ఎల్నినో ప్రభావం వల్ల తెలంగాణ రాష్ట్రంలో పంట సాగు లక్ష్యం తగ్గిపోయింది. ఈ నేపథ్యంలో, రాష్ట్ర ప్రభుత్వం ప్రస్తుతం ఉన్న పంటలను కాపాడటానికి ప్రత్యేక ప్రణాళికలను రూ ఎల్నినో ప్రభావం వల్ల తెలంగాణ రాష్ట్రంలో పంట సాగు లక్ష్యం తగ్గిపోయింది. ఈ నేపథ్యంలో, రాష్ట్ర ప్రభుత్వం ప్రస్తుతం ఉన్న పంటలను కాపాడటానికి ప్రత్యేక ప్రణాళికలను రూపొందించేందుకు చర్యలు తీసుకుంటోంది. వ్యవసాయ శాఖకు ఈ ప్రణాళిక రూపకల్పన బాధ్యత అప్పగించబడింది. రాష్ట్రంలో మొత్తం పంట సాగు లక్ష్యం 1,32,38,446 ఎకరాలు కాగా, ఇప్పటివరకు 1,23,08,853 ఎకరాల్లో పంటలు సాగు చేయడం జరిగింది. ముఖ్యంగా వరి పంటకు 65,95,645 ఎకరాల లక్ష్యానికి గాను 54,25,998 ఎకరాల్లో సాగు జరిగింది. ఇతర పంటలలో పత్తి 48,23,754 ఎకరాలు, జొన్న 34,888 ఎకరాలు, మొక్కజొన్న 5,92,852 ఎకరాలు, కందులు 5,56,828 ఎకరాలు, పెసలు 1,60,182 ఎకరాలు, మినుములు 68,878 ఎకరాలు, వేరుశనగ 15,754 ఎకరాలు, సోయాబీన్ 3,72,400 ఎకరాలు, చెరుకు 40,987 ఎకరాలు ఉన్నాయి. రాష్ట్రంలోని 20 జిల్లాల్లో వర్షాభావ పరిస్థితులు నెలకొన్నాయి. ప్రాజెక్టులు, రిజర్వాయర్లు, చెరువులు, కుంటల్లో నీటి మట్టాలు చాలా తక్కువగా ఉన్నాయి. వర్షాలు లేకపోవడం వల్ల పంటలు ఎండిపోతున్నాయి, వాటిని కాపాడటం ఒక పెద్ద సవాలుగా మారింది. ప్రస్తుత పంటల పరిస్థితిపై వ్యవసాయ శాఖ ప్రభుత్వానికి నివేదికను సమర్పించింది. ఈ సమస్యలను పరిష్కరించేందుకు వ్యవసాయ, ఉద్యానవన, పశుసంవర్ధక, నీటిపారుదల, విద్యుత్, భూగర్భ జల, పంచాయతీ రాజ్, గ్రామీణాభివృద్ధి శాఖల ఉన్నతాధికారులు, అలాగే విశ్వవిద్యాలయాల ఉప కులపతులు శాస్త్రవేత్తలతో ప్రభుత్వం త్వరలో సమావేశం కానుంది. ఈ సమావేశంలో రాష్ట్రవ్యాప్తంగా పంటలకు అవసరమైన అంశాలను సమీక్షించి, నీటి వనరుల అభివృద్ధి, విద్యుత్ సరఫరా, ఎరువుల పంపిణీ, పురుగుమందుల వినియోగం వంటి చర్యలపై తుది నిర్ణయం తీసుకుంటారు. పంటల రక్షణను పర్యవేక్షించేందుకు గ్రామం నుంచి జిల్లా స్థాయి వరకు ప్రత్యేక కమిటీలను ఏర్పాటు చేయాలని ప్రభుత్వం నిర్ణయించింది. ఈ అంశాలపై సమగ్ర ప్రణాళికను సిద్ధం చేసి మంగళవారం నాటికి సమర్పించాలని వ్యవసాయ శాఖను ప్రభుత్వం ఆదేశించింది.