మెగా ప్రిన్స్ వరుణ్ తేజ్ హీరోగా నటించిన తాజా చిత్రం ‘కొరియన్ కనకరాజు’ డిజిటల్ విడుదలకు సిద్ధమైంది. థియేటర్లలో విడుదలైన ఈ హారర్ కామెడీ చిత్రం ఇప్పుడు ఓటీటీ ప్రేక్షకులను అలరించేందుకు వచ్చేస్తోంది. ప్రముఖ ఓటీటీ దిగ్గజం నెట్ఫ్లిక్స్ ఈ సినిమా స్ట్రీమింగ్ తేదీని అధికారికంగా ప్రకటించింది. సెప్టెంబర్ 4 నుంచి ఈ మూవీ ప్రసారం కానుంది. మేర్లపాక గాంధీ దర్శకత్వం వహించిన ఈ సినిమాను యువి క్రియేషన్స్, ఫస్ట్ ఫ్రేమ్ ఎంటర్టైన్మెంట్స్ సంయుక్తంగా నిర్మించాయి. రాజీవ్ రెడ్డి, సాయిబాబు జాగర్లమూడి నిర్మాతలుగా వ్యవహరించారు. ఇందులో వరుణ్ తేజ్ సరికొత్త లుక్లో కనిపించగా, రితికా నాయక్ కథానాయికగా నటించారు. కమెడియన్ సత్య, దక్షా నగార్కర్ కీలక పాత్రలు పోషించారు. ఒక కొరియన్ ఆత్మ కథానాయకుడి శరీరంలోకి ప్రవేశించిన తర్వాత సాగే వినోదాత్మక ప్రయాణంతో ఈ చిత్రాన్ని తెరకెక్కించారు. నెట్ఫ్లిక్స్లో ఈ చిత్రం ఒరిజినల్ తెలుగు వెర్షన్తో పాటు హిందీ, తమిళం, కన్నడ, మలయాళ భాషల డబ్బింగ్ వెర్షన్లలో ఒకేసారి అందుబాటులోకి రానుంది. థియేటర్లలో చూడటం మిస్సయిన సినీ ప్రియులు సెప్టెంబర్ 4 నుంచి నెట్ఫ్లిక్స్లో ఈ కామెడీ ఎంటర్టైనర్ను వీక్షించవచ్చు
.