ఆ ముగ్గురు మొగుళ్ల పంచాయితీలోకి వెన్నెల కిషోర్’.. సేవ్ ది టైగర్స్ 3’ లో నెక్స్ట్ లెవెల్ ఫన్

Save The Tigers Season 3: తెలుగు ఓటీటీ స్పేస్‌లోనే బిగ్గెస్ట్ ఫ్యామిలీ ఎంటర్‌టైనర్‌గా నిలిచిన ‘సేవ్ ది టైగర్స్’ ఇప్పుడు సీజన్ 3తో రచ్చ చేయడానికి సిద్ధమైంది. ఎలాంటి అంచనాలు లేకుండా వచ్చి, ఫ్యామిలీ ఆడియన్స్‌ను విపరీతంగా ఆకట్టుకున్న మోస్ట్ సక్సెస్‌ఫుల్ వెబ్ సిరీస్ ‘సేవ్ ది టైగర్స్’ ప్రత్యేక స్థానాన్ని సొంతం చేసుకుంది. భార్యల బాధితులైన ముగ్గురు భర్తల కథతో వచ్చిన సీజన్ 1, సీజన్ 2లు తెలుగు ఓటీటీ చరిత్రలోనే క్లీన్ ఫ్యామిలీ ఎంటర్‌టైనర్స్‌గా నిలిచి ప్రేక్షకుల అభిమానాన్ని సొంతం చేసుకున్నాయి. ఇప్పుడు అదే మ్యాజిక్‌ను రిపీట్ చేస్తూ, మరింత డబుల్ డోస్ ఫన్‌తో ‘సేవ్ ది టైగర్స్ – సీజన్ 3’ రాబోతోంది. తాజాగా ఈ క్రేజీ సిరీస్‌కు సంబంధించిన ట్రైలర్‌ను మేకర్స్ రిలీజ్ చేశారు. టాలీవుడ్ ప్రముఖ క్రియేటర్స్ మహి వి.రాఘవ్, ప్రదీప్ అద్వైతం షో రన్నర్స్‌గా వ్యవహరిస్తున్న ఈ సరికొత్త సీజన్ జియో హాట్‌స్టార్ వేదికగా జూన్‌ 19వ (save the tigers 3 release date ott) తేదీ నుంచి స్ట్రీమింగ్‌ కానుంది. ఈసారి వెన్నెల కిషోర్ ఎంట్రీ ఇవ్వడం, కాస్మిక్ ట్విస్ట్‌తో సరికొత్త కథతో వస్తుండటంతో అంచనాలు భారీగా ఉన్నాయి.

తాజాగా విడుదలైన సీజన్ 3 ట్రైలర్‌ను చూస్తే.. ఈసారి దర్శకుడు శ్రీరామ్ ఎరగం కథను సరికొత్త పంథాలో నడిపించబోతున్నట్లు అర్థం అవుతుంది. ఈ సీజన్‌లో ఒక ఆసక్తికరమైన ‘కాస్మిక్ ట్విస్ట్’ కథలోకి వచ్చి, రెండు వైవిధ్యమైన ప్రపంచాల మధ్య జరిగే ఒక ప్రత్యేకమైన సోషల్ ఎక్స్‌పెరిమెంట్‌లా ఈ కథ సాగనుందని అర్థం అవుతుంది. మొదటి రెండు సీజన్లలో తమ అద్భుతమైన టైమింగ్‌తో పొట్టచెక్కలయ్యేలా నవ్వించిన పాత జంటలు ఈసారి కూడా ప్రేక్షకులను అలరించడానికి రెడీ అవుతున్నారు. ప్రియదర్శి – జోర్దార్ సుజాత, అభినవ్ గోమటం – పావని గంగిరెడ్డి, కృష్ణ చైతన్య – దేవియాని శర్మల కెమిస్ట్రీ ఈ సీజన్‌కు కూడా మెయిన్ పిల్లర్ కానుంది. తాజాగా రిలీజ్ అయిన ట్రైలర్‌లో ‘‘ఎవడ్రా చెప్పింది ‘పెళ్లంటే పండు వెన్నెల.. పెళ్లామంటే నిండు పున్నమి’’ అంటూ పలికిన డైలాగ్స్ వినోదాన్ని పంచాయి. ఈ సీజన్ 3లో బిగ్గెస్ట్ సర్ప్రైజ్‌గా .. స్టార్ కమెడియన్ వెన్నెల కిషోర్ ఎంట్రీ ఇవ్వడం నిలిచింది. ఈ సీజన్‌లో ఇంద్రుడిగా వెన్నెల కిషోర్‌ కనిపించబోతున్నారు. ముగ్గురు మొగుళ్ల పంచాయితీలోకి వచ్చిన ‘వెన్నెల కిషోర్’.. ఆ టైగర్స్‌ను వారి భార్యల నుంచి ఎలా సేవ్ చేశాడో చూడాల్సిందే.