కోసం టేక్డౌన్ రిక్వెస్ట్ పంపినట్లు వెల్లడైంది. గతంలో పంపిన అభ్యర్థనలకు స్పందన రాకపోవడంతో ఈసారి స్పందన కోసం ఎఫ్బీఐ పేరు ఉపయోగించినట్లు పోలీసు వర్గాల్లో చెప్పుకుంటున్నారని పేర్కొన్నారు. పోలీసు యూనిఫాం చట్టాన్ని రక్షించేందుకు ఉండాలని, రాజకీయ సెన్సార్షిప్ కోసం కాదని జగన్ వ్యాఖ్యానించారు. విమర్శకుల గొంతులను అణచివేసేందుకు శక్తిని ఖర్చు చేయకుండా ప్రజలకు ఇచ్చిన హామీల అమలు, రైతుల రక్షణ, ఉద్యోగాల కల్పన, ప్రజా సమస్యల పరిష్కారంపై దృష్టి పెట్టాలని సూచించారు. సోషల్ మీడియా యుగంలో వాస్తవాలను దాచడం సాధ్యం కాదని జగన్ అన్నారు. ప్రభుత్వం తన పనితీరు, పారదర్శకతతో విమర్శలకు సమాధానం చెప్పాలని సూచించారు. సెన్సార్షిప్, వేధింపుల ద్వారా ప్రశ్నించే గొంతులను నియంత్రించే ప్రయత్నాలు చేయవద్దని పేర్కొన్నారు. గత కొన్ని నెలలుగా వైఎస్సార్సీపీ నేతలు, సోషల్ మీడియా యాక్టివిస్టులు, మీడియా పేజీలను లక్ష్యంగా చేసుకుని పోస్టుల తొలగింపు, అకౌంట్ల బ్లాక్, కేసుల నమోదు జరుగుతోందని వైసీపీ ఆరోపిస్తోంది. డీఎస్సీ నియామకాలు, సూపర్ సిక్స్-సెవెన్ హామీల అమలు వంటి అంశాలపై ప్రభుత్వాన్ని ప్రశ్నిస్తున్న వారిపై చర్యలు తీసుకుంటున్నారని ఆ పార్టీ నేతలు విమర్శిస్తున్నారు. వైసీపీ రాష్ట్ర జనరల్ సెక్రటరీ శ్రీకాంత్ రెడ్డి కూడా ఇదే అంశంపై ప్రభుత్వాన్ని విమర్శించారు. ఈ నేపథ్యంలో ఎఫ్బీఐ పేరుతో టేక్డౌన్ రిక్వెస్ట్ పంపారన్న అంశాన్ని జగన్ ప్రధానంగా ప్రస్తావించారు. రాజకీయ విమర్శలను ఎదుర్కొనేందుకు పోలీసు వ్యవస్థను ఉపయోగించకూడదని పేర్కొంటూ, ఈ రిక్వెస్ట్ ఎవరి ఆదేశాలతో వెళ్లిందో చెప్పాలని ప్రభుత్వాన్ని ప్రశ్నించారు.