బాలీవుడ్ స్టార్ హీరో రణ్బీర్ కపూర్ తన కుటుంబం గురించి ఓ ఆసక్తికరమైన విషయాన్ని పంచుకున్నారు. ప్రముఖ టాక్ షో 'కాఫీ విత్ కరణ్'లో మాట్లాడుతూ, కపూర్ కుటుంబంలో అత్యంత విద్యావంతుడిని తానేనని సరదాగా వ్యాఖ్యానించారు. దీనికి గల కారణాన్ని కూడా ఆయన వివరించారు.పదో తరగతి ఫలితాలు వచ్చినప్పుడు తాను అమెరికాలో ఉన్నానని, తన తండ్రి రిషి కపూర్ దర్శకత్వంలో వస్తున్న 'ఆ అబ్ లౌట్ చలే' సినిమాకు అసిస్టెంట్గా పనిచేస్తున్నట్లు గుర్తుచేసుకున్నారు. తనకు పదో తరగతిలో 54.3 శాతం మార్కులు వచ్చాయని తల్లి నీతూ కపూర్ ఫోన్ చేసి చెప్పగానే ఆమె ఆనందంతో కేకలు వేశారని తెలిపారు.కపూర్ కుటుంబంలో ఒక్క ఏడాది కూడా ఫెయిల్ కాకుండా పదో తరగతి పాసైన మొదటి అబ్బాయిని తానే కావడంతో, అమెరికాలోనే తన కోసం పెద్ద పార్టీ ఇచ్చారని రణ్బీర్ వెల్లడించారు. "ఆ వార్త విని మా నానమ్మ కళ్లలో ఆనందభాష్పాలు చూశాను. అందుకే మా కుటుంబంలో అందరికంటే నేనే ఎక్కువ చదువుకున్నా" అని ఆయన నవ్వుతూ చెప్పారు.ఇక రణ్బీర్ సినిమాల విషయానికొస్తే, ప్రస్తుతం ఆయన సంజయ్ లీలా భన్సాలీ దర్శకత్వంలో 'లవ్ & వార్' చిత్రంలో నటిస్తున్నారు. ఇందులో ఆయన భార్య అలియా భట్, విక్కీ కౌశల్ కూడా కీలక పాత్రల్లో నటిస్తున్నారు. దీనితో పాటు నితేశ్ తివారీ ప్రతిష్టాత్మకంగా తెరకెక్కిస్తున్న 'రామాయణ' చిత్రంలో రాముడి పాత్రలో కనిపించనున్నారు. ఈ సినిమాలో సాయి పల్లవి సీతగా, యశ్ రావణుడిగా, సన్నీ డియోల్ హనుమంతుడిగా నటిస్తున్నారు